Genesesi 2 - Chiyawo Bible

¹ Myoyo kwinani ni cilambo cosope capasi, ni yindu yosope yakutama mwelemo, ŵamasile kuyipanganya.

² Pa lisiku lya msano ni limo Mlungu ŵamalisisye kupanganya masengo gosope gaŵatendagago, ni ŵapumwile pa lisiku lya msano ni gaŵili.

³ Mlungu ŵalipele upile lisiku lya msano ni gaŵili ni kulilekanganya ni gane, ligongo lyakuti Mlungu ŵapumwile pa lyele lisikuli ali amalisisye kupanganya yindu yosope.

⁴ Amu ni mwele Mlungu muŵayipanganyicisye yindu ya kwinani ni ya cilambo capasi. Pandaŵi jele AMBUJE* Mlungu ŵapaganyisye cilambo capasi, ni yindu yosope ya kwinani,

Mgunda wa Edeni

⁵ paliji pangali yakumela pa cilambo capasi, atamose mbeju syaliji mkanisimele, ligongo AMBUJE Mlungu ŵaliji mkanagwisye ula pa cilambo capasi, soni paliji pangali mundu jwalijose jwakulima petaka.

⁶ Nambo mesi gakopokaga pasi pa cilambo ni gajitililaga litaka.

⁷ AMBUJE Mlungu ŵajigele litaka ni ŵamgumbile mundu ni litakalyo. Ŵampepelele lipuje lyakupeleka umi mu mbula syakwe, nipo mundujo ŵakwete umi.

⁸ AMBUJE Mlungu ŵaŵisile mgunda mu Edeni ca kungopoko lyuŵa, ni ŵamŵisile mundu juŵamgumbile jula mwelemo.

⁹ Jwalakwe ni ŵayimelesye mu mgundamo yitela yakulekanganalekangana yakusalala, ya yisogosi yakunong'a. Pasikati pa mgundawo capali citela cakupeleka umi, ni soni capali citela cakumanyisya yindu yambone ni yakusakala.

¹⁰ Lusulo lwakukopoka mu Edeni m'momo, lwajilimaga mesi, ni lwaliji mkwitila mgundawo. Lusulolo lwagaŵikene kupanganya sulo mcece.

¹¹ Lusulo lwandanda lina lyakwe Pishoni, nipo lukusajenda mwakusyungulila cilambo ca Hafila,

¹² cilambo cele cikusimanikwa golidi* jwambone mnope, ni mawuta gakununjila mnope, ni maganga gakusalala, ga mtengo wapenani.

¹³ Lusulo lwaŵili lina lyakwe Gihoni, nipo lukusajenda mwakusyungulila cilambo cosope ca Kushi.

¹⁴ Lusulo lwatatu lina lyakwe Taigilisi, lwele lwalukupita kungopoko lyuŵa kwa cilambo ca Asiliya. Nipo lusulo lwa mcece lina lyakwe Yufuleti.

¹⁵ AMBUJE Mlungu ŵamjigele mundu jula ni kumŵika mu mgunda wa Edeni kuti alimeje ni kuwulolela.

¹⁶ AMBUJE Mlungu ŵamsalile mundu jula kuti, “Mlyeje yisogosi yacitela cilicose ca mu mgundamu,

¹⁷ nambo mkasimlya yisogosi ya citela cakumanyisya yindu yambone ni yakusakala. Mkasimlya yisogosi ya cele citelaco. Naga timlye, pa lisiku litimcilyalyo, timciwa.”

¹⁸ Kaneko AMBUJE Mlungu ŵatite, “Nganiciŵa cindu cambone kuti mundu aŵe jika. Tinampanganyicisye mjakwe jwakuti amkamucisyeje.”

¹⁹ AMBUJE Mlungu ŵajigele litaka ni ŵapanganyisye yinyama yosope ni yijuni yosope. Ni ŵayice nayo kwa ŵandu ŵala kuti ayipe mena, mwelemo ni muyapatile yosope yene mena gawo.

²⁰ Myoyo mundu jula ŵapelece mena ku yinyama yosope ni yijuni yosope, nambo pa yosopeyi paliji pangali mjakwe jwakuti amkamucisyeje.

²¹ Myoyo AMBUJE Mlungu ŵamgonece mundu jula lugono lwekulungwa mnope, ali mlugono m'momo, Mlungu ŵamtyosisye luŵalati lumo lwa mundujo, ni ŵawugele ni mnowu piŵalutyosisyepo.

²² AMBUJE Mlungu ŵampanganyisye mundu jwamkongwe ni luŵalati luŵatyosisye mwa jwamlume jula, Adamu.* AMBUJE ŵayice najo jwamkongwejo kwa jwamlume jula.

²³ Adamu ŵatite, “Aju ni jwa mtundu wangu liwupa lyakutyocela m'mawupa gangu, mnowu wakutyocela mu mnowu wangu, jwamkongwe ni lina lyakwe pakuŵa ŵatyocele mwa jwamlume.”

²⁴ Ali ni ligongo lyakwe mundu jwamlume akusatyokaga kwa babagwe ni mamagwe ni kuja kulumbikana ni ŵamkwakwe ni kuŵa cilu cimo.

²⁵ Nipo mundu jula ni ŵamkwakwe ŵala ŵaliji makonope nambo nginatenda soni.