Esek 44 - Chiyawo Bible

Masengo ga cipata ca kungopoko lyuŵa

¹ Mundu jula ŵanjigalile ku cipata cakusa kwa nyumba jakupopelela, cicalolite kungopoko lyuŵa. Cipataco caliji cewugale,

² ni AMBUJE ŵasalile kuti, “Cipata aci ciŵeje cewugale ni ngaciwugula soni. Jwine akasapitila pelepo iyayi, pakuti AMBUJE Mlungu jwa Aisalaeli apitile pelepo. Ni ligongo lyakwe ticiciŵa cewugale.

³ Jwakulamulila jikape, jwalakwejo takombolece kutama pelepo ni kulyaga mkate pameso pa AMBUJE. Jwalakwejo tacijinjilila ni kopocela mwipenu lyamkati lya cipata cicoco.”

Malamusi gakwinjilila m'Nyumba ja AMBUJE

⁴ Kaneko mundujo ŵanjigalile ku cipata ca kumpoto kumeso kwa Nyumba ja AMBUJE. Kweleko naluweni lumbili lwa AMBUJE lulilugumbele m'Nyumba jakwejo. Pelepo naligwisisye pasi camakuku,

⁵ ni AMBUJE ŵasalile kuti, “M'mwe mwanace jwa mundu, msamalile cenene, mlolecesye ni mpikanicisye cenene yosope yitinimsalile yakwayana ni malamusi ni yakutenda ya Nyumba ja AMBUJE. Myimanyilile cenene ŵakwenela kwinjila m'Nyumba ja AMBUJE kwika soni ŵangakwenela kwinjilamo.

⁶ “Mwasalile ŵandu ŵakwimucila ŵa Isalaeli kuti, jemanja Aisalaeli, mlece yakunyalaya yenu yosope.

⁷ Mwajinjisye acalendo ŵangawumbala mu mtima ni ku cilu cakwe M'nyumba jangu. Ŵanduwo ŵasakesye Nyumba jangu ndaŵi jimwambaga yakulya, mawuta ni miasi jakwe. Pakutenda yakusakala yeleyi mwakasile cilanga* cangu.

⁸ Nganimsamalaga yindu yangu yeswela, m'malo mwakwe mwasagwile acalendo kuti aloleleje Nyumba jangu.

⁹ “Une AMBUJE Mlungu nguti, pangali mlendo jwalijose jwangawumbala mu mtima kapena mcilu, atamose acalendo ŵakutama sikati ja Aisalaeli utacijinjila m'Nyumba jangu jeswela.”

Alefi ŵatyosisye mlikuga lya ŵakutaga mbopesi

¹⁰ Nambo Alefi uŵandesile une pa ndaŵi jele Aisalaeli ŵasokonecele pakujilambilaga milungu jine, tacipocela cilango ligongo lya ulemwa* wawo.

¹¹ Tacigamba kuŵa ŵakutumicila ni kulolelaga yipata M'nyumba jangu basi. Taciwulagaga nyama sya mbopesi syakutinisya ni mbopesi sine sya ŵandu. Myoyo taciŵa alimkwatumicila ŵanduwo.

¹² Jemanjaji ŵatumicilaga ŵandu pakujilambilaga milungu jine, myoyo ŵasokonesyaga Aisalaeli ni pakutenda yeleyi ŵanduwo ŵalemwaga. Ni ligongo lyakwe Une AMBUJE Mlungu ngulumbila kusyene kuti jemanjaji akwenela kupocela cilango ligongo lya ulemwa wawo.

¹³ Jemanjaji ngasandumicila Une mpela ŵakutaga mbopesi iyayi kapena kuyiŵandicila yindu yangu yeswela kapena kwinjila ku Malo Geswela Mnope. Tacitenda soni mnope ligongo lya masengo gawo gakunyalaya.

¹⁴ Nambope tinjaŵika kuti aloleleje Nyumba jangu ni kutumicilaga pa masengo gosope gakwenela kutendecekwa mwelemo.

