Esek 9 - Chiyawo Bible

Yelusalemu akupocela cilango

¹ Kaneko napikene Mlungu alimkuŵeceta mwakwesya kuti, “Myice akuno, jemanja ŵandu ŵamkwawula kukonanga msindawo. Jwalijose ajigale cida cakwe.”

² Mwa kandaŵi kamo ŵayice acalume msano ni jumo ŵakutyocela kumpoto kwa Cipata ca Nyumba ja AMBUJE* ŵaliwose ali ajigale cida. Pa likuga lyawolyo papali mundu jwine juŵawete nguwo ja bafuta, ŵajigele yindu yakuti alembele. Wosopewo ŵayice ni kwima pambali pa malo gakupelecela mbopesi ga bulonsi.

³ Kaneko ucimbicimbi wa lilanguka lya Mlungu jwa Aisalaeli wawonecele kutyocela mwa mkelubi mula mwele muwaliji, ni kwawula pakwinjilila m'Nyumba ja AMBUJE. AMBUJE ŵamŵilasile mundu juŵawete yakuwala yabafuta jula.

⁴ “Mjawule mu msinda wosope wa Yelusalemu ni mkaŵice cimanyisyo pawusyo pa ŵandu wosope ŵele ŵakulila ni kulagasika ligongo lyakusakalilwa ni yakusakala yikutendecekwa kweleko.”

⁵ Kaneko napikene Mlungu alimkwasalila acalume ŵane ŵala kuti, “Mumkuye jwalakwejo mu msinda wosopewo, nipo mkawulaje jwalijose. Mkaja kumleka atamose jumo; mkaja kumtendela canasa atamose jumo.

⁶ Mkawulaje ngalamba, acacanda, ŵali, acakongwe ni ŵanace. Nambo mkajakwakwaya ŵaliwose ŵakwete cimanyisyo pa usyo pakwe. Mtandile m'Nyumba janguji.” Myoyo jemanjajo ŵatandilile kuwulaga acakulungwa ŵiŵaliji pa mlango pa Nyumba ja AMBUJE.

⁷ Sambano Mlungu ŵatite kwa jemanjajo, “Msakasye Nyumba jangu, nipo luŵala lwakwe mgumbasye ni mitembo. Mjawuleje mkakamule masengo!” Myoyo jemanjajo ŵatandite kwawulaga ŵandu ŵa mu msindamo.

⁸ Katema kiŵawulagaga, une nasigele jikape. Ni naligwicisye pasi camakuku ni gumila kuti, “Ŵalakwe AMBUJE Mlungu, ana atumbile nawo msinda wa Yelusalemu, mwakuti taciwulaga wosope ŵakusigala ku Isalaeli?”

⁹ Mlungu ŵajanjile kuti, “Ŵandu ŵa ku Isalaeli ni ŵa ku Yuda akwete ulemwa* wawukulungwa mnope. Cilambo cosope cigumbele ni yakuwulagana, nombe Yelusalemu agumbele ni yangalumbana. Ŵandu akuŵeceta kuti, Une AMBUJE, nacilesile cilambo cawo soni ngingwasamala jemanjajo.

¹⁰ Myoyo ngasinatendela canasa jemanjajo; tinjiyitenda kwa jemanjajo yele jemanjajo yiŵayitesile kwa ŵane.”

¹¹ Kaneko mundu juŵawete yakuwala ya bafuta jula ŵayice ni kwasalilaga AMBUJE kuti, “Ndesile yele yiŵandumile yila.”