Esek 7 - Chiyawo Bible

Mbesi ja Aisalaeli jili pakuŵandika

¹ AMBUJE* ŵaŵecete ni une kuti.

² “M'mwe mwanace jwa mundu, Ayi ni yakuti AMBUJE Mlungu ku cilambo ca Aisalaeli: kuti mbesi jiyice ku cilambo cosope!

³ “Isalaeli, mbesi jiyice. Timciluwona lutumbilo lwangu, ligongo ngumlamula magambo jemanja pa yele yimtesile. Tinjimpa cilango ligongo lya yakusakala yenu.

⁴ Ngisinamkululucila kapena kumtendela canasa. Tinjimpa cilango ligongo lya yindu yakusakala yimtesile, pelepo timcimanyilila kuti Une ndili AMBUJE.”

⁵ Yakuŵeceta AMBUJE Mlungu nayi, “Conasiko cakuyana ni cimjakwe cikwisa kwa jemanja.

⁶ Yosope yimasile. Mbesi ni jeleji. Sambano m'masile.

⁷ Mbesi jikwisa kwa ŵandu ŵakutama mcilambo. Ndaŵi jiŵandicile jele tipaciŵa pangali kusangalala kulikose m'matumbi, nambo tikuciŵa yiwawape.

⁸ “Pangakaŵapa timluwone lutumbilo lwangu. Tinjimlamula magambo pa yele yimwatesile, nipo tinjimpa cilango ligongo lya yakusakala yenu yejinji.

⁹ Ngasinamkululucila kapena kumtendela canasa. Tinjimpa cilango ligongo lya yindu yimtesile, pelepo timcimanyilila kuti Une ndili AMBUJE, soni kuti Une ni junampele cilango jemanja.”

¹⁰ Lisiku lya conasiko ca Aisalaeli likwisa. Yiwawa yigamba kulilakulila. Kulinonyela kwenu kuwonecele pakulanguka.

¹¹ Yiwawa yitendesye kuŵa ŵakusakala mtima. Pangali atamose jumo jwa jemanjajo jutacisangalala, cipanje cawo ticicimala, kusalala kwawo tikucimala ni ucimbicimbi wawo soni tiwucimala.

¹² Ndaŵi jikwisa. Lisiku likuŵandicila lyele kusuma ni kusumisya tiyiciŵa yangali mate, ligongo cilango ca Mlungu cicigwila pa wosope yalumo.

¹³ Pangali jwakusumisya jutaciyipata soni yele yiŵasumisye kwa mjakwe pa umi wakwe wosope, ligongo lutumbilo lwa Mlungu luli pa jwalijose. Ŵele ŵali ŵakulemwa ngisakulupuka.

¹⁴ Lipenga lilisile, nipo jwalijose akuŵa cile. Nambo pangali atamose jumo jwakwawula ku ngondo, pakuti lutumbilo lwangu lugwilile pa wosope yalumo.

Cilango ca Aisalaeli ligongo lya ulemwa wawo

¹⁵ Akumenyana m'misewu, m'majumba mwana yilwele ni sala. Ŵandu ŵakutama m'misi taciwa ni ngondo, ni ŵakutama m'misinda taciwa ni yilwele ni sala.

¹⁶ Wosope ŵatacikulupuka tacitamaga ku matumbi ni kugumilaga mpela ngunda sya m'ciŵata ligongo lya ulemwa* wakwe.

¹⁷ Magasa ga jwalijose gacilembuka, nipo malungo gawo gacilepetala mpela mesi.

¹⁸ Taciwala yisaka nipo tacikamulwa ni woga. Mitwe jawo tijicimyoledwa, nipo tacitenda soni.

¹⁹ Tacijasa silifa* ni golidi* jwawo m'misewu mpela yiswani, ligongo silifa kapena golidi jwawojo ngaŵa mkombola kwakulupusya jemanjajo pa lisiku lyele AMBUJE litacilosya ukali wawo. Pakuti cipanje cawoco ngaŵamkumasya sala kapena kwikutisya ndumbo syawo. Golidi ni silifa ni yiyatendekasisye kuŵa mu ulemwa.

²⁰ Kala ŵalikwesyaga ligongo lya yakulisalalicisya ya mtengo wapenani, ni ŵakamulicisyaga masengo yeleyo pakupanganya milungu jakunyalaya. Ni ligongo lyakwe AMBUJE ayitesile yipanje yawo kuŵa yakwanyalaya acimsyene pewo.

²¹ AMBUJE akuti, “Tinjakunda ŵandu ŵakwika kuti ŵajiŵile jemanjajo,” soni ŵandu ŵakasa malamusi tacijigala yipanje yawo ni kuyisakasya.

²² Tinjalecelela ŵanduwo kuti asakasye Nyumba jangu, ŵawiyi tacijinjila mkati ni kusakasyamo.

²³ “Yindu yosope yisokonecele, cilambo cigumbele ni ŵandu ŵakuwulaga acimjawo nombe misinda jigumbele ni yiwawa.

²⁴ Tinjiyika najo mitundu ja ŵandu ŵakusakala mnope akuno kuti tasumule nyumba syenu. Ŵandu ŵenu ŵamacili ngisalikulupilila ndaŵi jele mitundu jine jiticisakasya malo gele jemanja gimkusapopelelago.

²⁵ Ndaŵi jijikwayicila woga, tacisosa mtendele nambo ngasawusimana.

²⁶ Likungu tilicikuyana ni likungu lijakwe, tipaciŵa mbekesela syangamala. Ŵandu tacasosasosa ŵakulocesya kuti ŵasalile yindu ya kusogolo. Ŵakutaga mbopesi tacisoŵa yakwajiganya ŵanduwo, nombe acakulungwa tacisoŵa lunda lwakuti apelece.

²⁷ Mwenye tacilila, nduna syakwe tisiciŵa syangali cikulupi, nipo ŵandu tacitetemela ni woga. Tinjimpa jemanja cilango ligongo lya yele yimtesile, nipo tinjimlamula magambo mpela muŵalamulilaga ŵane ŵala. Yeleyi tiyicimlosya kuti Une ndili AMBUJE.”