Genesesi 16 - Chiyawo Bible

Hagala ni Ishimaeli

¹ Salayi ŵamkwawo Abulamu, nganamŵelecela ŵanace Abulamujo. Nambo Salayi ŵakwete kapolo jwamkongwe jwa ku Iguputo lina lyakwe Hagala.

² Nipo Salayi ŵamsalile Abulamu kuti, “Mlole sambano, AMBUJE* nganamba upile wakuŵeleka mwanace. Uli agambe kutama malo gamo ni kapolo jwanguju? Kuti mwine mwakwe komboleka kumbelecela une ŵanace.” Nipo Abulamu ŵajiticisye yiŵaŵecete Salayi.

³ Myoyo Salayi ŵampelece Hagala jula kwa Abulamu kuti aŵe ŵamkwakwe ŵanondi. (Ayi yatendece Abulamu ali atemi ku Kenani yaka likumi).

⁴ Abulahamu,* ali atemi najo malo gamo Hagala, Hagalajo ŵakwete cilu. Piŵaliweni kuti akwete cilu ŵatandite kulikwesya, ni kwanyosya Salayi ambujegwe.

⁵ Lisiku line Salayi ŵamsalile Abulamu kuti, “Kunyosya une Hagala, uli ulemwa* kwenumwe. Une nampele m'mwejo kapolo jwangu jweleju, nipo citandilile pa ŵakwete cilu pala, aŵele ali kunyosya. AMBUJE ni ŵatalamule kuti pawonece ŵani ŵali ŵakulemwa pasikati petu.”

⁶ Nambo Abulamu ŵamjanjile Salayi kuti, “Jweleju ali kapolo jwenu, soni ali m'myala mwenu. Tendani najo yiliyose yitimsace.” Myoyo Salayi ŵatandite kumtamika Hagala mwa ngalwe, mpaka Hagalajo ŵatisile.

⁷ Lilayika lya AMBUJE lyasimene nawo pacisima mcipululu, pa msewo wakwawula ku Shuli.

⁸ Ni lyatite, “M'mweji Hagala kapolo jwa Salayi, ana mkutyocela kwapi, soni mkuja kwapi?” Jwalakwe ŵajanjile kuti, “Ngwatila ambuje ŵangu Salayi.”

⁹ Lilayika lya AMBUJE lila lyamsalile kuti, “Iyayi, mwujile kwa ambuje ŵenu Salayi ni mkapikanileje.”

¹⁰ Lyatite soni kuti, “AMBUJE atite, ‘Tinjimpa yisukulu yejinji, yangaŵalanjika.’ ”

¹¹ Lilayikalyo lyatite soni kuti, “Sambano msigele panandi kukola mwanace jwamlume, timumpe lina lyakwe Ishimaeli, ligongo lya kuti AMBUJE akupikene kulila kwenu pa ndaŵi ja yipwetesi yenu.

¹² Mwanacejo tacikola mtima wa ucilombo, taciŵengana ni jwalijose, soni ŵandu tacimŵenga. Ni tacitama mwakuŵengana ni acalongo acimjakwe wosope.”

¹³ Nipo Hagala ŵaliwusisye jikape kuti, “Ana une nditu nam'weni Mlungu, ni nganimbwa?” Ni ŵamkolasile AMBUJE kuti ali, “Mlungu jwakusalola.”

¹⁴ Ni ligongo lyakwe ŵandu akusacikolanga cisima ca pasikati pa Kadeshi ni Beledi kuti “Cisima ca Jwa umi Jwakumbona Une.”

¹⁵ Nipo Hagala ŵamŵelecele Abulamu mwanace jwamlume, ni ŵamkolasile lina lyakwe Ishimaeli.

¹⁶ Abulamu ŵaliji ni yaka 86 pandaŵi jelejo.