Esitele 5 - Chiyawo Bible

Esitele ŵaŵilasile mwenye ni Hamani ku cindimba

¹ Pigamasile masiku gatatu Esitele ali mkulijima kulya, ŵelewo ŵawete yakuwala yakulosya kuti ŵaliji ŵamkwawo mwenye nipo ŵajile kukwima mkati mwa luŵala lwa nyumba ja mwenye, lulwalolegene ni mlango wakwinjilila ku cipinda cekulungwa kucatamaga citengu ca mwenye. Mwenye ŵatemi pa citengu cakwe ca ucimwene mkati mwa cipindaco muŵaliji mkukamulila masengo gakwe ga ucimwene.

² Mwenye piŵam'weni Esitele ali ajimi mu luŵalamo, mwenyejo ŵamnonyele jwalakwejo nipo ŵamlanjisye Esitele ni simbo jakwe ja ucimwene ja golidi* jijaliji myala mwakwe. Kaneko Esitele ŵaŵandicile, nipo ŵakwayiye ku songa kwa simbojo.

³ Mwenye ŵamwusisye jwalakwejo kuti, “Ana citendecekwe kwa m'mwejo ni cici? Ana mkusaka cici? Moselilani une, nipo tinjimpa atamose mbali jimo ja cilambo cangu.”

⁴ Esitele ŵajanjile kuti, “Naga yili yakwasangalasya wawo mwenye, ayice pamo ni Hamani lelo jino ku cindimba citinalinganyicisye wawo mwenye.”

⁵ Kaneko mwenye ŵasalile ŵakutumicila ŵakwe kuti akamjigale Hamani mwacitema, kuti akaŵe acalendo ŵa Esitele. Myoyo mwenye pamo ni Hamani ŵapite ku cindimba ca Esitele.

⁶ Pandaŵi jiŵaliji mkumwa finyo, mwenye ŵawusisye Esitele kuti, “Ana mkusaka cici? Cimkusakaco ticipegwe kwa m'mwejo. Nambi mkusaka cici? Atamose mbali jimo ja cilambo cangu, tinjimpa m'mwejo.”

⁷ Esitele ŵajanjile kuti, “Cakusaka cangu ni kuŵenda kwangu kuli kwakuti:

⁸ Naga wawo anonyele une mnope, ni akusaka kumba yimbendile une, conde ayice soni malaŵi pamo ni Hamani ku cindimba citinjalinganyicisya wawo. Pandaŵi jelejo tinjasalila yingusaka une.”

Hamani akutenda malindi kuti amwulaje Modekayi

⁹ Nipo Hamani ŵapite mwa lukondwa nambo soni ni mtima wakusengwa. Nambo piŵam'weni Modekayi pa Cipata ca Mwenye kuti ngakwima kapena kutetemela pameso pa Hamanijo kulosya ucimbicimbi, ŵapilile mtima Modekayiwo.

¹⁰ Atamose kuti yaliji myoyo, Hamani wapwele mtima, piŵayice kumangwawo ŵaŵilasile acimjawo pamo ni Seleshi ŵamkwawo.

¹¹ Hamani ŵasalile jemanjajo ya kusicila kwawo, ciŵalanjilo ca ŵanace ŵacalume wiŵakwete, muŵamkwecesye mwenye jwalakwejo, ni muŵaŵelele kwapunda acakulungwa ni ŵakutumicila ŵa mwenye.

¹² Hamani ŵapitilisye soni kuŵeceta kuti, “Atamose Esitele ŵamkwawo mwenye nganakunda kuti mundu jwalijose alongane ni mwenye ku cindimba ciŵalinganyisye Esitelewo, nambo unepe basi. Ŵelewo ambilasile soni une pamo ni mwenye ku cindimba cine.

¹³ Nambo yosopeyi ngayikusangalasya une, camnope pingumwona Modekayi m'Yudaju ali mkutama pa cipata cakwinjilila ku nyumba ja mwenye ndaŵi syosope.”

¹⁴ Myoyo Seleshi ŵamkwawo Hamani, pamo ni acimjawo wosope ŵamsalile Hamanijo kuti, “Mpanganye yitela yakuti mwawulajilepo ŵandu pakwakoleka pelepo, ulewu wakwe mamita 23. Malaŵi mumsalile mwenye kuti amkolece Modekayi pa yitelayo. Kaneko timjawuleje ni mwenye ku cindimbako mli ŵakondwa.” Hamani ŵaganisyaga kuti syelesi syaliji nganisyo syambone, mwakuti ŵapanganyisye yitela yakuwulajila mundu pakumkolekayo.