Genesesi 20 - Chiyawo Bible

Abulahamu ni Abimeleki

¹ Abulahamu,* ŵajesile kutyocela ku Mamule kwinjililaga ca kum'mwela kwa Kenani, ni ŵayice kutama mpela mlendo cilikati ca Kadeshi ni Shuli ku Gelali.

² Nipo Abulahamu pakuŵeceta ya Sala ŵamkwawo ŵatiji, “Ali mlumbu gwangu.” Myoyo Mwenye Abimeleki jwa ku Gelali ŵatumisye ŵandu kuja kumjigala Sala.

³ Nambo Mlungu ŵamyicilile Abimeleki mu sagamisi ni ŵamsalile kuti, “M'mwejo timŵe ligongo lya jwamkongwe jumumjigelejo pakuŵa ali jwamsyene.”

⁴ Nambotu Abimeleki ŵaliji mkanagone najo jwamkongwejo myoyo ŵatite kuti, “AMBUJE,* ana timwakunule ŵandu ŵangalemwa?

⁵ Ana Abulahamu asyene nganasalila une kuti jwamkongwejo ali mlumbugwawo? Nipo Sala asyene ŵatite soni kuti Abulahamu ali alumbu ŵawo? Une natesile yeleyi ni mtima wakulupicika, nipo naliji jwangali nganisyo syakusakala pindesileje yeleyi.”

⁶ Mlungu ni ŵamjanjile Abimeleki musagamisimo kuti, “Elo ngumanyilila kuti mtesile yeleyi ni mtima wakulupicika nipo une ni junatendesye kuti mkasimumkwaya jwamkongwejo kuti mkasimundemwecesya une.

⁷ Ni sambano mumpelece jwamkongwejo kwa ŵamkwakwe. Jwamlumejo ali jwakulocesya* nipo tampopelele nipo m'mwejo ngim'wa. Nambo naga ngamumwucisya m'manyilile kuti nditu m'mwejo tim'we pamo ni ŵandu ŵenu wosope.”

⁸ Ni Abimeleki ŵajimwice kundaŵindaŵipe, ni ŵasiŵilasile nduna syawo syosope ni kusisalila yindu yosope yeneyi. Nduna sila syatesile woga kwejinji.

⁹ Abimeleki ni ŵamŵilasile Abulahamu ni ŵamwusisye kuti, “Ana cici cimtutendele um'we? Ana une namlemwecesye cici kuti mtutendesye ulemwa* wawukulungwa camti myiyi? Mundendele une yindu yayili yangaŵajilana mundu kumtendela mjakwe.

¹⁰ Ana mwaganisyaga cici pamwatendaga yeleyi?”

¹¹ Abulahamu ni ŵatite kuti, “Natesile yele yinduyi ligongo naliji mganisya kuti akuno kwangali ŵandu ŵakusamjogopa Mlungu, ni najogwepe kuti nimkaŵa kumbulaga ligongo lya ŵamkwangu.

¹² Nambo soni jwamkongweju ali nditu mlumbu gwangu: baba ŵetu ŵampepe nambo acimama ŵetu ŵakulekangana, ni namlombile.

¹³ Ni Mlungu piŵandyosisye kumangwetu, namsalile jwamkongweju kuti, ‘Mjileje myi pakusaka kundyosya une canasa cenu: Kulikose kutitujawuleje, mjileje kuti une ndili mlumbugwenu.’ ”

¹⁴ Ni Abimeleki ŵajigele ngondolo, ng'ombe ni acikapolo ŵacalume ni ŵacakongwe ni kumpa Abulahamu, ni ŵamwucisye soni ŵamkwakwe ŵala.

¹⁵ Nipo Abimeleki ŵatite, “Mlole cilambo cosopeci cili m'myala mwenu, mtame palipose patipamnonyele.”

¹⁶ Ni ŵatite kwa Sala, “Mlole napele alumbu ŵenu mbiya sya silifa* 1,000 kuti ciŵe cilocesyo kwa ŵandu ŵenu pamo ni ŵandu ŵane wosope kuti mli ŵangali ulemwa.”

^17-18 Ni Abulahamu ŵapopesile kwa Mlungu, nipo Mlungu ŵamposisye Abimeleki pamo ni ŵamkwakwe kwisa soni acikapolo ŵakwe ŵacakongwe mwamti ŵapakombwele soni kola ŵanace, pakuŵa AMBUJE ŵatendesye acakongwe wosope ŵa pa mlango pa Abimeleki kuti akasaŵeleka soni ligongo lya Sala ŵamkwawo Abulahamu.