Ŵakutaga mbopesi

¹⁵ AMBUJE Mlungu ŵatite kuti, “Ŵakutaga mbopesi ŵa mtundu wa Lefi ŵa mwiŵasa lya Sadoki, uŵapitilisyaga kulolela Nyumba jangu ndaŵi jele Aisalaeli ŵasokonecele ni kunjasa Une, jemanjajo taciŵandicila kwa Une kuti andumicileje, taciyika kwa Une kupeleka mbopesi sya mawuta ni miasi. Ni yinguti Une AMBUJE Mlungu.

¹⁶ Jemanjajipe basi ni ŵitacijinjila m'Nyumba jangu ni kutumicila pa malo gangu gakupelecela mbopesi, ni kupopelesyaga mwelemo.

¹⁷ Naga ali ajinjile pa cipata ca luŵala lwa mkati, tawaleje nguwo ja bafuta. Akasawala cakuwala cilicose ca manyunya pakutumicilaga pa yipata ya pa luŵala lwa mkati kapena mkati mwa Nyumba jangu.

¹⁸ Awaleje nduŵila mu mtwe ni kabudula sya bafuta ni ngataŵa cilicose cakutendesya citukuta.

¹⁹ Pakopoka kwawula kwa ŵandu ku luŵala lwa kusa, awuleje kaje yakuwala yiŵawete pakutumicila mkati, ni kuja kuyileka myipinda yeswela. Ni awale yakuwala yine, kogopela kuti tacipeleka uswela kwa ŵanduwo ni yakuwala yawoyo.

²⁰ “Ŵakutaga mbopesi akasasenga lupala kapena kusunga umbo syawo kuŵa syelewu mnope iyayi, nambo agambeje kusijilulape basi.

²¹ Jwakutaga mbopesi akamwa finyo ndaŵi jakwinjila mluŵala lwamkati.

²² Pakasimanikwa jwakutaga mbopesi kulombela jwamkongwe jwa masije kapena jwawumasile ulombela wakwe; nambo alombeleje mwali jwangamanyilila jwamlume jwa mtundu wa Aisalaeli kapena jwamkongwe jwamasije jwa jwakutaga mbopesi mjakwe.

²³ “Ŵakutaga mbopesi ŵajiganyeje ŵandu ŵangu kulekangana kwa yindu yeswela ni yangaswejela, soni yindu yakwenela ni yangajenela kupeleka mbopesi.

²⁴ Naga ukangani uli ubucile, ŵakutaga mbopesi tacilamulaga magambogo pakuya malamusi gangu. Asunjeje malamusi gangu pa masiku gangu gosope ga yindimba. Soni tasamaleje masiku gangu gakupumula kuti tigaŵe gamaswela.

²⁵ “Jwakutaga mbopesi akalisakasya pakukamula mundu jwam'we, nambo naga ali babagwe kapena mamagwe, mwanagwe jwamlume kapena jwamkongwe, mcimwene jwakwe kapena mlumbugwe jwangalombela, pelepo takombolece kulisakasya.

²⁶ Ali alisakesye myoyo, akwenela kwembecela masiku msano ni gaŵili, ni kaneko taciŵa ali aswejele soni.

²⁷ Sambano lisiku lyakuti ajinjile mluŵala lwamkati, ku malo geswela, kuti atumicile pa malo geswela, akwenela kupeleka mbopesi jakupecesya ulemwa. Ni yinguti Une AMBUJE Mlungu.

²⁸ “Ŵakutaga mbopesi akwenela ngapata cindu cilicose, cakupata cawo ni Une. Soni akasiŵapa yipanje mu Isalaeli; Une ni cipanje cawo.

²⁹ Jemanjaji tacilyaga yakupeleka ya yakulya, mbopesi syakupecesya ulemwa, ni mbopesi syakupecesya kumlemwecesya jwine ni yine yosope yakupelecedwa kwa Mlungu mu Isalaeli yiciŵa yawo.

³⁰ Yambone pa yosope yandanda gowola ni pa yine yosope yakupeleka, yiŵeje ya ŵakutaga mbopesi. Tiŵapeje soni ŵakutaga mbopesi mkate wandanda kuteleka, kuti upile utame m'nyumba mwawo.

³¹ Ŵakutaga mbopesi akalya cijuni kapena nyama jajiwile jika kapena jakamulwa.”