Esek 6 - Chiyawo Bible

AMBUJE akukanya milungu jine

¹ AMBUJE* ŵaŵecete ni une kuti,

² “M'mwe mwanace jwa mundu, mlole ku matumbi ga ku Isalaeli nipo mkapelece utenga wangu kwa jemanjajo.

³ Mkagasalile matumbi ga ku Isalaeli kuti gapikane maloŵe ga AMBUJE, gapikane yele une AMBUJE Mlungu yingugasalila matumbi, sulo ni yiŵata; Tinjitumisya upanga kuti tiwujonanje malo gosope gele ŵandu akulambilila milungu jine.

⁴ Malo genu gakupelecela mbopesi gacigumulidwa soni malo gakututumicisya ubani* nombe nago tigacigumulidwa. Ŵandu wosope pelepo tinjawulaga pameso pa milungu jawojo.

⁵ Tinjijimwasanya mitembo ja Aisalaeli pasogolo pa milungu jawo, nipo tinjigamwasanya mawupa genu pakusyungulila malo gakupelecela mbopesi genu gosope.

⁶ Misinda josope ja Aisalaeli tijicijonasika, mwamti malo gakupelecela mbopesi pampepe ni milungu jawo tijicijonanjidwa ni kuŵa yiduswa, malo gawo gakututumicisya ubani tacigagwisya nipo yosope yene yiŵapanganyisye ngasiyiwoneka.

⁷ Ŵandu taciwulajidwa palipose, nipo ŵele ŵitacisigala tacijiticisya kuti Une ndili AMBUJE.

⁸ “Tinjakunda ŵane kuti akulupuce ku ciwaci nipo tinjapwilinganyila ku yilambo yine ya ŵandu ŵa mitundu jine,*

⁹ kwele kutakaŵe acikapolo. Tacingumbucila une ni kumanyilila kuti napele cilango jemanjajo ni kwatesya soni ligongo lya ungakulupicika ni kunjimucila kula ligongo ŵajinonyele milungu jine ngaŵa une. Myoyo tacinyalapa acimsyene pewo pitaciyiwona yangalumbana soni ni ngasayisaka yindu yiŵatesile acimsyenepewo.

¹⁰ Pelepo tacimanyilila kuti Une ndili AMBUJE nipo kwatetela kwangu nganikuŵa kwagamba kwajogoya cabe.”

¹¹ AMBUJE Mlungu ŵatite, “Mkwate m'myala mwenu ni mponde lusajo lwenu pasi mwamacili. Ni mgumile ligongo lya yangalumbana, ni yindu yakunyalaya yele Aisalaeli ŵayitesile. Taciwa ku ngondo, ni sala, soni ni yilwele.

¹² Ŵele ŵali kwakutalika taciwa ni yilwele; ŵele ŵali pakuŵandika taciwa ni ngondo, ŵele ŵitacisigala taciwa ni sala. Taciluwona lutumbilo lwangu lwamacili.

¹³ Ni pelepo tacimanyilila kuti Une ndili AMBUJE, ndaŵi jele ŵandu ŵakuwulajidwa taciŵa lambalamba pasikati pa milungu jawo kusyungulila malo gakupelecela mbopesi gawo, penani pa matumbi gosope, pasi pa citela cilicose cakutenjela, ni citela cilicose cekulungwa ca mtundu, ku malo gosope kwele kuŵapelecelaga mbopesi jakutinisya kwa milungu jawo.

¹⁴ Tinjitambasukula mkono wangu ni konanga cilambo cawo. Tinjicitenda cilambo cawo kuŵa cangali masengo kutyocela ku mwela kwa cipululu mpaka ku msinda wa Libula kumpoto. Pelepo tacimanyilila kuti Une ndili AMBUJE.”