Esek 39 - Chiyawo Bible

Kupundidwa kwa Gogi

¹ “M'mwe mwanace jwa mundu, mlalicile yakumŵeceta Gogi, mumsalile kuti Une AMBUJE Mlungu nguti, nguŵengana namwe m'mwe Gogi, ŵamli ŵakulamula ŵakulungwa ŵa ku Mesheki ni ku Tubali.

² Tinjimsyungusya ni kumtopolela kusogolo, ni tinjimjigala kutyocela ku yilambo ya kwakutalika ya kumpoto, ni kumtuma kuti mkalimbane ni ŵandu ŵakutama ku matumbi ga ku Isalaeli.

³ Kaneko tinjitemanya ukunje wenu wa mwigasa lyenu lyamciji, ni kujitendekasya mipamba jenu kugwa mwigasa lyenu lyakumlyo.

⁴ Timcigwa ku matumbi ga ku Isalaeli, m'mwe pampepepe ni makuga genu gosope ga ngondo ni ŵandu wosope ŵali ni m'mwejo, soni tinjimtenda kuŵa cakulya ca yijuni ni yilombo yakwitinji.

⁵ Timciwila kwitinji kwalangulangu. Ni yinguti Une AMBUJE Mlungu.

⁶ Tinjitumisya moto mcilambo ca Magogi ni kwa ŵandu ŵakutama mwa mtendele mungulugulu nyasa, ni pelepo tacimanyilila kuti Une ni AMBUJE.

⁷ Tinjilolecesya kuti ŵandu ŵangu Aisalaeli akulimanyilila lina lyangu lyeswela, ni ngasingunda lina lyangu kuti lisakale soni. Ni yilambo yosope tiyicimanyilila kuti Une ni AMBUJE, Jwamswela jula jwa ku Isalaeli.”

⁸ “Une AMBUJE Mlungu nguti, lisiku linaŵecetaga lila lisigele panandi kwika.

⁹ Ŵandu ŵakutama m'misinda ja Aisalaeli tacijawula kusa kulokotanya yida ya ngondo yiŵayilesile kuti akayijoce moto mpela sasu; yakucijila, mawukunje, yomba, mapanga ni yimbonga soni yiciŵa yakwanila kwelecesya moto kwa yaka msano ni yiŵili.

¹⁰ Ngasalokotanya sasu kwitinji kapena gwisya yitela mu ukweti, moto wawo tacikolesya ni yidayo. Myoyo tacasumula ni kwajiŵila wele uŵasumwile ni uŵajiŵile jemanjajo.” Ni yinguti Une AMBUJE Mlungu.

Gogi akumŵika m'malembe

¹¹ “Pa lisiku lyelelyo tinjimpa Gogi malembe kuti tamsice mwelemo mcilambo ca Isalaeli, m'Ciŵata ca Ŵakwenda, kungopoko lyuŵa kwa Nyasa ja Njete. Gogi ni likuga lyakwe lyosope lya ngondo tacasika kweleko, ni ciŵataco ticicikolanjidwa ‘Ciŵata ca likuga lya ngondo lya Gogi.’

¹² Kwa miyesi msano ni jiŵili Aisalaeli taciŵa alimkusilila mitembo, kuti akolosye soni cilamboco.

¹³ Jwalijose jwa mcilambomo tacakamusya kwasilila jemanjajo, soni masengo gelego tigacapa ucimbicimbi pa lisiku litinjilosya lumbili lwangu. Ni yinguti Une AMBUJE Mlungu.

¹⁴ Pajicimala miyesi msano ni jiŵili, tacisagula ŵandu ŵitacijendela cilambo cosopeco kuti akalolesye mitembo jijasigalile ni kujisilila, myoyo kuti acikolosye cilamboco.

¹⁵ Pakwendagajendaga mcilambomo, ndaŵi josope pitacilisimanaga liwupa lya mundu, taciŵikaga cimanyisyo pambali pakwe kuti ŵakusola malembe akalisilile liwupalyo ku ciŵata ca likuga lya ngondo lya Gogi.

¹⁶ (Kweleko kwana soni msinda lina lyakwe likuga lya ngondo.) Myoyo cilamboco ticiciŵa cekolosye soni.”

¹⁷ “Sambano m'mwe mwanace jwa mundu, Une AMBUJE Mlungu nguti, myiŵilanje yijuni ni yinyama yosope yakwitinji kuti yilye mbopesi jingujipeleka kwa jemanjajo. Ticiciŵa cindimba cekulungwa cambopesi ku matumbi ga ku Isalaeli, kwele timkalye nyama ni kumwa miasi.

¹⁸ Timcilya nyama ja asilikali ŵamacili ni kumwa miasi ja ŵakulamulila ŵa cilambo capasi, wosopewo taciwulajidwa mpela ngondolo syasilume, ŵanace ŵangondolo, mbusi kapena ng'ombe sya mkambako syakwimbala sya ku Bashani.

¹⁹ Timcilya yakunakana mpaka kwikuta ni kumwa miasi mpaka kolelwa, pa cindimba cambopesi cingumkolocesya jemanja.

²⁰ Pa tebulo jangu timcijikuta pakulya mahaci ni ŵakwela ŵakwe, asilikali ni ŵakuputa ngondo ŵakulekanganalekangana. Ni nguti Une AMBUJE Mlungu.”

Isalaeli tacimwucisya

²¹ “Tinjilosya lumbili lwangu sikati ja ŵandu ŵa mitundu josope, ni tacilola mwele mutinjapela cilango ni ligasa lyangu lyele litinjasajika nalyo jemanjajo.

²² Kutandila pelepo mpaka msogolo, Aisalaeli tacimanyilila kuti Une ni AMBUJE Mlungu jwawo.

²³ Ŵandu ŵa yilambo yosope tacimanyilila kuti Aisalaeli ŵapite ku ukapolo ligongo lya ulemwa* uŵatesile kwa Une. Myoyo natyocele jemanjajo ni kwakunda amagongo ŵawo kuti ŵapunde ni kwawulaga jemanjajo ku ngondo.

²⁴ Natesile yeleyo ligongo lya ungaswejela wawo soni ni ulemwa wawo, myoyo nalesile kwene.”

²⁵ Yinguti Une AMBUJE Mlungu nayi, “Nambo sambano tinjiyitendela canasa yisukulu ya Yakobo,* ni Aisalaeli wosope ni kwatenda soni kuti aŵeje yakusimana cenene. Tinjilicinjilicisya lina lyangu lyeswela.

²⁶ Ŵanduwo pitacitamilicika mwa mtendele mcilambo cawo, pali pangali jwine jwakwasawusya, pelepo taciliŵalila yasoni yawo yiyawonecele ligongo lyangangulupilila Une.

²⁷ Pakusosa kwalosya ŵandu ŵa mitundu josope kuti une ndili jwamswela, tinjatyosya ŵandu ŵangu kutyocela ku yilambo yosope kwakutama amagongo ŵawo.

²⁸ Pelepo ŵandu ŵangu tacimanyilila kuti Une ndili AMBUJE Mlungu jwawo. Paja najawisye ku ukapolo sikati ja ŵandu ŵa mitundu jine,* ni sambano nawucisye soni wosope mcilambo cawo, ngamleka atamose jumo jose.

²⁹ Tinjatumicisya msimu wangu kwa Aisalaeli ni ngatyocela soni jemanjajo. Ni yinguti Une AMBUJE Mlungu.”