Esek 45 - Chiyawo Bible

Malo gakutama AMBUJE mcilambo

¹ Pakugaŵa malo kuti lukosyo lululose lupocele mbali jakwe ja malo, mbali jimo ja malo ajiŵice pajika kuti jiŵe ja AMBUJE. Mcilewu mwakwe muŵe makilomita 12 ni hafu, ni mcijipi mwakwe muŵe makilomita 10. Malo gosopego tigaciŵa gapajika.

² Mkati mwa malo gelega, malo ga mamita 250 mbali jilijose tigaciŵa malo ga Nyumba ja AMBUJE, ni kusyungulilidwa ni malo gakwana mamita 25 gangali cilicose.

³ Mbali ja pajikajo mlinje makilomita 12 ni hafu mcilewu, makilomita msano mcijipi mwakwe. Pelepo tipaciŵa Nyumba ja AMBUJE, malo gamaswela mnope.

⁴ Tigaciŵa malo gamaswela ga cilambo, gitacitamaga ŵakutaga mbopesi ŵakutumicila m'Nyumba ja AMBUJE. Pelepo tipaciŵa nyumba syawo ni Nyumba ja AMBUJE soni.

⁵ Mbali jine ja malogo jiciŵa ja Alefi, ŵakusatumicila m'Nyumba ja AMBUJE. Kweleko tikuciŵa msinda wa jemanjajo kuti atameje.

⁶ Ciŵandika ni malo gamaswelago, asagule malo gakwanila makilomita gaŵili ni hafu mcijipi mwakwe, makilomita 12 ni hafu mcilewu mwakwe, kuti gaŵe msinda wele tiwuciŵa wa liŵasa lyosope lya Aisalaeli.

Mbali ja mwenye

⁷ Aŵice soni pambali malo ga mwenye. Malo gelego gaŵandikene ni mbali ja malo gamaswela ni ga msinda, gaŵandikane ni mbali sya kungapilo lyuŵa ni kungopoko lyuŵa. Jilewupe mpela mbali jimo ja lukosyo lwa Aisalaeli, mpaka ku malile ga cilambo kungapilo lyuŵa ni kungopoko lyuŵa.

⁸ Mbalijo tijiciŵa jakwe wa mwenye jwa cilambo ca Isalaeli, mwamti ayimwene ŵangu ngasiŵalagasya soni ŵandu ŵangu, nambo tacakundaga Aisalaeli kuti aŵe ni mbali jawojawope.

Malamusi ga Jwakulamulila

⁹ AMBUJE Mlungu ŵatite kuti, “Mlemwisye kwa ndaŵi jajikulungwa, jemanja ŵakulamula ŵa ku Isalaeli. Alece ngalwe ni kwalagasya ŵandu. Atende cilungamo ni yambone. Mkasimwatyosya soni ŵandu ŵangu mcilambo cawo. Une, AMBUJE Mlungu ni yinguti.

¹⁰ “Jwalijose akamulisye masengo milingo ja cilungamo:

¹¹ “Efa mlingo wa yindu yejumu ni bati mlingo wa yindu ya mesi yiŵe yakulandana. Mlingo wa homeli uŵe wakwanila ma efa likumi, uŵe soni wakwanila mabati likumi. Myoyo homeli ni mlingo wakwenela.

¹² “Mpimo wa sekeli uŵe magela makumi gaŵili nipo mlingo wa mina uŵe wakusitopa masekeli makumi msano ni limo.

^13-15 “Asi ni mbopesi simkwenela kupeleka: cimo mwa yindu 60 ya tiligu ni ya balele,* soni cimo mwa yindu 100 ya mawuta. Milingo jakwe jili myi: mabati likumi gakulandana ni homeli jimo kapena koli jimo. Mpelece ngondolo jimo pa likuga lya ngondolo 200 kutyocela ku maŵasa ga Aisalaeli. Mwelemu ni mucimcipelecelaga mbopesi sya tiligu, mbopesi syakutinisya nipo soni mbopesi sya mkamulano, ni syakupesya ligongo lya magambo ga ŵandu. Ni yinguti Une AMBUJE Mlungu.

¹⁶ “Ŵandu wosope ŵa mcilambomo apeleceje yeleyi kwa mwenye jwa ku Isalaeli.

¹⁷ Tigaciŵa masengo ga mwenye kupeleka mbopesi sya kutinisya, mbopesi sya tiligu, mbopesi sya yakumwa pa masiku ga cindimba, ni masiku gakupumula ga Ayuda nipo soni pa masiku gele Aisalaeli akusagasunga. Mwenyejo akusapeleka mbopesi sya syakupesya ligongo lya ulemwa,* mbopesi sya tiligu, mbopesi sya kutinisya ni mbopesi sya mkamulano, kuti syosope siŵe sya kupecesya ulemwa wa Aisalaeli.”

Cindimba

¹⁸ AMBUJE Mlungu akuti, “Pa lisiku lyandanda lya mwesi wandanda, ajigaleje mwanace jwa ng'ombe jamkambako jwangali liŵasi ni kuja kutenda msyungu wakuswejesya Nyumba ja kupopelela.

¹⁹ Jwakutaga mbopesi tajigale miasi ja mbopesi jakupecesya ulemwa nipo ajipace pa felemu ja Nyumba jakupopelela, pa ndumba mcece sya malo gakupelecela mbopesi ni pa felemu jakwinjilila luŵala lwamkati.

²⁰ Atendeje yeleyi pa lisiku lyamsano ni lyaŵili lya mwesi, kuti ŵapecesyeje ŵaliwose ŵiŵalemwisye mwangasaka kapena mwangamanyilila. Myoyo Nyumba jakupopelela tacijisunga jeswela.

²¹ “Pa lisiku lya likumi ni mcece lya mwesi wandanda, tatendeje cindimba ca Pasaka* cindimba cakwe ca masiku msano ni gaŵili. Masiku gelego jwalijose tacilyaga mkate wangali cakusasaŵilisya.

²² Pa lisiku lyandanda lya cindimbaco, mwenye apelece mbopesi ja ng'ombe ja mkambako jakupecesya ulemwa wakwe soni ni ulemwa wa ŵandu wosope.

²³ Pa lisiku lya msano ni gaŵili ga cindimbaco, mwenyejo tapeleceje kwa AMBUJE mbopesi jakutinisya, ngo'mbe syamkambako msano ni siŵili ni ngondolo sya mkambako msano ni siŵili syangali liŵasi. Lisiku lililyose mwenye apeleceje mbopesi ja tonde jumo jakupecesya ulemwa.

²⁴ Pamo ni ng'ombe jilijose ja mkambako ni ngondolo jilijose ja mkambako, mwenye apelece mbopesi ja tiligu ja yakwanila malita 17 ni hafu nipo soni mawuta gakwanila malita gatatu.

²⁵ “Sambano mwenye atende yalumo pa lisiku lya likumi ni msano lya mwesi wamsano ni jiŵili. Cindimba celeco citendecekweje masiku msano ni gaŵili. Mwenye apeleceje mbopesi sya mtundu uwowopewo, syakupecesya ulemwa, mbopesi syakutinisisya nipo soni mbopesi sya utandi ni sya mawuta.”