Genesesi 10 - Chiyawo Bible

Yisukulu ya Nowa

¹ Aŵa ni ŵanace ŵacalume ŵa Nowa: Shemu, Hamu ni Yafeti. Ŵanace ŵatatu ŵa Nowa ŵeleŵa ŵakwete nombe nawo ŵanace ŵawo, cili cimasile cikumba ca mesi cila.

² Ŵanace ŵacalume ŵa Yafeti ŵaliji Gomeli, Magogi, Madayi, Yafani, Tubali, Mesheki ni Tilasi.

³ Ŵanace ŵacalume ŵa Gomeli ŵaliji Ashikenasi, Lifati ni Togama.

⁴ Ŵanace ŵacalume ŵa Yafani ŵaliji, Elisha, Talishishi, Saipulasi, ni Dodanimu.

⁵ Jemanjaji ni ŵiŵaliji acinangolo ŵa ŵandu wosope ŵiŵatamaga mungulugulu nyasa ni pa yilumba ya m'Nyasa ja Mediteleniyani. Aŵa ni ŵanace ŵa Yafeti. Mitundu jawo jaliji jakulekanganalekangana, nipo ŵaliji mkutama myilambo yakulekanganalekangana. Nipo mtundu uliwose ŵaŵecetaga ciŵeceto cakwe.

⁶ Ŵanace ŵacalume ŵa Hamu ŵaliji, Kushi, Iguputo, Libiya ni Kenani.

⁷ Ŵanace ŵacalume ŵa Kushi ŵaliji Seba, Hafila, Sabita, Lama ni Sabiteka. Ŵanace ŵacalume ŵa Lama ŵaliji Siba ni Dedani.

⁸ Kushi ŵakwete soni mwanace jwamlume lina lyakwe Nimulodi, juŵaliji mundu jwa ngondo jwandanda jwamacili pa cilambo capasi.

⁹ Jwalakweju ŵaliji jwakusakula nyama jwamacili pameso pa AMBUJE. Ni ligongo lyakwe ŵandu akusaŵeceta citagu* cakuti, “M'mwejo mli jwakusakula nyama jwamacili pameso pa AMBUJE, mpela Nimulodi.”

¹⁰ Pandanda ucimwene wakwe wapwatikaga Babiloni, Eleki, ni Akadi jijili ku mcilambo ca Babiloniya.

¹¹ Jwalakweju ŵatyosile kweleko nipo ŵajawile ku cilambo ca Asiliya kuŵataŵile misinda ja Ninefe, Lehoboti Ili, Kala,

¹² ni msinda wa Leseni wele uli pasikati pa msinda wa Ninefe ni msinda wawukulungwa wa Kala.

¹³ Iguputo ŵaliji nangolo jwa ŵandu ŵa ku Lidiya, Anamimu, Lehabu, Nafutuhimu,

¹⁴ Patilusimu, Kasiluhimu ni Kilete, jemanjaji ŵaliji acinangolo ŵa Afilisiti.

¹⁵ Kenani ŵaŵelece mwanace jwakwe jwandanda lina lyakwe Sidoni, ni ŵaŵelece soni jwine lina lyakwe Heti.

¹⁶ Kenani ŵaliji soni nangolo jwa ŵandu ŵa mtundu wa Ayebusi, Aamoli, Agiligashi,

¹⁷ Ahifi, Aaliki, Asini,

¹⁸ Alifadi, Asemali ni mtundu wa Ahamati. Msogolo mwakwe mtundu wa Akenani wabalalikangene posepose,

¹⁹ mpaka ku malile ga Kenani. Malilego gatandilile ku Sidoni kwinjililaga ku Gelali mpaka ku Gasa ni kwinjilila soni ku Sodomu, Gomola, Adima ni Seboyimu mpaka ku Lasha.

²⁰ Jemanjaji ni ŵaliji ŵanace ŵa Hamu, nipo ŵatamaga m'yilambo yakulekanganalekangana, mpela mwa mitundu jawo. Mtundu uliwose ŵaŵecetaga ciŵeceto cakwe.

²¹ Shemu mkulugwe jwa Yafeti ŵaliji nangolo jwa ŵanace wosope ŵakupagwa mwa Eba.

²² Ŵanace ŵacalume ŵa Shemu ŵaliji Elamu, Ashuli, Alipakisadi, Ludi ni Alamu.

²³ Ŵanace ŵacalume ŵa Alamu ŵaliji Usi, Huli, Getele ni Mesheki.

²⁴ Alipakisadi ŵaliji mtatigwe jwa Shela, nipo Shela ŵaliji mtatigwe jwa Eba.

²⁵ Eba ŵakwete ŵanace ŵaŵili ŵacalume, jwine lina lyakwe ŵaliji Pelegi, ligongo mu ndaŵi ja umi wakwe ŵandu wosope ŵa pa cilambo capasi ŵagaŵikene ligongo lyakulekangana yiŵeceto ni ŵatemi m'yilambo yakulekangana. Mwanace jwakwe jwine ŵaliji lina lyakwe Yokitani.

²⁶ Yokitani ŵaliji nangolo jwa ŵandu ŵa mtundu wa Alimodadi, Shelefi, Hasamafeti, Yela,

²⁷ Hadolamu, Usali, Dikila,

²⁸ Obala, Abimayele, Sheba,

²⁹ Ofili, Hafila ni Yobabu. Wosopeŵa nangolo jwawo ŵaliji Yokitani.

³⁰ Cilambo cawo ciŵatamaga catandilile ku Mesha kwinjililaga ku Sefa cilambo ca matumbi ca kungopoko lyuŵa.

³¹ Jemanjaji ni ŵaliji yisukulu ya Shemu. Mitundu jawo jaliji jakulekanganalekangana, ŵaliji mkutama m'yilambo yakulekangana. Mtundu uliwose ŵaŵecetaga ciŵeceto cakwecakwe.

³² Ŵandu wosopeŵa ŵaliji yisukulu ya Nowa. Pakuya acinangolo ŵawo ni mtundu wawo. Mitundu josope ja pa cilambo capasi jakopwece mwa mitundu ja lukosyo lwa Nowa jweleju, cili cimasile cikumba cila.