Esek 8 - Chiyawo Bible

Mesomkulola gaŵili ga Esekiele kwa Mlungu 8:1—10:22 Ya milungu jine mu Yelusalemu

¹ Lisiku lyamsano lya mwesi wamsano ni umo caka camsano ni cimo ca ukapolo, acakulungwakulungwa ŵa ukapolo wa ku Yuda ŵatemi ni une m'nyumba jangu. Mwacisisimucisya macili ga AMBUJE* Mlungu gayicilile une.

² Nalolite kwinani kupitila m'mesomkulola, ni naciweni cindu mpela mundu. Cinduco cawonekaga mpela moto kutyocela mciwunu mwakwe kwawulaga pasi, kutyocela mciwunu kwawulaga kwinani kwakwe cawonekaga cakunyesimila mpela bulonsi.

³ Ŵatambasukwile cindu cakulandana mpela mkono ni ŵangamwile umbo. Kaneko m'mesomkulola Msimu wa Mlungu wanyakulile mwinani ni kunjigalila ku Yelusalemu. Ŵanjigalile ku cipinda camkati mnope cakwinjilila cipata cakumpoto ca Nyumba ja AMBUJE, kweleko kwapali mlungu jwakusepa jwakulutanda lutumbilo lwa Mlungu.

⁴ Lumbili lwa Mlungu jwa Aisalaeli lwawonece kweleko, mpela munaluwonele m'mesomkulola kala m'ciŵata mula.

⁵ Kaneko AMBUJE ŵaŵecete kwa une kuti, “M'mwe mwanace jwa mundu, mlole kumpoto.” Nalolite kumpoto, kweleko ciŵandika ni malo gakupelecela mbopesi ga pa mlango wa cipata, nam'weni mlungu jwine jwakupanganyidwa ni ŵandu juŵatandisyaga lutumbilo lwa Mlungu jula.

⁶ Mlungu ŵatite kwa une kuti, “M'mwe mwanace jwa mundu, ana mkuyiwona yakutenda jemanjaji, yakusakala yekulungwa yele Aisalaeli akuyitenda akuno, yakundyosya ku Nyumba jangu jeswela? Nambope timyiwonepe yakusakala yekulungwa kupunda yeleyi.”

⁷ Kaneko ŵanjigalile ku mlango wakwinjilila ku luŵala lwa Nyumba ja AMBUJE; pinalolite, naliweni libowo pepupapo.

⁸ Sambano ŵasalile kuti, “M'mwe mwanace jwa mundu, m'bowole lipupalyo.” Pinapowele lipupalyo, nawusimene pa mlango.

⁹ Ŵasalile kuti, “Mjinjile, mlole yakusakala yekulungwa yakutenda ŵandu akuno.”

¹⁰ Myoyo najinjile ni nalolite; nayiweni m'mapupamo yitusitusi yakwambula yakulekanganalekangana yakwaŵa pasi, ni yinyama yakusakala soni milungu jine jele Aisalaeli wosope jiŵajilambilaga.

¹¹ Acakulungwa ŵakulongolela ŵa Aisalaeli makumi msano ni gaŵili ŵajimi pelepo, pampepe ni Yasaniya mwanace jwa Shafani juŵajimi pasikati pawo. Jwalijose jwa jemanjaji jwaliji ni cakututumicisya ubani* m'myala, nipo lyosi lyakununjila lya ubani lyajawulaga mwinani.

¹² Kaneko AMBUJE ŵambusisye une kuti, “M'mwe mwanace jwa mundu, ana mkuyiwona yele acakulungwa ŵa Aisalaeli yakutenda mcipi muno? Jwalijose akupopela mcipinda cegumbale ni yitusitusi yakwambula. Ni kuŵecetaga kuti, ‘AMBUJE ngakutuwona! AMBUJE acijasile cilambo.’ ”

¹³ AMBUJE ŵaŵecete ni une kuti, “Timyiwone ali mkutenda yindu yine yakusakala yekulungwa kupunda yeleyi.”

¹⁴ Kaneko ŵanjigalile ku cipata ca kumpoto cakwinjilila m'Nyumba ja AMBUJE, kweleko naweni acakongwe ŵane ali atemi pasi ali mkumlilila mlungu jwawo lina lyakwe Tamusi.

¹⁵ AMBUJE ŵaŵecete ni une kuti, “M'mwe mwanace jwa mundu, ana mkuyiwona yeleyi? Timyiwone yindu yine yakusakala yekulungwa kupunda yeleyi.”

¹⁶ Kaneko ŵanjigalile ku cipinda camkati ca Nyumba ja AMBUJE. Kweleko pa cipata cakwinjilila M'nyumba ja AMBUJE, pasikati pa malo gakupelecela mbopesi ni mpata wakupita, paliji pana ŵandu ŵacalume mpela 25. Migongo jawo ŵajilosisye ku Nyumba ja AMBUJE ni kwinamilaga kungopoko lyuŵa, kulambilaga kopoka kwa lyuŵa.

¹⁷ AMBUJE ŵatite kwa une, “M'mwe mwanace jwa mundu, ana mkutiwona yeleyi? Ayuda ngakwikutila yakunyalaya yakutenda apanoyi nambo akupitilisya kwenesya yiwawa ni ungali cilungamo mcilambo cosope ca Aisalaeli nipo andesile kuti ndumbile mnope. Andesisye soni ni kundukana une mwakupelenganya.

¹⁸ Sambano Une tinjapa cilango ndili citumbilile. Ngasinalecelesya kapena kwatendela canasa jemanjajo. Atamose tacililaga mwagumila kwa Une, nambope ngisinapikanila.”