Esitele 1 - Chiyawo Bible

Fashiti nginampikanila Mwenye Ahasuwelo

^1-2 Mwenye Ahasuwelo jwa ku Pelesiya ŵatamaga ku Susa likulungwa lya cilamboco nipo ŵalamulilaga madela gakwana 127 ga cilambo cosope, kutyocela ku Indiya mpaka ku Ifiyopiya.

³ Mcaka catatu ca ulamusi wakwe, jwalakwe ŵatendele cindimba acakulungwakulungwa ŵakwe wosope, ŵakutumicila ŵakwe. Asilikali ŵa ku Pelesiya ni ku Mediya ŵaliji papopo pamo ni acibwanamkubwa ni acimlongola ŵa mu upandewo.

⁴ Kwa miesi msano ni umo, mwenye ŵalosisye yipanje yakwe, soni kusalala ni ukulu wa ucimwene wakwe kwa masiku gejinji.

⁵ Pijamasile miesi jeleji, Mwenye Ahasuwelo ŵatendele cindimba ŵandu wosope ŵiŵaliji ku Susa ku likulungwa lya cilamboco pangalola ngope kuti aŵa ali ŵakusicila kapena ŵakulaga. Cindimbaci caliji mkutendekwa ku luŵala lwa ku nyumba ja mwenye nipo caliji ca masiku msano ni gaŵili.

⁶ Malogo ŵagasalalisye ni makatani geswela ni ga buluwu, ŵagataŵile ni ngonji sya nguwo ja bafuta ni jamti mpela jecejewu. Ngonjisyo ŵasikoloŵece mu mbete sya silifa* ku njalamila ja malabulo. Paliji pana soni cimpando cekulungwa ciŵacisalalisye ni golidi* ni silifa nipo caŵicidwe pa luŵala lwa ku nyumba ja mwenye, lulwaliji lwejale cenene ni maganga gecejewu, maganga ga malabulo, gakunyesimila ni ga mtengo wapenani.

⁷ Ŵandu ŵapaga yakumwa mu makapu ga golidi gakulekanganalekangana mitundu, nipo mwenye ŵapelece mwa mtendele finyo jwa ku ucimwenejo.

⁸ Ŵandu ŵamwaga muŵasacilaga, pakuti mwenye ŵalamwile jemanjajo kuti jwalijose atendeje mwakusacila.

⁹ Fashiti ŵamkwawo mwenye nombe nawo ŵalinganyicisye cindimba acakongwe mkati mwa nyumba ja Mwenye Ahasuwelo.

¹⁰ Pa lisiku lya msano ni mcece lya cindimba, Mwenye Ahasuwelo ŵasengwile mnope ligongo lya cakumwa ca finyo, myoyo ŵaŵilasile Mehumani, Bisita, Halibona, Bigita, Abagita, Seta ni Kalakashi ŵele ŵiŵaliji ŵakutumicila ŵacele ŵa mwenye.

¹¹ Ŵalamwile jemanjajo kuti ajawule kukwaŵilanga Fashiti ŵamkwawo mwenye kuti ayice nawo pameso pa mwenyewo, ali awete cisoti ca ucimwene ni cakulinga cakuti ŵandu ni acimlongola wosope akuwone kusalala kwawo.

¹² Nambo mwenye jwamkongwejo jwakanile kwawula piŵapikene kuŵilanga kwa mwenye kupitila kwa ŵakutumicila ŵawo ŵala, nipo yeleyi yamsakalisye mwenye.

¹³ Myoyo mwenye ŵaŵilasile ŵandu ŵalunda ŵiŵamanyililaga cenene malamusi, pakuti mwelemu ni muŵatendelaga mwenyejo, kwawusya ŵandu ŵakumanyilila malamusi ni kulamula.

¹⁴ Ŵandu ŵiŵampaga mwenye lunda ŵaliji Kashena, Shetali, Adimata, Talishishi, Melesi, Malisena, Memukamu, ni acimlongola msano ni ŵaŵili ŵa ku Pelesiya ni ku Mediya ŵele ŵiŵatamaga pamo ni mwenyewo nambo soni ŵiŵakwete ma udindo ga penani mu ucimwenemo.

¹⁵ Mwenye ŵasalile jemanjajo kuti, “Ŵamkwangu Fashiti akanile kuti ayice akuno pinatumile ŵakutumicila ŵangu kuti akaŵilanje ŵelewo. Ana tutende nawo cici?”

¹⁶ Kaneko Memukamu ŵasalile mwenye ni acimlongola ŵala kuti: “Ngaŵatu kuti mwenye jwamkongweju ŵanyosisye wawope mwenye, nambo soni ŵanyosisye acimlongola ni ŵandu wosope ŵakutama mu upande wa wawo Mwenye Ahasuwelo.

¹⁷ Pakuti yatesile ŵamkwawo mwenye tiyicipikanika sikati ja acakongwe wosope, nipo tacanyosyaga aciŵam'makwawo. Pakuti tacitiga kuti, ‘Mwenye Ahasuwelo ŵamlamwile ŵamkwakwe Fashiti kuti ajawule kuŵaliji mwenyeko nambo ŵelewo ŵakanile.’

¹⁸ Sambano jino acakongwe ŵa acimlongola ŵa ku Pelesiya ni ku Mediya ŵapikene ya ndamo jakusakala ja ŵamkwawo mwenyeji, ngiŵacimbicisyaga aciŵamkwawo nipo kunyosyana ni kutumbilisyana tikucitupa.

¹⁹ Naga yili yakwasangalasya wawo mwenye, alamule kuti Fashiti akayika soni pameso pa wawo. Lilamusilyo lilembedwe m'buku ja malamusi ja Apelesi ni Amedi nipo likasilisindidwa soni lilamusili. Kaneko m'malo mwa ŵelewo amjinjisye jwamkongwe jwine jwakusalala kwapunda ŵelewo.

²⁰ Sambano pitalijenesye lilamusili mu ucimwene wawo wosope, ni kuti acakongwe wosope tacapa ucimbicimbi aciŵamkwawo, pangaganicisya kuti ali ŵakulaga kapena ŵakusicila.”

²¹ Maloŵe gelega gamkamwile mtima mwenye pamo ni acimlongola ŵala, nipo mwenyewo ŵatesile mpela muŵaŵecetele Memukamu.

²² Mwenyewo ŵatumisye yikalata ku madela gosope ga mu ucimwene wakwe. Cikalata cilicose calembedwe mu ciŵeceto ca ŵandu ŵa ku dela jele kuŵacitumisyagako, nipo mwelemo ŵalembilemo kuti jwamlume jwalijose aŵeje jwamkulungwa jwa pa liŵasa lyakwe nipo alilamulileje cenene liŵasa lyakwelyo.