Esitele 8 - Chiyawo Bible

Ayuda ŵasalile kuti awucisye cipongwe

¹ Pa lisiku liŵawulajidwe Hamani, Mwenye Ahasuwelo ŵapele Esitele katundu josope jwa Hamani, m'magongo jwa Ayuda jula. Kutyocela pelepo Modekayi ŵayice pameso pa mwenye, pakuti Esitele ŵaliji ali ŵasalile mwenye ya ulongo uwapali sikati ja welewo ni Modekayi.

² Mwenye ŵawusile mbete jakusindicisya jiŵamsumwile Hamani nipo ŵajipelece kwa Modekayi. Kaneko Esitele ŵamŵisile Modekayi kuti jwalakwe aŵe jwakulolela katundu jwa Hamani.

³ Esitele ŵaŵecete soni ni mwenye, ŵaliponyisye pasi pa sajo sya mwenye, ni ŵamŵendile mwenyejo aku jwalakwejo ali mkulila. Jwalakwe ŵamŵendile mwenye kuti alekasye malindi gangalumbana giŵasakaga Hamani jwa mwiŵasa lya Agagi kwatendela Ayuda gala.

⁴ Kaneko mwenye ŵamlanjisye Esitele ni simbo jakwe ja ucimwene ja golidi,*

⁵ nipo jwalakwejo ŵajimwice, ni ŵajile kukwima pameso pa mwenye, ni ŵatite kuti, “Naga wawo anonyele une, soni ngwasangalasya wawo, nambo soni naga cindu cingusosa kuŵenda uneco cili cambone kwa wawo, lilembedwe lilamusi lya kucenga maloŵe ga mu cikalata ca Hamani mwanace jwa Hamedata, jwa mwiŵasa lya Agagi muŵalembile kuti Ayuda wosope ŵakutama mcilambo cosope ca ŵalakwe mwenye awulajidwe.

⁶ Nambi tinipakombole uli kupilila, ndili mkuliwona likungu lyalikwisa kwa ŵandu ŵa mtundu wangu? Kapena kuti ana tinipakombole uli kupilila acalongo acimjangu ali mkuwulajidwa?”

⁷ Kaneko Mwenye Ahasuwelo ŵamsalile Esitele, pamo ni Modekayi m'Yuda jula kuti, “Mlole, Une ndamwile kala kuti Hamani akolecedwe pa citela soni mbelece katundu jwawo kwa Esitele, ligongo lya malindi giŵatesile Hamaniwo gakusaka kwawulaga Ayuda.

⁸ Sambano ngumpa ukumu wakuti mlembe mumkusacila mwasyene lilamusi lyakwakwaya Ayuda mu lina lya mwenye nipo msindicisye ni mbete ja mwenye kuti likasindidwa soni.”

⁹ Yeleyi yatendekwe pa lisiku lya 23 lya mwesi watatu wa Sifani.* Lilamusilyo lyalembedwe pakukuya yiŵalamwile Modekayi kwa Ayuda. Ŵalembele ŵakulamulila, acibwanamkubwa ni acakulungwakulungwa ŵa ma upande gosope 127 kutyocela ku Indiya mpaka ku Ifiyopiya. Ku upande uliwose ŵalembeleko cikalata ni kwa ŵandu wosope mu yiŵeceto yawo, nambo soni kwa Ayuda mu ciŵeceto cawo.

¹⁰ Ŵalembile mu lina lya Mwenye Ahasuwelo nipo ŵasindicisye ni mbete jawo. Kaneko utenga uwalembedwewo ŵawutumisye ni ŵa mitenga ŵiŵakwelaga mahaci gakuwutuka mnope gakutyocela mwicinga lya mwenye.

¹¹ Mu yikalatamo, mwalembedwe kuti, mwenye ŵapele ukumu Ayuda ŵiŵatamaga m'misinda jesope kuti asongane ni kulicenjela acimsyene. Naga akwika asilikali ŵa cilambo cine kukwatanda Ayudawo, jemanjajo awucisye ni kwajonanga amagongowo pakwawulaga ni kujigala katundu jwawo.

¹² Yeleyi yaliji yakuti yitendekwe m'madela gosope ga ku Pelesiya pa lisiku liŵasagwile kuti Ayuda awulajidwe, lisiku lya 13 lya mwesi wa 12 wa Adala.

¹³ Yeleyi yaliji yakuti yijenesyedwe kwa ŵandu ŵa mitundu jesope mu upande uliwose, kuti Ayuda aŵe tayale kuti ŵawucisye mbusyo amagongo ŵawo pa lisiku lyelelo.

¹⁴ Mwenye piŵalamwile ŵamitengawo, jemanjajo ŵakwesile mahaci gakuwutuka ga mwenye gala. Lilamusilyo ŵalijenesye ku Susa, likulungwa lya cilamboco.

¹⁵ Modekayi ŵatyosile ku nyumba ja mwenyejo ali awete yakuwala ya ucimwene yeswela mwine mwa buluwu ni cisoti ca ucimwene ca golidi. Ŵawete soni mkanjo wa bafuta wecejewu, nipo ŵandu ŵa mu msinda wa Susa ŵaliji ŵakusangalala ni ŵakondwa.

¹⁶ Ayuda ŵaliji ŵakondwa nipo ŵandu ŵacimbicisidwaga.

¹⁷ Mu upande ni mu msinda uliwose kukwajenesyedwe lilamusi lya mwenye lila, Ayuda ŵapumwile pa lisiku lyelelo nipo ŵatesile cindimba ni ŵasangalele. Pa lisiku lyelelo ŵandu ŵajinji ŵa mitundu jine jijatamaga mcilambomo jatandite kulikolanga acimsyene kuti Ayuda, ligongo lyakuti ŵajogopaga Ayudawo.