Genesesi 11 - Chiyawo Bible

Sanja ja ku Babiloni

¹ Pandanda ŵandu wosope ŵa pa cilambo capasi ŵaliji mkuŵeceta ciŵeceto cimo, nipo ŵandu ŵaliji mkukamulisya masengo maloŵe ga ciŵeceto cimoco.

² Piŵasamile kwinjilila ca kungopoko lyuŵa, ŵajile kwika mwilambo line lyakwe lya ku Babiloniya ni ŵatamilicice kweleko.

³ Myoyo ŵasalilene ŵanduwo kuti, “Kwende tugumbe njelwa ni kusijoca.” Myoyo m'malo mwa maganga ŵajigele njelwa ni kusikamulisya masengo, ni ŵalitaŵile lipupalyo ni lipula m'malo mwa matope.

⁴ Ni ŵatite, “Kwende sambano tutaŵe msinda wetu, nipo sanja jakwe jilewupe mpaka kwinani. Naga tukutenda yeleyi tuciŵa ŵandu ŵakupikanika nditu, nipo ngasitubalalika soni pa cilambo capasi.”

⁵ Nipo AMBUJE* ŵatulwice kwisa kuwulola msindawo pamo ni sanjajo, jiŵaliji mkutaŵa ŵandu ŵala.

⁶ Ni AMBUJE ŵatite, “Sambano ŵanduŵa ali mtundu umo, soni akuŵeceta ciŵeceto cimo. Yindu yakutendayi ni kutanda kwa yindu yitaciyitenda. Kaneko tatendeje yindu yiliyose yitasaceje kuyicitenda.

⁷ Kwende tutuluce kuti tukacisokonesye ciŵeceto cawo kuti akusapikanganana jwine ni mjakwe.”

⁸ Myoyo AMBUJE ŵapwilingenye ŵandu pa cilambo capasi, nipo jemanjajo ŵalesile kutaŵa msindawo.

⁹ Myoyo msindawo ŵawupele lina lyakwe Babiloni,* ligongo kweleko AMBUJE ŵacisokonesye ciŵeceto ca pa cilambo capasi, nipo kutyocela kweleko AMBUJE ŵapwilingenye ŵandu pa cilambo cosope capasi.

Yisukulu ya Shemu

¹⁰ Ayi ni yipago yakuwumila kwa Shemu. Pali papite yaka yiŵili cili cimasile cigumula, Shemu ali jwa yaka 100, ŵakwete mwanace jwamlume lina lyakwe Alipakisadi.

¹¹ Ali apali Alipakisadi, Shemu ŵatemi yaka yine soni 500. Ni ŵakwete soni ŵanace ŵane ŵacalume ni ŵacakongwe.

¹² Pa ndaŵi jele Alipakisadi ŵaliji ni yaka 35, ŵakwete mwanace jwamlume lina lyakwe Shela.

¹³ Ali apagwile Shela, Alipakisadi ŵatemi yaka 403. Ni ŵakwete soni ŵanace ŵane ŵacalume ni ŵacakongwe.

¹⁴ Shela piŵaliji ni yaka 30 ŵakwete jwamlume lina lyakwe Eba.

¹⁵ Ali apagwile Eba, Shela ŵatemi soni yaka yine 403. Ni ŵakwete soni ŵanace ŵane ŵacalume ni ŵacakongwe.

¹⁶ Eba piŵaliji ni yaka 34 ŵakwete mwanace jwamlume lina lyakwe Pelegi

¹⁷ Ali apagwile Pelegi, Eba ŵatemi soni yaka yine 430. Ni ŵakwete soni ŵanace ŵane ŵacalume ni ŵacakongwe.

¹⁸ Pelegi piŵaliji ni yaka 30, ŵakwete mwanace jwamlume lina lyakwe Lewu.

¹⁹ Ali apagwile Lewu, Pelegi ŵatemi soni yaka yine 209. Ni ŵakwete soni ŵanace ŵane ŵacalume ni ŵacakongwe.

²⁰ Lewu piŵaliji ni yaka 32, ŵakwete mwanace jwamlume lina lyakwe Selugi.

²¹ Ali apagwile Selugi, Lewu ŵatemi soni yaka yine 207. Ni ŵakwete soni ŵanace ŵane ŵacalume ni ŵacakongwe.

²² Selugi piŵaliji ni yaka 30, ŵakwete mwanace jwamlume lina lyakwe Naholi.

²³ Ali apagwile Naholi, Selugi ŵatemi soni yaka yine 200. Ni ŵakwete soni ŵanace ŵane ŵacalume ni ŵacakongwe.

²⁴ Naholi piŵaliji ni yaka 29, ŵakwete mwanace jwamlume lina lyakwe Tela.

²⁵ Ali apagwile Tela, Naholi ŵatemi soni yaka yine 190. Ni ŵakwete soni ŵanace ŵane ŵacalume ni ŵacakongwe.

²⁶ Tela piŵaliji ni yaka 70, ŵaliji ali akwete ŵanace aŵa: Abulamu, Naholi ni Halani.

Yisukulu ya Tela

²⁷ Ayi ni yisukulu ya Tela. Tela ŵakwete ŵanace ŵacalume ŵatatu aŵa, Abulamu, Naholi ni Halani. Halani ŵakwete mwanace jwamlume lina lyakwe Loti.

²⁸ Halani ŵawilile mu msinda wakumangwawo lina lyakwe Ulu, mcilambo ca Babiloniya. Ŵawile baba ŵawo ali ciŵela umi.

²⁹ Abulamu ŵalombele Salayi, nipo Naholi ŵalombele Milika mwanace jwamkongwe jwa Halani juŵaliji soni babagwe jwa Isika.

³⁰ Salayi ŵaliji ŵangali ŵanace ligongo ŵaliji ŵangaŵeleka.

³¹ Tela ŵamjigele Abulamu mwanagwawo ni Loti cisukulu cawo, juŵaliji mwanace jwa Halani, ni Salayi mkwegwe gwawo, ŵamkwawo Abulamu. Ŵanyakwice ulendo kutyoka mu msinda wa Ulu, wa ku cilambo ca Babiloniya kuja ku cilambo ca Kenani. Nambo piŵayice ku Halani, ŵagambile kutamilicika kukoko.

³² Nipo Tela ŵawilile ku Halani kukoko ali ŵa yaka 205.