Esitele 2 - Chiyawo Bible

Esitele ŵalombedwe ni mwenye

¹ Panyuma pakwe, pilwamasile lutumbilo lwa Mwenye Ahasuwelo, mwenyewo ŵakumbucile yiŵatesile Fashiti, ni lilamusi liŵampanganyicisye Fashitijo.

² Kaneko ŵandu ŵiŵamtumicilaga mwenyejo ŵatite kuti, “Kwende twasosele mwenye aciŵali ŵakusalala.

³ Mwenye asagule soni acikapitawo m'madela gosope ga ucimwene wakwe kuti jemanjajo ŵasonganye ŵali wosope ŵakusalala ku nyumba jakusunjilako acakongwe ku Susa ku likulungwa lya cilambo. Hegai jwakutumicila jwa mwenye jwele jwali jwamcele kuti jwaloleleje acakongwewo, ni kuti soni ŵapeje jemanjajo mawuta gakupakala gakusalalisya pa cilu.

⁴ Mwali jutacisangalasidwa najo mwenye, jwalakwejo taŵe ŵamkwawo mwenye m'malo mwa Fashiti.” Yeleyi yamsangalesye mwenye, nipo ŵatesile myoyo.

⁵ Pandaŵi jeleji ku Susa kwapali m'Yuda jwine lina lyakwe Modekayi mwanace jwa Yaili, nipo angangagwe ŵaliji Shimeyi mwanace jwa Kishi ŵa lukosyo lwa Benjamini.

⁶ Modekayi ŵaliji jumo mwa ŵandu ŵiŵajigalidwe ni Nebukadinesa kutyoka ku Yelusalemu, pa ndaŵi jiŵamjigalaga Mwenye Yekoniya jwa ku Yuda kwawula najo ku ukapolo ku Babiloni,*

⁷ Modekayi ŵamlelite mlumbugwawo jwakupagwa kwa baba ŵawo ŵanandi, nipo lina lyakwe ŵaliji Esitele, lyele mu ciŵeceto ca ci Hebali lyaliji Hadasa, pakuti mamagwe ni babagwe ŵaliji ali ajasice, jwalakwejo jwaliji jwakusalala soni jwakunonyelesya. Pandaŵi jiŵawile baba ni mamagwe, Modekayi ŵamjigele jwalakwejo ni kumlelaga mpela mwanace jwawo.

⁸ Mwenye ŵalamwile ni kwenesya lilamusi lyakwe lila, nipo ŵali ŵajinji ŵaliji mkwika nawo ku Susa ku likulungwa lya cilamboco, nombe nawo Esitele ŵaliji sikati ja aciŵaliwo. Hegai ni juŵalolelaga acakongwe wosope.

⁹ Hegai ŵamnonyele mnope Esitele, nipo jwalakwejo yindu yamjendelaga cenene. Myoyo Hegai ŵampele mwacitemetema Esitele mawuta ga kupakala, pamo ni yakulya yambone. Ŵampele soni aciŵali msano ni ŵaŵili ŵa ku nyumba ja mwenye kuti amtumicileje jwalakwejo. Esitele pamo ni aciŵali ŵakumtumicila ŵala ŵapegwile malo gambone mnope m'nyumba jakusunjilamo acakongwe.

¹⁰ Modekayi ŵamwundile Esitele kuti akamsalila jwalijose kuti jwalakwejo ŵaliji m'Yuda, nipo jwalakwejo jwapikanile.

¹¹ Lisiku lililyose Modekayi ŵajendaga kumeso kwa luŵala lwa nyumba jakusunjilamo acakongwe jila, ni cakulinga cakuti alolecesye naga Esitele ŵaliji pa mtendele, soni ni muyajendelaga yindu kwa ŵalakwewo.

¹² Pijakwanile ndaŵi jakuti mwali jwalijose ajawule kuwonegana ni Mwenye Ahasuwelo, pandanda mwalijo ŵasosekwaga kuti amalisye miesi likumi ni jiŵili jiŵapakalaga mawuta gakulisalalisya ga acakongwe, pa miesi msano ni umo ŵapakalaga mawuta ga mule nipo miesi msano ni jinejo ŵapakalaga mawuta gane gakununjila. Kaneko mwali jwalijose jwajawulaga kugona jikape ni Mwenye Ahasuwelo.

