Genesesi 22 - Chiyawo Bible

Abulahamu akulamulidwa kumpeleka Isaki mpela mbopesi

¹ Piyamasile ayi yinduyi, Mlungu ŵamlinjile Abulahamu.* Nipo ŵamŵilasile kuti, “Abulahamu!” Abulahamuwo ŵajanjile kuti, “Ee, AMBUJE.”*

² “Mumjigale mwanace jwenu Isaki, mwanace jwenu jumo jumkasimumnonyela mnope jula, ni mjawule najo ku cilambo ca Moliya. Mkampelece mwanacejo mpela mbopesi jakutinisya, petumbi litingamlosye kweleko.”

³ Myoyo Abulahamu ŵajimwice kumasikusiku, ŵakatile sasu syakuja kutinicisya mbopesi, ni ŵamtwicile bulu jwawo, ŵamjigele Isaki pamo ni acacanda ŵamasengo ŵaŵili ni ŵawutandite ulendo wakuja ku cilambo ciŵasalile Mlungu.

⁴ Lisiku lyatatu cityocele kumangwawo, Abulahamu ŵagaweni malo ga ŵajawulagago pakutalicila.

⁵ Abulahamu ŵatite kwa ŵamasengo ŵawo ŵala, “Msigale apano ni bulu, une ni mwanaceju citujawule msogolo kuja kumlumba Mlungu, titumsimane pakuwuja.”

⁶ Abulahamu ŵamtwicile Isaki sasu syakuja kocela mbopesi jakutinisya jila, jwalakwejo ŵajigele moto pamo ni cipula m'myala mwakwe, nipo ŵana ŵaŵili ŵaliji mkwendela yalumo.

⁷ Piŵaliji mkwenda, Isaki ŵaŵilasile babagwe kuti, “Baba.” Abulahamu ŵajanjile kuti, “Ee, mwanangu.” Isaki ni ŵatite, “Moto ni sasu ngusiwona, ana mwanace jwangondolo jwakuti tumpelece mpela mbopesi jakutinisyajo ali kwapi?”

⁸ Abulahamu ŵajanjile kuti, “Mlungu msyene takapelece mwanace jwangondolojo.” Nipo ŵapelengenye kwenda ulendo wawo yalumo.

⁹ Piŵayice pa malo gaŵasalile Mlungu gala, Abulahamu ŵataŵile malo gakupelecela mbopesi, ni ŵaŵisile sasu pacanya pakwe. Kaneko ŵamtaŵile Isaki, ni ŵamgonece pacanya pa sasu syaliji pacanya pa malo gakupelecela mbopesi.

¹⁰ Abulahamu ŵaswekwile cipula kuti amwulaje mwanagwawojo.

¹¹ Nambo lilayika lya AMBUJE lyamŵilasile kutyocela kwinani licitiji kuti, “Abulahamu, Abulahamu!” Jwalakwejo jwajanjile kuti, “Ee, Une ndili apano.”

¹² Kaneko lilayika lila lyatite, “Mkasimumwulaga mwanacejo, atamose kumtenda kandu kalikose. Pakuŵa sambano manyilile kuti m'mwejo mkusimumjoga Mlungu ligongo nganimumkanya Mlungu mwanace jwenu jumopejo.”

¹³ Abulahamu piŵajinamukwice, ŵajiweni ngondolo jamkambako jili jitanjile misengo jakwe mcitekete. Jwalakwe ŵajawile kuja kujikamula, ni ŵajiwuleje kujipeleka mbopesi jakutinisya m'malo mwa mwanagwawo jula.

¹⁴ Abulahamu ŵagapele malogo lina lyakuti, “AMBUJE ŵapelece.” Mpaka sambano jino ŵandu akugakolanga gele malogo kuti, “Petumbi lya AMBUJE tacipeleka.”

¹⁵ Lilayika lya AMBUJE lila lyamŵilasile soni Abulahamu kaŵili kutyocela kwinani, lyatite kuti,

¹⁶ AMBUJE akusala kuti, “Une ngulumbila kuti tinampe upile m'mwejo, ligongo nganimunganya mwanace jwenu jumope jula.

¹⁷ Tinampe yisukulu yejinji mpela ndondwa sya kwinani, ni mpela soni mcenga mungulugulu nyasa. Yisukulu yenuyo tiyicapunda amagongo wawo pa ndaŵi ja ngondo.

¹⁸ Nipo mitundu josope ja ŵandu ŵa pa cilambo capasi, tijicipata upile kupitila mwa yisukulu yenu, ligongo m'mwejo mgapikene maloŵe gangu.”

¹⁹ Abulahamu ŵawujile kumalo kuŵalesile ŵamasengo ŵakwe kula, ni ŵajigalene wosope kuwujila ku Belesheba kuŵatamaga.

Yisukulu ya Naholi

²⁰ Yili yipite ayi yinduyi, Abulahamu ŵapikene kuti Milika ŵaŵelecele Naholi mpwawo ŵanace msano ni ŵatatu.

²¹ Mwanace jwandanda lina lyakwe ŵaliji Usi, mpwakwe jwa Usi jwaliji Busi. Ni ŵapali soni Kemuele baba ŵawo Alamu.

²² Kesedi, Haso, Pilidashi, Yidilafu ni Betuwelo,

²³ Betuwelo ŵaliji baba ŵawo Labeka. Milika ŵamŵelecele Naholi, mpwawo Abulahamu ŵanace msano ni ŵatatu ŵeleŵa.

²⁴ Nambo soni ŵamkwawo ŵanondi lina lyakwe Lewuma, ŵamŵelecele Naholi ŵanace aŵa: Teba, Gahamu, Tahashi, ni Maaka.