Genesesi 1 - Chiyawo Bible

Mbili jakupanganyidwa kwa yindu yosope

¹ Pandanda Mlungu ŵapanganyisye kwinani ni cilambo capasi.

² Ndaŵi jeleji cilambo capasi caliji cangali upanganyikwe wine uliwose, soni caliji cangali kandu kalikose ka umi. Cipi cawunicile mesi gagagumbele posepose, Msimu wa Mlungu ŵaliji mkwendajenda pacanya pa mesigo.

³ Kaneko Mlungu ŵatite, “Kulanguce,” ndaŵi jijojo kwalangwice.

⁴ Mlungu ŵakuweni kulangukako kuti kwaliji kwambone. Jwalakwe ŵakulekangenye kulangukako ni cipi.

⁵ Kulangukako ŵakupele lina lyakuti musi, ni cipi cila ŵacipele lina lyakuti cilo. Nipo kwaswele, soni ni kwacele, ali lyaliji lisiku lyandanda.

^6-7 Kaneko Mlungu ŵatite, “Paŵe cakulekanganya mesi, kuti mesigo gaŵe pa malo gaŵili gakulekangana.” Myoyo Mlungu ŵapanganyisye cakulekanganya mesi, ni calekangenye mesigo gane galiji kusi, gane galiji pacanya pakwe, nipo yatendece myoyo.

⁸ Cakulekanganya mesico ŵacipele lina lyakuti liwunde. Nipo kwaswele, soni ni kwacele, ali lyaliji lisiku lyaŵili.

⁹ Kaneko Mlungu ŵatite, “Mesi gagali kusi kwa liwunde gaŵe pa malo gampepe, kuti uwonece mkuli,” nipo yatendece myoyo.

¹⁰ Mlungu ŵawupele mkuliwo lina lyakwe Cilambo, mesi gaŵagaŵisile malo gampepe gala, ŵagapele lina lyakwe Nyasa. Mlungu ŵayiweni kuti yaliji yambone yiŵapanganyisyeyo.

¹¹ Nipo Mlungu ŵatite, “Cilambo cimele yakumela yakusogola songolo, ni soni yitela yakusogola yisogosi yana mbele, mpela mwa mitundu jakwe jakulekanganalekangana,” nipo yatendece myoyo.

¹² Myoyo pa cilambo pamesile yakumela yamitundu josope, yakumela yakusogola songolo, ni yitela yakusogola yisogosi, mpela mwa mitundu jakwe jakulekanganalekangana. Mlungu ŵayiweni kuti yaliji yambone yiŵapanganyisyeyo.

¹³ Nipo kwaswele soni ni kwacele, ali lyaliji lisiku lyatatu.

¹⁴ Kaneko Mlungu ŵatite, “Kwiwunde kuŵe yakumulicila, kuti yilekanganyeje musi ni cilo, ni soni kuti yiŵe yilocesyo ya ndaŵi, yaka ni masiku.

¹⁵ Yakumulicilayi yiŵe kwinani kuti yimulicileje cilambo capasi,” nipo yatendece myoyo.

¹⁶ Mlungu ni ŵapanganyisye yakumulicila yayikulungwa yiŵili, lyuŵa kuti limulicileje musi ni mwesi kuti umulicileje cilo. Ni ŵapanganyisye soni ndondwa.

¹⁷ Mlungu ŵayiŵisile yakumulicilayi kwinani, kuti yimulicileje cilambo capasi,

¹⁸ kuti yimuliceje musi ni cilo, kulekanganya lilanguka ni cipi. Mlungu ŵayiweni kuti yaliji yambone.

¹⁹ Nipo kwaswele, soni kwacele, ali lyaliji lisiku lya mcece.

²⁰ Kaneko Mlungu ŵalamwile kuti, “M'mesi muŵe ya umi yejinji yakulekanganalekangana, nipo paŵe yijuni yakuguluka mwinani.”

²¹ Myoyo Mlungu ŵapanganyisye somba syasikulungwa sya m'nyasa, pamo ni yakupanganyidwa yine yakutama m'mesi, ni soni yijuni yakuguluka yine yosope ya mitundu mitundu. Nipo Mlungu ŵayiweni kuti yosope yiŵapanganyisye yaliji yambone.

²² Ŵayipele upile pakusala kuti mŵelekane mgumbale m'nyasa, nombe yijuni yiŵelekane pa cilambo.

²³ Nipo kwaswele, soni ni kwacele, ali lyaliji lisiku lya msano.

²⁴ Nipo Mlungu ŵatite, “Cilambo capasi cikole yinyama ya mitundumitundu, yakulanga, yakwaŵa, ni yinyama ya mwitinji ya mitundumitundu.” Ni yatendece myoyo.

²⁵ Mlungu ŵapanganyisye yinyama ya mwitinji ya mitundumitundu, ni yakulanga ya mitundumitundu ni yosope yakwaŵa ya mitundumitundu. Mlungu ni ŵayiweni kuti yaliji yambone.

²⁶ Piyamasile yeleyi Mlungu ŵatite, “Kwende tupanganye ŵandu mcilandanicisyo cetu, kuti taŵe mpela Uweji. Kuti alamulile somba sya m'nyasa, yijuni ni yinyama yosope ya pa cilambo capasi, yakulanga ni ya mwitinji, ni yinyama yiliyose yakwaŵa ya pa cilambo capasi.”

²⁷ Myoyo Mlungu ŵapanganyisye ŵandu mciwanicisyo cakwe. Ŵapanganyisye jwine jwamlume ni jwine jwamkongwe.

²⁸ Ŵapele upile ŵanduwo pakwasalila kuti, “Mŵelekane, mtupe, mgumbale mcilambo capasi, mcilamulile. Ngumpa ulamusi pa somba sya m'nyasa ni yijuni, ni yinyama yosope ya pa cilambo capasi.”

²⁹ Mlungu ŵatite, “Ngumpa yakumela yosope yakusogola songolo yayili pa cilambo capasi, ni mtundu uliwose wacitela wakusogola yisogosi yana songolo, kuti mlyeje yeleyo.

³⁰ Nambo yinyama yosope ya pa cilambo capasi ni yijuni yosope ni yinyama yakwaŵa yosope ya pa cilambo capasi, nayipele manyasi ni masamba kuti yilyeje,” ni yatendekwe myoyo.

³¹ Mlungu ŵayiweni kuti yosope yiŵayipanganyisyeyo yaliji yambone mnope. Nipo kwaswele soni ni kwacele, ali lyaliji lisiku lya msano ni limo.