Esitele 3 - Chiyawo Bible

Hamani akutenda malindi kuti ŵawulaje Ayuda

¹ Piyamasile yeleyi, Mwenye Ahasuwelo ŵamcimbicisye Hamani mwanace jwa Hamedata jwa mwiŵasa lya Agagi pa kumpa citengu capenani kwapunda acakulungwa ŵane wosope ŵiŵaliji nawo.

² Mwenye ŵalamwile ŵakutumicila ŵakwe wosope ŵiŵatamaga pa cipata kuti amtindiŵalileje Hamani ni kumpa ucimbicimbi. Nambo Modekayi nganatindiŵalaga kapena kupeleka ucimbicimbi.

³ Ŵakutumicila ŵane ŵa mwenye ŵiŵatamaga pa cipata ŵamwusisye Modekayi kuti, “Ana ligongo cici mkukasa lilamusi lya mwenye?”

⁴ Lisiku ni lisiku ŵaŵecetanaga nawo, nambo jwalakwejo nganiŵapikanilaga jemanjajo, kaneko ŵamsalile Hamani ya nganiji kuti alole naga Modekayi tasinde maloŵe gawo pakuti ŵasalile jemanjajo kuti jwalakwe ŵaliji m'Yuda.

⁵ Hamani ŵapile mnope mtima piŵaweni kuti Modekayi ngakwatindiŵalila soni ngakwapa ucimbicimbi ŵelewo.

⁶ Hamani piŵamanyilile kuti Modekayi ŵaliji m'Yuda, ŵaganisisye kuti kumwulaga Modekayi jikape ngakuŵa kwakwanila, nambo awuwulaje mtundu wosope wa Ayuda, ŵiŵaliji mkutama mcilambo ciŵalamulilaga Mwenye Ahasuwelo.

⁷ Pa mwesi wandanda, wa Nisani, mcaka ca 12 ca ucimwene wa Mwenye Ahasuwelo, ŵandu ŵalondwele cisango ca Puli pameso pa Hamani, kuti asagule lisiku ni mwesi wakuti atende yeleyi. Cisangoco cagwilile pa lisiku lya 13 lya mwesi wa 12, mwesi wa Adala.*

⁸ Kaneko Hamani ŵamsalile Mwenye Ahasuwelo kuti, “Pana mtundu wine wa ŵandu wuwujenele pa cilambo cosopeci nipo ukusimanikaga sikati ja ŵandu m'ma upande gosope ga cilambo ca wawoci. Misyungu jawo jili jakulekangana ni misyungu ja ŵandu ŵane, soni jemanjajo ŵangagapikanila malamusi ga mwenye. Myoyo nganiciŵa cindu cambone kuti mwenye ŵalecelele jemanjajo.

⁹ Naga yili yakwanonyelesya wawo mwenye, alamule kuti mtundu wosope wene wa Ayudawo uwulajidwe, nipo une tinjilipila matani 345 ga silifa* kwa ŵandu ŵakusunga mbiya kuti jemanjajo asiŵiceje mu msaku wa mwenye kuti ajendecesyeje cilamboci.”

¹⁰ Myoyo mwenye ŵawusile mbete jakwe ja ku mkono wamlyo, jele jiŵajikamulisyaga masengo gakusindicisya, nipo ŵajipelece kwa Hamani mwanace jwa Hamedata jwa mwiŵasa lya Agagi juŵaŵengaga Ayuda jula.

¹¹ Kaneko mwenye ŵasalile Hamani kuti, “Jigalani mbiya syawosyo; nambo ŵanduwo tendani nawo cilicose cimkusaka.”

¹² Pa lisiku lya 13 lya mwesi wandanda wa Nisani, Hamani ŵaŵilasile acimlembela ŵa yikalata nipo ŵalamwile jemanjajo kuti alembe yikalata mu yiŵeceto yosope yiŵaŵecetaga ŵandu mcilambomo. Yikalatayo yalembedwe mu lina lya Mwenye Ahasuwelo nipo ŵayidindile ni mbete ja mwenye, nipo ŵayitumisye kwa acakulungwakulungwa ŵakwendesya boma, acibwanamkubwa ŵa madela gosope, ni acimlongola ŵa madela gakulekanganalekangana mcilambo ca Mwenye Ahasuwelo.

¹³ Yikalatayo yajigalidwe ni ŵandu ŵa mitenga ku madela gosope ga mwenye, mwaliji mwana utenga wakuti lisiku lya 13 lya Adala,* Ayuda wosope ŵacalume, ŵacakongwe ni ŵanace taciwulajidwa. Jemanjajo ŵasakaga kuti ŵanduwo awulajidwe mwangali canasa ni kujigala katundu jwawo.

¹⁴ Maloŵe gigaliji mcikalatamo gajenele ni kumanyika kwa ŵandu ŵa mitundu josope kuti lyaliji lilamusi, lyakuti jwalijose aŵeje tayale ya lisiku lyakuwulajidwa kwawo.

¹⁵ Ŵandu ŵa mitenga ŵala ŵapite mwakwanguya, mwenye piŵalamwile jemanjajo, nipo lilamusi ŵalijenesye ku Susa ku likulungwa lya cilamboco. Kaneko mwenye pamo ni Hamani ŵatemi pasi ni kumwaga finyo nipo ŵandu ŵa ku msinda wa Susa ŵasokonecele mitwe mwakuti nganamanyilila cicaliji mkutendeka.