Genesesi 21 - Chiyawo Bible

Kupagwa kwa Isaki

¹ AMBUJE* ŵampele upile Sala, ni ŵamtendele yindu yele yiŵapangene najo, mpela mwele AMBUJEWO ŵaŵicile cilanga.*

² Sala ŵakwete cilu ni ŵamŵelecele Abulahamu* mwanace jwamlume mu ucekulu wakwe. Mwanace jwelejo ŵapagwile pa ndaŵi jisyesyene jiŵasasile Mlungu kuti mwanacejo tacipagwa.

³ Abulahamu ŵampele mwanacejo lina lyakwe Isaki.

⁴ Pali papite masiku msano ni gatatu, Abulahamu ŵamwumbesye mwanacejo pakuya yiŵalamwile Mlungu.

⁵ Abulahamu ŵaliji ni yaka 100 Isaki mwanagwawo piŵapagwaga.

⁶ Sala ŵatite, “Mlungu ambele ciseko, mundu jwalijose jutajipikane nganiji tijimsecesye.

⁷ Ŵani ŵangakombolece kwasalila Abulahamu kuti Sala tacijonjesya mwanace? Nambotu lelo naŵelecele mwanace mu ucekulu wawo.”

⁸ Mwanace wakusile, nipo pa lisiku lyakuti tamlekasye konga, Abulahamu ŵalinganyisye cindimba cacikulungwa.

Hagala ni Ishimaeli akwatoposya

⁹ Nambo Sala ŵam'weni mwanace jwa Hagala jwa ku Iguputo juŵamŵelecele Abulahamu ali ng'anda ni Isaki.

¹⁰ Ni ŵatite kwa Abulahamu, “Mumtoposye kapolo jwamkongweju ni mwanace jwakwejo. Mwanace jwa kapoloju akapocela cipanje cenu, cele citacipocela mwanangu Isaki.”

¹¹ Maloŵe gelaga nginasangalala nago Abulahamu ligongo Ishimaeli nombe najo ŵaliji mwanagwawo.

¹² Nambo Mlungu ŵatite kwa Abulahamu, “Mkamdandawula ya mwanagwenu Ishimaeli ni kapolo jwenu Hagala, cilicose cakumsalila Sala mcitende, ligongo Isakiju ni jutaciŵa nangolo jwa yisukulu yenu, mpela mwele munatendele cilanga.

¹³ Mwanace jwa kapolo jwenu jwamkongwejo tinjimpa soni ŵanace ŵajinji, nipo taciŵa mtundu wawukulungwa, ligongo jwalakwejo soni ali mwanagwenu.”

¹⁴ Myoyo Abulahamu ŵajimwice kundaŵindaŵipe ni ŵajigele yakulya ni msaku walipende wegumbale ni mesi, ni ŵampele Hagala. Ŵamŵelesye soni mwanace jwakwe jula ni ŵamsalile kuti ajawuleje. Hagala ŵanyakwice ni ŵaliji mkwendajenda mcipululu lya ku Belesheba.

¹⁵ Mesi gaŵajigele gala gali gamasile, ŵagambile kumleka mwanace jula pasi pewukutu.

¹⁶ Jwalakwe ni ŵajile kutama pasi pamti myoyo, pamkuli wa mamita 100, pelepo ŵaliji mkuliŵecetela jika kuti, “Ngakomboleka kuti une namwone mwanangu ali mkuwa.” Hagala ali citamile myoyo, mwanace jula ŵatandite kulila kwakukulungwa.

¹⁷ Mlungu ŵakupikene kulila kwa mwanacejo, nipo lilayika lya Mlungu lyaŵecete ni Hagala kutyocela kwinani, kuti, “Ana m'mweji Hagala, cikumsawusya cici? Mkamjogopa pakuŵa Mlungu akupikene kulila.

¹⁸ Nyakukani, mjawule mkamnyakule mwanacejo ni mkamyalasye, ligongo tinjimpa yisukulu yejinji mwanacejo.”

¹⁹ Mlungu ŵawugwile meso ga Hagala ni ŵaciweni cisima. Jwalakwe ŵajawile pa cisimapo, ni ŵagumbesye msaku walipende lila ni mesi, gane ŵamwesisye mwanace jula.

²⁰ Mlungu mcipululu ca Pelani, ni ŵaliji mundu jwakupakombola kusakula nyama kwejinji.

²¹ Mamagwe ŵamsosele jwamkongwe jwa ku Iguputo juŵalombele.

Cilanga ca Abulahamu ni Abimeleki

²² Ndaŵi jelejo Abimeleki pamo ni Fikoli, jwamkulungwa jwa asilikali ŵakwe ŵa ngondo, ŵajawile kwa Abulahamu kuja kumsalila kuti, “Baba, Mlungu ali ni ŵalakwe mu yindu yosope yakutenda.

²³ Sambano ŵalakwe alumbile pameso pa Mlungu kuti ngasalambusya une, kapena ŵanace ŵangu, kapena soni yisukulu yangu. Une ndemi jwakulupicika kwa ŵalakwe, nombe nawo aŵice cilanga cakuti taciŵa ŵakulupicika kwa une, mcilambo cele cakuja kutamaco.”

²⁴ Abulahamu ni ŵatite, “Ngulumbila.”

²⁵ Abulahamu ŵadandawulile Abimeleki ya cisima cele ŵamasengo ŵakwe ŵacisumwile.

²⁶ Abimeleki ŵatite, “Ngingum'manyilila mundu juŵatesile yeleyi. Atamose ŵalakwe asyene nganasalila une ya cele cinduci, soni une kupikana kwakwe ni kweleku.”

²⁷ Abulahamu ŵampele Abimeleki ngondolo ni ng'ombe, nipo ŵandu ŵaŵiliŵa ŵapangene cilanga.

²⁸ Abulahamu ŵasapwile ŵanace ŵangondolo msano ni siŵili ŵatyosisye pa yilangwa yakwe.

²⁹ Abimeleki ŵamwusisye kuti, “Ana sikugopolela cici ngondolo msano ni siŵilisi?”

³⁰ Abulahamu ni ŵajanjile kuti, “Ŵalakwe apocele ngondolo msano ni siŵilisi, ligongo pakutenda myoyo ni kuti ŵalakwe akwiticisya kuti cisima celeci nawukwile une.”

³¹ Myoyo malo gala ŵagapele lina lyakuti Belesheba ligongo kweleko ŵandu ŵaŵili ŵala ŵapangene cilanga.

³² Ali atesile cilanga celeci ku Belesheba kula, Abimeleki pamo ni Fikoli jwamkulungwa jwa asilikali ŵakwe ŵa ngondo, ŵanyakwice kuwujila kumangwawo, ku cilambo ca Afilisiti.

³³ Abulahamu ŵapandile citela ca ukwesu ku Belesheba kula, nipo papopo soni ŵalambile AMBUJE Mlungu Ŵandaŵi syosope.

³⁴ Nipo Abulahamu ŵatemi mcilambo ca Afilisiti kwa masiku gamajinji.