Esek 4 - Chiyawo Bible

Esekiele akuŵeceta ya ngondo ja ku Yelusalemu

¹ Mlungu ŵatite, “M'mwe mwanace jwa mundu, mjigale njelwa, mjiŵice pasogolo penu, nipo mjambule citusitusi ca msinda wa Yelusalemu.

² Msindawo mwusyungusye ni ngalande, mwunje matuto, mtaŵe masakasa, ni kuŵika yindu yagumulila.

³ Mjigale ciwaya ni mcijimice mpela lipupa lya cisyano pasikati pa m'mwejo ni msindawo. Mwulolecesye msindawo. Ukusumulidwa msindawo, nipo m'mwejo ni ŵatimciwusumula msindawo. Aci ticiciŵa cimanyisyo ca Aisalaeli.

^4-5 “Sambano mgonele kumciji kwenu, nipo tinjiŵika ulemwa* wa mtundu wa Aisalaeli penumwe. Kwa masiku 390 gatimkaŵe kweleko timkalaje ligongo lya ulemwa wawo. Namlamwile m'mwejo lisiku lililyose limo likwamba caka cimo cilicose ca cilango cawo mucicimalila.

⁶ Patim'malisye yeleyo, mkagalawucile kumlyo kwenu, nipo timcilaga ligongo lya ulemwa wa Yuda kwa masiku mcece, nipo lisiku limo lililyose likwamba caka camtundu ca cilango cawo.

⁷ “Mlolecesye kusumulwa kwa Yelusalemu. Ni mkono wenu mlolecesye mwakwamuka Yelusalemu.

⁸ Tinjimtaŵa ni ngonji kuti timlepele galawucila aku nakuku mpela kusumulwa kwa Yelusalemu kuli kumasile.

⁹ “Sambano mjigale tiligu, balele,* mbwanda, mbweso, mapemba ni mceŵele. Myiwanganye yosopeyi pampepe kuti mpanganye mkate. Yeleyi ni yicimcilyaga masiku 390 gele gatimcigonela mbali jimo.

¹⁰ Tacimkundisyaga kulya magalamu 230 ga mkate pa lisiku, nipo magalamu gelego gakwanileje mpaka lisiku linelyo.

¹¹ Timcimwaga soni mesi gakulinga, migawo jiŵili pa lisiku.

¹² Mkolesye moto ni ndoŵe sya ŵandu, ni mjoce mkate pa motowo, nipo mlye mkatewo ŵandu alikumwona.”

¹³ AMBUJE* ŵatite, “Buledi jweleju ali cilandanyo ca yakulya yangalumbana yele Aisalaeli tacilyaga ku yilambo ya cilendo kwele kutinjatopolela.”

¹⁴ Nambo une natite, “Iyayi, AMBUJE Mlungu, une nganinalisakasyeje jikape. Citandilile wanace wangu mpaka lelo nganindyeje nyama jakuwa jikape kapena jakamulwa ni yilombo. Nganindyeje nyama jilijose jakolanjidwa jangalumbana.”

¹⁵ Myoyo Mlungu ŵatite, “Cambone, tinamkunde kocela ndoŵe sya ng'ombe m'malo mwa ndoŵe sya ŵandu, pa malo gakocela mkatewo.”

¹⁶ Ni ŵaŵecete soni kuti, “M'mwe mwanace jwa mundu, tinanandiyicisye mkate ŵandu ŵa ku Yelusalemu. Ŵanduwo taciŵa ŵakudandawula ligongo tacilingaga yakulya yele yitacilyaga ni mesi gitacimwaga.

¹⁷ Myoyo yakulya ni mesi tiyicimala; taciŵa ŵakudandawula pa ndaŵi jitacilolegana, nipo tacimala ligongo lya ulemwa wawo.”