Esitele 9 - Chiyawo Bible

Ayuda ŵawuleje amagongo ŵawo

¹ Lisiku lya 13 lya mwesi wa 12 wa Adala lyakwanile, kuti lilamusi lya mwenye lila litande kukamula masengo, lyeleli lyaliji lisiku liŵasakaga amagongo ŵa Ayuda kwawulaga Ayudawo, nambo yindu yasindile. M'malo mwakwe, Ayudawo ni ŵiŵatandite kwajonanga amagongo ŵawowo lisiku lilyolyo.

² Ayudawo ŵasongene m'misinda jawo mu ma upande gosope ga Mwenye Ahasuwelo kuti amwulaje jwalijose juŵasakaga kwatendela cipongwe jemanjajo. Paliji pangali jwalijose juŵapakombwele kulimbana nawo, pakuti ŵandu ŵa mitundu josope ŵajogopaga Ayudawo.

³ Acakulungwakulungwa ŵa m'madela gosope, ŵakulamulila, ni acibwanamkubwa ni acakulungwakulungwa ŵa boma ŵakamwisye Ayuda ligongo lyakuti ŵamjogopaga mnope Modekayi.

⁴ Jwalijose jwamanyilile kuti Modekayi ŵaliji mundu jwamkulungwa jwa ku nyumba ja mwenye nipo kupikanika kwawo kwajenele mu maupande gosope, pakuti ulamusi wakwe waliji wamacili.

⁵ Myoyo Ayuda ŵawuleje amagongo ŵawo wosope ni upanga, ni kwajonanga wosope ŵene mwangali canasa muŵasacilaga jemanjajo.

⁶ Ku Susa, likulungwa lya cilamboco, Ayuda ŵawuleje ŵandu 500 nambo jemanjajo nginajigala katundu jwalijose jujwaliji jwa ŵandu ŵiŵawulajidwewo.

^7-10 Sikati ja ŵandu ŵiŵawulajidwewo ŵapali ŵanace likumi ŵacalume ŵa Hamani mwanace jwa Hamedata, m'magongo jwa Ayuda: Mena gawo galiji Palishandata, Dalifoni, Asipalata, Polata, Adaliya, Alidata, Palimashita, Alisayi, Alidayi, ni Faisata.

¹¹ Lisiku lilyolyo, mwenye ŵapikene ya ciŵalanjilo ca ŵandu ŵiŵawulajidwe ni Ayuda ku Susa likulungwa lya cilamboco.

¹² Kaneko mwenye ŵasalile Esitele kuti, “Ku Susa likulungwa lya cilamboci, Ayuda awulejeko ŵandu 500, kupwatikapo ŵanace 10 ŵacalume ŵa Hamani. Nambi m'maupande gosope gene ga mwenye, kanga akwanisye kwawulaga ŵandu ŵalingwa? Ana mkusaka cici? Cimkusakaco ticicipegwa kwa m'mwejo. Nambi sambano mkusaka soni cici?”

¹³ Pelepo Esitele ŵamjanjile mwenyejo kuti, “Naga yili yakwanonyelesya wawo mwenye, ŵakunde Ayuda ŵakutama ku Susa kuti atende soni yatesile leloyi pakukuya lilamusi. Nipo mitembo likumi ja ŵanace ŵacalume ŵa Hamani jila jikolecedwe pa citela.”

¹⁴ Myoyo mwenye ŵalamwile kuti yeleyi yitendekwe, nipo ŵajenesye lilamusi lila ku Susa. Mitembo ja ŵanace ŵacalume likumi wa Hamani jila ŵajikolece pa citela.

¹⁵ Ayuda ŵiŵatamaga ku Susa ŵala, ŵasongene soni malo gamo pa lisiku lya 14 lya mwesi wa Adala* nipo ŵawuleje ŵandu ŵane soni ŵakwana 300 ku Susako. Nambo nganajigala kandu kalikose kikaliji ka amagongo ŵawo.

¹⁶ Ayuda ŵane ŵiŵaliji mcilambomo nombe nawo ŵasongene malo gamo kuti alicenjele acimsyene. Jemanjajo ŵajonasile amagongo ŵawo ŵala pakuwulaga ŵandu ŵaŵengeneje nawo ŵakwana 75,000, nambo nganajigala kalikose kikaliji ka amagongo ŵawo.

¹⁷ Yeleyi yatendekwe pa mwesi wa 13 wa Adala, pa lisiku lya 14 jemanja ŵapumwile, nipo ŵalitesile kuŵa lisiku lya cindimba ni kusangalala.

