Esitele 7 - Chiyawo Bible

¹ Myoyo mwenye pamo ni Hamani ŵajile ku kulya ku cindimba cele ciŵalinganyisye Esitele cila.

² Pa lisiku lyaŵili lya cindimbaco, mwenye piŵaliji mkumwa finyo, ŵamwusisye Esitele kuti, “Ana m'mwe Esitele ŵamkwawo mwenye mkusaka cici? Musalilani, nipo ticipegwe kwa m'mwejo. Atamose mbali jimo ja cilambo cangu tinjimpa m'mwejo.”

³ Esitele ŵajanjile kuti, “Naga wawo anonyele une, ni kusangalasidwa ni une, ngwaŵenda kuti awukulupusye umi wangu ni umi wa ŵandu ŵangu kuti tuŵe cijumi.

⁴ Pakuti mundu jwine atusumisye, une pamo ni ŵandu ŵangu kuti tuwulajidwe. Akatusumisye mpela acikapolo, ngamkanimbeceta cilicose, pakuti yisawusyo yetu ngimkiniyiŵa yakuti wawo mwenye alajeje nayo.”

⁵ Kaneko Mwenye Ahasuwelo ŵamwusisye Esitele kuti, “Ana ŵani ŵakusaka kutenda yeleyi? Ana mundu jweleju ali kwapi?”

⁶ Esitele ŵajanjile kuti, “M'magongo jwetu ni Hamaniju, jwakutulagasya uwe, jwakusakala mtimaju.” Kaneko Hamani ŵakamwilwe ni woga pameso pa mwenye ni ŵamkwawo.

⁷ Myoyo mwenye ŵajimwice ali atumbile mnope, ŵatyosile mcipindamo nipo ŵakopwece pasa kwawula ku mgunda wa ku nyumba ja mwenye. Hamani ŵamanyilile kuti jwalakwejo tapegwe cilango ni mwenye, myoyo ŵasigele kuti ŵaŵende ŵamkwawo mwenye kuti akulupusye umi wa Hamaniwo.

⁸ Mwenye piŵajinjile mcipinda muŵamwelaga finyo mula kutyocela ku mgunda wa ucimwene ula, ŵamsimene Hamani ali aligwisisye pa cindanda piŵaliji Esitele, ni cakulinga cakuti aŵende cikululucilo. Mwenye piŵayiweni yeleyi ŵatite, “Aa! Ana mundu jweleju akusaka kutenda msangu ni ŵamkwangu une ndili panopano, m'nyumba mwangu muno?” Mwenye mkinamalisye kuŵeceta maloŵe gelega, ŵakutumicila ŵacele ŵa mwenye ŵayice nipo ŵajiwunicile ngope ja Hamani.

⁹ Kaneko jumo jwa ŵakutumicila ŵa mwenye lina lyakwe Halibona, ŵatite kuti, “Konjecesya pelepa, Hamani apanganyisye yitela yakuti amwulajilepo Modekayi, pakumkoleka pelepo, mundu juŵakulupwisye umi wa wawo mwenye. Ulewu wakwe uli mamita 23, nipo yitela yeleyi ayisamilisye ni nyumba jawo.”

¹⁰ Kaneko mwenye ŵalamwile kuti, “Jawulani mkakolece Hamani pelepo.” Myoyo ŵanduwo ŵamkolece Hamani pa yitela yiŵapanganyisye Hamani kuti amkolecepo Modekayi. Kaneko lutumbilo lwa mwenye lwamasile.