Genesesi 15 - Chiyawo Bible

Cilanga ca Mlungu ni Abulamu

¹ Piyamasile yeleyi, maloŵe ga AMBUJE* gamyicile Abulamu mesomkulola kuti, “Mkasimjogopa Abulamu une tinamcenjele ku yindu yosope yakogoya, tinampe soni m'mwejo mbote jajikulungwa.”

² Nambo Abulamu ŵatite, “AMBUJE Mlungu, une jwangali ŵanace. Sambano yikomboleka uli ŵalakwe kumba une mbote? Mundu jwakwinjila lina lyangu ni Eliyesa jwa ku Damasiko.

³ AMBUJE nganimumba une ŵanace, myoyo jumo jwa acikapolo ŵangu ni jutacipocela cipanje cangu ni kwinjila lina lyangu.”

⁴ Jwalakwe ŵapikene AMBUJE ali mkumsalila kuti, “Mundu aju ngasajinjila lina lyenu, mwanace jwenu msyesyene ni jutacijinjila lina lyenu.”

⁵ Mlungu ŵajile najo kusa Abulamu ni ŵamsalile kuti, “Mŵalanje ndondwa syosope naga mpaka mpakombole kusiŵalanga syosope syene. Mwelemu ni mutiyiciŵela yisukulu yenu.”

⁶ Abulamu ŵakulupilile AMBUJE, nipo ligongo lya cikulupi cakwe, Mlungu ŵamŵeni Abulamu kuti ali jwagoloka.

⁷ Ni ŵatite kwa Abulamu, “Une ni AMBUJE junamtyosisye ku Ulu mcilambo ca Babiloniya kuti nampe cilambo aci kuti ciŵe cenu.”

⁸ Abulamu ŵajanjile kuti, “Ŵalakwe AMBUJE Mlungu, ana mpaka manyilile uli kuti cilambo celeci, kweli ticiciŵa cangu?”

⁹ AMBUJE ŵamsalile kuti, “Myice najo kwa une, ng'ombe jamkambako ja yaka yitatu, mbusi jamkambako ja yaka yitatu, ni ngondolo jamkolo ja yaka yitatu, njuŵa ni liwunda.”

¹⁰ Abulamu ŵayice nayo yinyama yosopeyo kwa Mlungu, ni ŵayikatenye cilikati. Ŵayiŵisile yiŵakatenyeyo mwakulolegana cine ni cijakwe, pa misela jiŵili. Nambo yijuni yila nginayikatanya cilikati.

¹¹ Yijuni yakolanjidwa matumbusi yayice kuti yilye nyama siŵawuleje sila, nambo Abulamu ŵayiŵinjile.

¹² Pilyakapilaga lyuŵa Abulamu, lwamyicilile lugono nipo wamkamwile woga wekulungwa.

¹³ AMBUJE ni ŵatite kwa Abulamu, “Mtame mlimkumanyilila kuti nditu yisukulu yenu tiyiciŵa acalendo mcilambo cacimsyene. Tiyiciŵa acikapolo kweleko, nipo tiyicitama kweleko mwakulaga kwa yaka 400.

¹⁴ Nambo mtundu ŵa ŵandu utacitenda yindu yeleyi, tinjiwupa cilango, nipo yisukulu yenuyo pakukopoka mcilambomo, tiyicijigala cipanje cejinji.

¹⁵ Nambo m'mwejo timcitama ni umi ndaŵi jelewu, nipo timciwa mwa mtendele. Tacimsika mwilembe mli ŵacekulupe mnope.

¹⁶ Yisukulu yenuyo tiyiciwujila soni akuno pali papite mipago mcece, ligongo ngasinatopola Aamoli mpakana ulemwa* wawo tiwuyikane pasyesyene kuti tapate cilango.”

¹⁷ Lyuŵa lili nakapilape nipo cipi cili citandite, mwacisisimucisya pawonece mpika wakusemula, pamo ni cenje cakolela moto, nipo yindu yiŵili yeleyi yapite pasikati pa nyama siŵawuleje sila.

¹⁸ Pa lisiku lyeleli ni pa ŵaŵisile AMBUJE cilanga* ni Abulamu, ŵatite, “Nguŵika cilanga kuti tinjipeleka kwa yisukulu yenu cilambo cosopeci, kutandila ku malile ga Iguputo mpaka ku lusulo lwa lwalukulungwa lwa Yufuleti.

¹⁹ Tinjapa soni cilambo ca Akeni, ca Akenisi, ca Akadimoni,

²⁰ ca Ahiti, ca Apelesi, ca Alefayimu,

²¹ ca Aamoli, ca Akenani, ca Agiligashi ni ca Ayebusi.”