¹⁸ Nambo Ayuda ŵiŵatamaga ku Susa ŵasongene malo gamo pa lisiku lya 13 ni lya 14 lya mwesi wa Adala, nipo ŵapumwile pa lisiku lya 15 ni likulitenda lisikuli kuŵa lya cindimba ni kusangalala.

¹⁹ Ali ni ligongo lyakwe Ayuda ŵa m'madela ga m'misi akusakumbucila lisiku lya 14 lya mwesi wa Adala mpela lisiku lyakusangalala ni lya cindimba soni lya kupumula ngakamula masengo. Pa lisiku lyeleli ŵatumicisyanaga mituka ja yakulya kwa jwine ni mjakwe.

Cindimba ca Pulimu

²⁰ Kaneko Modekayi ŵalembile yiyatendekweyo, nipo ŵatumisye yikalata kwa Ayuda wosope ŵiŵatamaga mcilambo ca Mwenye Ahasuwelo.

²¹ Ŵasalile jemanjajo kuti akumbucileje lisiku lya 14 ni 15 lya mwesi wa Adala caka ni caka.

²² Pakuti gelega galiji masiku giŵakulupwice Ayuda kutyocela kwa amagongo ŵawo, nambo soni waliji mwesi wakuti canasa cawo cagalawice kuŵa lukondwa. Ŵasalile soni kuti masiku gelego atendeje cindimba ni kusangalala pakutumicisyana mituka ja yakulya kwa jwine ni mjakwe ni kwa ŵandu ŵakulaga.

²³ Myoyo Ayuda ŵakuyisye yiŵalembile Modekayi mu cikalata cakwe cila, nipo ŵajiticisye kuti jemanjajo tatendeje cindimbaci caka ni caka mpela msyungu wawo.

²⁴ Hamani m'Agagi ŵaliji mwanace jwa Hamedata, soni m'magongo jwa Ayuda wosope. Jwalakweju piŵaganisiye ya ciswamba cakuti ŵawulaje Ayuda wosope, jwalakwejo ŵalondwele cisango ca Pulimu* ni cakulinga cakuti asimane lisiku lyakuti ŵawulaje Ayudawo.

²⁵ Nambo Esitele ŵajile kwa mwenye, nipo mwenye ŵalamwile kupitila mu cikalata ciŵalembile kuti ciswamba ca Hamani casacileje kwatendela Ayuda, cawujile asyenewo, nambo soni kuti Hamanijo pamo ni ŵanace ŵakwe ŵacalume akolecedwe pa citela.

²⁶ Ali ni ligongo lyakwe masiku gelega akusagakolangaga kuti Pulimu. Ligongo lya yosope yiyalembedwe mcikalatamo, nambo soni ligongo lya yiŵawonecele jemanjajo.

²⁷ Ayudawo ŵalipanganyicisye acimsyene lilamusi, ni kwa yisukulu yawo, ni jwalijose juŵaŵele m'Yuda, kuti wosope akalepelega kugakumbucila masiku gaŵiliga, pakukuya yiyalembedwe mcikalata ca Modekayi cila soni ndaŵi jakwe jakutenda yeleyi caka ni caka.

²⁸ Masiku gelega gakumbucilidweje ni mipago josope m'maŵasa gosope ga Ayuda, mcilambo cilicose ni mu msinda uliwose.

²⁹ Kaneko Esitele mwanace jwamkongwe jwa Abihayilo pamo ni m'Yuda jula Modekayi nombe nawo ŵalembile cikalata cine ni ulamusi wosope kuti asimicisye pa ya cikalata caŵili cicasalaga ya Pulimu.

³⁰ Yikalatayo ŵayitumisye kwa Ayuda wosope ku madela gosope 127 ga cilambo ca Mwenye Ahasuwelo. Yikalatayo yasalaga ya mtendele ni kulupicika,

³¹ kuti masiku ga Pulimu gakumbucilidweje mu ndaŵi jakwe, pakukuya yiŵaŵecete Modekayi ni Esitele ŵamkwawo mwenye ya kwalamula Ayuda. Agakumbucileje masiku gelega pakukuya malamusi giŵaliŵicile acimsyene ni yisukulu yawo, gakwamba kulijima kulya* ni kulila kwawo.

³² Lilamusi lya Esitele ŵamkwawo mwenye, ni lilyasimicisye ya Pulimu, nipo lyalembedwe m'buku.