Esek 38 - Chiyawo Bible

Gogi cida ca Mlungu

¹ AMBUJE ŵaŵecete ni une kuti.

² “M'mwe mwanace jwa mundu, mumŵecete Gogi jwa cilambo ca Magogi, jwamkulungwa jwa ŵakulamula wa ma ucimwene ga Mesheki ni Tubali. Mumŵecete jwalakwejo

³ nipo mumsalile kuti Une AMBUJE Mlungu ndili m'magongo jwakwe.

⁴ Tinjimsyungusya, ni kumtega ni yisopo mkamwa mwenu, ni kumkopocesya pakulanguka pampepe ni likuga lyenu lyosope lya ngondo, mahaci ni ŵakwelapo ŵakwe, soni msilikali jwalijose taciŵa ajigele cakulicinjilicisya ni upanga.

⁵ Asilikali ŵakutyocela ku Pelesiya, ku Ifiyopiya ni ku Libiya ali yalumo ni jemanjajo, wosope akwete yakucijila ni yisoti ya ngondo.

⁶ Acalume wosope ŵa ngondo ŵa ku Gomeli ni Beta Togama ŵakutyocela kumpoto ali ni jwalakwe, soni ŵandu ŵajinji ŵa mitundu jine ŵaliji najo.

⁷ Mwasalile kuti aliŵicile cile nipo asilikali ŵakwe aŵe cile kumpikanila jwalakwe.

⁸ Yili yipite yaka yejinji, tinjimlamula jwalakwe kuti akajitaje ngondo cilambo cele ŵandu ŵasongene pampepe kutyocela kwa ŵandu ŵa mitundu jine* ni ŵatemi mwangajogopa ngondo. Tacigataga ngondo matumbi ga Aisalaeli, gele gali masame nipo ŵagalesile ndaŵi jekulungwa nambo sambano ŵandu wosope akutama mwa mtendele.

⁹ Nambo m'mwejo ni asilikali ŵenu ni ŵandu ŵa mitundu jinewo ŵimli nawo timkatanje ngondo mpela mbungo jamacili mnope nipo timcija kuwunicila cilambo cosope mpela mawunde.”

¹⁰ Ayi ni yakuti AMBUJE Mlungu kwa Gogi: “Pa lisiku lyelelyo, timcitanda kuganisya kutenda yindu yakusakala.

¹¹ Timciganisya yakuja kutaga ngondo cilambo cele ŵandu ŵakwe akutama mwa mtendele nipo misinda jakwe jangali ndenje syakupeleka citetelo.

¹² Timcijigala yipanje yawo ni kwajonanga ŵandu ŵakutama m'misinda jele jijaliji masame. Ŵanduwo ŵasongene kutyocela ku yilambo yejinji, soni akwete yilangwa ni katundu jwejinji, nipo akutama pasikati pa cilambo capasi.

¹³ Ŵandu ŵa ku Seba ni wa ku Dedani ni ŵamalonda ŵa ku Talishishi ni misi jakwe josope tacimwusya kuti, ‘Ana mwasonganyisye asilikali ŵenu ni kutaga ngondo kuti mjonanje ni kujigala yipanje? Ana mkusaka kujigala silifa* ni golidi,* yilangwa ni katundu, ni kwawulaga ni yele yipanjeyo?’ ”

¹⁴ Myoyo AMBUJE Mlungu ŵandumisye une m'mwe mwanace jwa mundu, kuti namsalile Gogi yiŵatiga kwa jwalakwejo: “Ndaŵi jele ŵandu ŵangu Aisalaeli tacitamaga mwa mtendele, timcityoka.

¹⁵ Timcityocela kumangwenu mbali syakwakutalika sya kumpoto, mli mkulilongolela likuga lyekulungwa, lya asilikali ŵamacili ŵa ngondo ŵa mitundu ja ŵandu, wosope ali akwesile mahaci.

¹⁶ Timciyika ni kulimbana ni ŵandu ŵangu Aisalaeli mpela mbungo jamacili jakonanga cilambo capasi. Pajicikwana ndaŵipo, tinjimtumisya kuti mkapute ngondo ni cilambo cangu kuti najilosye mitundu josope kuti Une nduni, kuti ndosye kuswejela kwangu patiyicinjitenda kupitila mwa m'mwejo.

¹⁷ Ana ngaŵa m'mwe ŵanaŵecetaga ya m'mwejo masiku gakala, kupitila mwa ŵakutumicila ŵangu, ŵakulocesya ŵa Isalaeli, kuti masiku gakwisaga tinjiyika najo jwine kuti talimbane ni Isalaeli.” Ni yakuti AMBUJE Mlungu.

Mlungu akumpa cilango Gogi

¹⁸ AMBUJE akuti, “Pa lisiku lyele Gogi tacitaga ngondo Isalaeli, lutumbilo lwangu tiluciŵa lwekulungwa mnope.

¹⁹ Ligongo lya lutumbilo lwangu lwa moto, ngulumbila kuti tikucitendekwa cisukunya cacikulungwa mcilambo cosope ca Isalaeli.

²⁰ Somba jilijose ni cijuni cilicose, cinyama cilicose cekulungwa ni camwana, ni mundu jwalijose jwakutama pa cilambo capasi tacitetemela ni woga. Matumbi tigacigwa, maganga tigacinyelenyenduka nipo lipupa lililyose tilicigwa.

²¹ Tinjimjogoya Gogi ni yindu yakwika ni ciwa. Ni yinguti Une AMBUJE. Ŵandu ŵakwe taciwulagana ni upanga jwine ni mjakwe.

²² Tinjimpa cilango ca yilwele ni ciwa. Tinjigwisya ula jakogoya ni matalila, moto ni sulufule* pa jwalakwejo ni asilikali ŵakwe ni ŵandu ŵa mitundu jine ŵajinji ŵali mbali jakwe.

²³ Amu ni mwele mucinjilocesya kwa mitundu josope kuti Une ndili jwamacili ni jwamswela. Myoyo pelepo tacimanyilila kuti Une ndili AMBUJE.”