¹³ Mwali piŵajawulaga ku nyumba ja mwenye, ŵawalaga cakuwala cilicose ciŵasakaga.

¹⁴ Ligulo jwalakwejo ŵajawulaga kwa mwenye, nipo ŵawujagako kundaŵi ni ŵajawulaga ku nyumba jine jaŵili jakusunjilako acakongwe ŵane ŵa mwenye jila kuŵalolelaga Shashigasi. Jwamkongwe jwelejo nganajawulaga soni kwa mwenye, akaŵe naga kuti mwenyejo asangalasidwe najo jwamkongwejo ni ŵam'wilangaga pakumkolanga lina.

¹⁵ Pijakwanile ndaŵi jakuti Esitele mwanace jwa Abihayilo, juŵaleledwe ni Modekayi babagwe ŵanandi kuti ajawule kukuwonegana ni mwenye, jwalakwe nganaŵenda kandu kalikose. Jwalakwe ŵagambile kuwala yele yiŵamsalile Hegai, jwamasengo jwa mcele jwa mwenye jula juŵalolelaga acakongwe. Mundu jwalijose juŵam'weni Esitele ŵamnonyele jwalakwejo.

¹⁶ Myoyo piŵamjigele jwalakwejo kwawula najo ku nyumba ja mwenye pa mwesi wa likumi, wele uwaliji mwesi wa Tebeti* mcaka ca msano ni yiŵili* ya ucimwene wa Ahasuwelo.

¹⁷ Mwenye ŵamnonyele Esitele kwapunda ŵali wosope, nipo yindu yajendelaga cenene pameso pa mwenye kwapunda ŵali wosope, mwakuti mwenyejo ŵam'wecice Esitele cisoti ca ucimwene ni ŵamjigele jwalakwejo kuŵa ŵamkwakwe mwenye m'malo mwa Fashiti.

¹⁸ Kaneko mwenye ŵatendele cindimba cekulungwa acakulungwakulungwa ŵakwe wosope ni ŵakumtumicila ŵakwe. Cindimba celeci caliji ca Esitele. Mwenye ŵalamwile kuti pa lisiku lyeleli ŵandu apumule mu ucimwene wakwe wosope nipo mwenye ŵapelece mituka mwakusatendela ayimwene.

Modekayi ŵakulupwisye umi wa Mwenye

¹⁹ Pandaŵi jiŵasongenye aciŵali ŵala malo gamo soni, Modekayi ŵaliji pa masengo ku nyumba ja mwenye.

²⁰ Esitele ŵaliji mkinajuwule kuti ŵaliji m'Yuda mpela muŵamsalilile Modekayi jwalakwejo, pakuti ŵampikanilaga Modekayi mpela muŵatendelaga pa ndaŵi jiŵamlelaga jwalakwejo.

²¹ Pa masiku gelego, Modekayi piŵaliji pa masengo gakutama pa Cipata ca Mwenye, Bigitani ni Teleshi, ŵiŵaliji ŵakutumicila ŵacele ŵa mwenye, ŵiŵalondelaga pa mlango wakwinjilila ku cipinda ca mwenye, ŵapile mtima nipo ŵatesile malindi kuti amwulaje Mwenye Ahasuwelo.

²² Modekayi piŵayimanyi yeleyi ŵamsalile Esitele, jwele panyuma pakwe juŵajile kukumsalila mwenye m'malo mwa Modekayi.

²³ Piŵajiwungwinye nganiji ni kujisimana kuti jili jakuwona, ŵakutumicila ŵa mwenye ŵaŵiliwo ŵakolece pa yitela yiŵapanganyisye kuti ŵakolecejepo ŵandu ŵakwimucila. Yeleyi yalembedwe m'buku ja Mbili pameso pa mwenye.