Filimoni 1 - Chiyawo Bible

¹ Cikalataci cikutyocela kwa une Paulo, jwandili mu ukayidi ligongo lya Klistu* Yesu,* nipo soni cikutyocela kwa Timoteo mlongo mjetu. Tukumlembela m'mwejo Filimoni, jwakunonyelwa jwetu soni jwakutumicila mjetu,

² ni kwa Afiya, mlumbugwetu, ni kwa Akipasi, msilikali mjetu jwakuputa ngondo ja Mlungu, nipo soni mpingo* wosope wele ukusasongana m'nyumba mwenu.

³ Umbone mtima ni mtendele yakutyocela kwa Mlungu Atati ŵetu ni kwa Ambuje Yesu Klistu yiŵe ni jemanja.

Ya cinonyelo ca Filimoni ni cikulupi cakwe

⁴ Mlongo mjangu Filimoni, ngusinamtogolela Mlungu jwangu ndaŵi syosope katema kingusinamkumbucila m'mwejo m'mapopelo gangu.

⁵ Pakuti ngupikana kuti mkisanonyela ni kulupilila Ambuje Yesu, ni ŵane ŵaswela wosope ŵa Mlungu.

⁶ Ngasapopela kuti cikulupi cele cimkugaŵana nawo cikamule masengo mwamacili, kuti m'manyilile yambone yosope yele yitukusapocela ligongo lya Klistu.

⁷ Mlongo mjangu, cinonyelo cenu cisangalesye mnope ni kuwutamilikasya mtima wangu pasi, pakuti mjisisimwisye mitima ja ŵandu wosope ŵa Mlungu.

Paulo akumŵendela Onesimo

⁸ Kwa ligongo lyeleli, ngwenela kuŵa jwakulimba mtima, mpela mlongo mjenu mwa Klistu, pakumlamula m'mwejo yele yimkwenela kuyitenda.

⁹ Nambo pakuti ligongo ngusinamnonyela m'mwejo, m'malo mwakwe ngusingamba kumŵenda, une Paulo jundili jwakutumicila jwa Klistu soni jundili mu ukayidi sambano ligongo lya Klistu Yesu.

¹⁰ Myoyo ngumŵenda m'malo mwa Onesimo, mwanangu mwa Klistu; jwele junatesile mpela namŵelece ndili mu ukayidi muno.

¹¹ Kala jwaliji jwangali masengo kwenumwe, nambo sambano ali jwakusosekwa mnope kwa uwe wosopewe.

¹² Ngumtumisya soni jwalakwejo kwenumwe sambano, nipo soni pakutenda myoyo ndesile mpela kumtumicisya mtima wangu wene.

¹³ Ni nganonyele kuti atameje ni une akuno, kuti angamucisye m'malo mwenu, pakuti ndili mu ukayidi ligongo lya Ngani Syambone.*

¹⁴ Ngangusaka kumkanganicisya kuti mungamucisye une, nambo ngusaka kuti mwasyene myitende mwakusaka kwenu. Myoyo une ngaŵa mkutenda kandu kalikose mpaka mli mjiticisye.

¹⁵ Mwine Onesimo ŵagambile kwa ndaŵi japanandi, kuti timŵe najo kwandaŵi syosope.

¹⁶ Nipo sambano ngaŵa mpela kapolo iyayi, nambo kusyesyene mpela mlongo mjetu jwakunonyelwa. Une ngusinamnonyela mnope nipo m'mwejo mkwenela kumnonyela mwakupundanganya mnope, pakuti ali mundu mjenu nipo soni mlongo mjenu mwa Klistu.

¹⁷ Myoyo naga mkunganicisya une kuti ndili mjenu, mumpocele jweleju mpela mwele mumkambocelele une.

¹⁸ Naga ŵamlemwecesye, kapena akwete ngongole ni m'mwejo, ngongolejo jiŵe jangu.

¹⁹ Sambano maloŵe aga ngulemba ni mkono wangu kuti, “Une Paulo tinjilipila.” Nambo soni ngangwenela kumkumbusya kuti m'mwejo mkwete ngongole ni une jele jajili umi wenu waciklistuwu.

²⁰ Sambano mlongo mjangu, mungamucisye none jwakwe ligongo lya Ambuje. Musangalasye mpela mlongo mjenu mwa Klistu.

²¹ Ngumlembela yeleyi ligongo lyakuti ngukulupilila kuti timciyitenda yingumŵendayi. Soni ngumanyilila kuti timciyitenda kupunda yele yinamŵendileyi.

²² Nambo soni mungolocesye malo gakutama une, ligongo ngukulupilila kuti Mlungu tacigapikana mapopelo ga jemanja wosope, ni kumbucisya une kwa jemanja.

Maloŵe gambesi

²³ Akupeleka moni Epafula, jwele jwali mu ukayidi pampepe ni une ligongo lya Klistu Yesu.

²⁴ Akuti soni moni acimjangu ŵangukamula nawo masengo, Maliko,* Alisitaliko, Dema ni Luka.

²⁵ Umbone mtima wa Ambuje Yesu Klistu utame ni jemanja wosope.