Esek 47 - Chiyawo Bible

Lusulo lwakutyocela m'Nyumba ja AMBUJE

¹ Mundu jula ŵanjigalile soni ku Cipata ca Nyumba ja AMBUJE. Nipo nagaweni mesi galimkopoka pasi pa cipataco ni kujilimilaga kungopoko lyuŵa, kwele kwalolite Nyumba ja AMBUJEJO.

² Ŵangopocesye pa cipata cakumpoto ni ŵasyungulile ni une pasa pakwe mpaka ku cipata cakusa cakulola kungopoko lyuŵa. Nipo nagaweni mesi galimkujilimila ca kum'mwela kwa cipata.

³ Mundujo ŵapite ca kungopoko lyuŵa, ni ŵajigele simbo jakupimila nipo ŵapimile mamita 500 kusokoka kwakwe. Kaneko ŵasalile kuti njomboce mesigo, nipo mesigo gandecesye mcisukusuku.

⁴ Ŵapimile soni mamita gane 500 nipo ŵandesile kuti njomboce mesigo, nipo mesigo gandecesye m'malungo, ŵapimile soni mamita gane 500 kwawula pasi pa mesi, nipo mesigo gandecesye mciwunu.

⁵ Ŵapimile mamita gane soni 500 nipo mesigo gaŵele lusulo lwakusokoka mwamti une nalepele komboka. Pakuti mesigo gatesile tutumule nipo lusulolo lwaliji lwakusokoka kuti njomboce nambo ng'ambila.

⁶ Pelepo ŵasalile kuti, “M'mwe mwanace jwa mundu, msamale ni yindu yimyiweniyi.” Kaneko ŵambucisye ku ciko ca lusulolo,

⁷ Ndili mbice kucikoco, nayiweni yitela yejinji mbali syosope sya cikoco.

⁸ Myoyo mundujo ŵasalile kuti, “Mesiga gakwawula ku upande ŵa kungopoko lyuŵa wa cilambo ca kwiŵanda kwa Ciŵata ca Alaba. Pakumalisya pakwe gakusaja kulitaga m'Nyasa ja Njete nikuja galawusya mesi ganjete kuŵa gambone.

⁹ Kulikose kutigacijawulaga mesigo, ciwumbe cilicose ticiciŵa ni umi nipo somba nombe nasyo siciŵa syejinji. Mesi gelega gacitendesya mesi ga Nyasa ja Njete kuŵa gambone, nipo kulikose kugakwawula, yosope yiciŵa ni umi.

¹⁰ Ŵandu ŵakuwulaga somba tacijima mu yiko, ligongo kutyocela ku Enigedi mpaka ku Enegilaimu tikuciŵa malo gakwanicila makoka gawo. Mlusulomo timuciŵa somba sya mitundumitundu, mpela sili m'Nyasa ja Mediteleniyani.

¹¹ Nambo mesi ga m'matamanda mwakwe ngasigaŵa gambone. Tigaciŵa myoyo ga njete.

¹² Mbali syosope sya ngulugulu lusulolo yitela ya mitundu josope tiyicimela kuti yipeleceje yakulya. Masamba gakwe ngasiganyala, nipo ngasiyileka kusogola yisogosi. Yiciŵa ni yisogosi mwesi uliwose, ligongo yikwitililidwa ni mesi gakutyocela m'Nyumba ja AMBUJE. Yisogosi yakwe tiyiciŵa yakulya, nipo masamba gakwe tacigatendaga mtela.”

Malile ga cilambo

¹³ Yiŵaŵecete AMBUJE nayi, “Aga ni malile gatimcikuya pakwagaŵila cilambo ca Aisalaeli ŵandu ku mitundu likumi ni jiŵili jila, nambo mtundu wa Yosefe apocele ma upande gaŵili.

¹⁴ Cilamboci timgaŵane mwakulandana, ligongo nalumbile kuti tinjicipeleka kwa acinangolo ŵenu, nipo cilamboci ticiciŵa cenu mpela cakupata cenu.

¹⁵ “Malile gakwe tigaŵe camti myi: cakumpoto kwakwe, kutyocela Ku Nyasa ja Mediteleniyani, mpaka ku msinda wa Hetiloni mpaka ku Mpata wa Hamati, kupitila ku Sedadi,

¹⁶ Belota ni Sibulaimu, (misinda jele jili m'malile mwa Damasiko ni Hamati), nipo soni msinda wa Tikoni (wawuli m'malile mwa boma ja Haulani).

¹⁷ Myoyo malile ga kumpoto gakutyocela ku Nyasa ja Mediteleniyani kungopoko lyuŵa kwa msinda wa Hasala Enoni, wele wutesile malile ni Damasiko ni Hamati cakumpoto kwakwe.

¹⁸ “Malile ga kungopoko lyuŵa gajende kum'mwela kutyocela sikati ja Damasiko ni Haulani, kulukuya Lusulo lwa Yolodani ni kutenda malile gasikati ga cilambo ca Isalaeli ca kungapilo lyuŵa ni Giliyadi ca kungopoko lyuŵa, mpaka ku Tamala ku Nyasa ja Njete.

¹⁹ “Malile ga kum'mwela gacitandila kutyocela ku Tamala mpaka ku kwitamanda lya ku Meliba Kadeshi. Kutyocela kweleko akuye malile ga ku Iguputo mpaka ku Nyasa ja Mediteleniyani.

²⁰ “Malile ga kungapililo lyuŵa gaŵe Nyasa ja Mediteleniyani mpaka ku malo kusogolo kwa Mpata wa Hamati kungapilo lyuŵa.”

²¹ “Myoyo mgaŵane cilamboci sikati jenu pakuya mitundu ja Aisalaeli.

²² Ticiciŵa ca Aisalaeli ni ŵandu ŵaliwose ŵakwika kukutama ni jemanjajo ŵele ŵanace ŵawo ŵapagwile ku Isalaeli. Ŵandu ŵakwika ŵeleŵa taŵeje mpela mlukosyo jwalijose jwa mu Isalaeli, nipo tacipocela

²³ mbali jawo ja cilambo jele jiticipelecedwa ku mtundu wa ŵandu kwele kwakutama. Ni yinguti Une AMBUJE.”