Esek 37 - Chiyawo Bible

Ciŵata ca mawupa gejumu

¹ Jili jipite ndaŵi, nagapikene macili ga AMBUJE gali mkulamulila une, nipo Msimu wakwe wanjigalile une ku ciŵata cegumbale ni mawupa.

² AMBUJE ŵanjendesisye kusyungulila ciŵataco, nipo kulikose kunalolite nagaweni mawupa gamajinji nipo gejumu mnope.

³ Ni ŵatite kwa une, “M'mwe mwanace jwa mundu, ana mawupa aga mpaka gaŵe ni umi soni?” Une natite, “AMBUJE Mlungu, wawojo ni ŵampaka akombole kwanga yeleyi.”

⁴ Kaneko ni ŵasalile kuti, “Mgalalicile mawupaga. Mgasalile mawupa gejumuga kuti gapikane maloŵe ga AMBUJE.

⁵ Mgasalile mawupago kuti AMBUJE akuti: Tinjipepelela lipuje lyakupeleka umi mwa jemanja nipo timciŵa umi soni.

⁶ Tinjimpa jemanja mitasi ni minowu, ni kumwunicila jemanja ni cilu. Tinjipepelela lipuje lyakupeleka umi mwa jemanja nipo timciŵa umi soni. Pelepo timcimanyilila kuti Une ni AMBUJE.”

⁷ Ni nalalicile mpela mwele muŵalamulile. Ndilimkulalicila myoyo napikene lisegwe lyakuti gwebedegwebede, nipo mawupa gatandite kulumbikana pampepe liwupa ku liwupa lijakwe.

⁸ Katema kanalolite, mawupa gala gawunicilwe ni mitasi ni minowu, nipo soni ni cilu. Nambo mwaliji mwangali lipuje lyakupeleka umi kwa jemanjajo.

⁹ Mlungu ŵatite kwa une kuti, “M'mwe mwanace jwa mundu, mlalicile kwa lipuje lyakupeleka umi. Mlisalile lipuje lyakupeleka umilyo kuti AMBUJE akulamula kuti myice kutyocela mbali syosope mcece, kuti mpujile ŵandu ŵaweŵa, nipo kuti jemanjaji aŵe umi soni.”

¹⁰ Myoyo nalalicile mpela mwele muŵandumile. Lipuje lyakupeleka umi lyajinjile myiluyo, nipo jemanjajo ŵakwete umi ni ŵajimi. Nipo ŵaliji ŵajinji ŵampaka kupanganya likuga lya ngondo.

¹¹ Mlungu ŵatite kwa une kuti, “M'mwe mwanace jwa mundu, ŵandu ku Isalaeli ali mpela mawupa gelega. Akuŵeceta kuti jemanjajo ajumwile, nipo ali ŵangali cembeceyo ni ŵangali sogolo.

¹² Sambano mwalalicile ŵandu ŵangu Aisalaeli nipo mwasalile kuti, Une AMBUJE Mlungu, tingawukule malembe genu. Tingamkoposye mwelemo ni kumwucisya ku cilambo ca Isalaeli.

¹³ Pelepo timcimanyilila kuti Une ni AMBUJE, katema katinjiwukula malembe genu ni kumkoposya mwelemo, jemanja ŵandu ŵangu.

¹⁴ Tinjiŵika Msimu ŵangu mwa jemanja nipo timciŵa ni umi soni, panyuma pakwe tinjijakumtamika mcilambo cenu. Pelepo timcimanyilila kuti Une AMBUJE mbecete yeleyi, nipo nayitesile nditu, ni yakuti AMBUJE.”

Yuda ni Isalaeli atemi mu ucimwene umo

¹⁵ AMBUJE ŵaŵecete ni une soni kuti.

¹⁶ “M'mwe mwanace jwa mundu, mjigale simbo ni mlembe pa simbopo kuti, ‘Ucimwene wa Ayuda.’ Ni mjigale soni simbo jine ni mlembe soni kuti, ‘Ucimwene wa Aisalaeli’.

¹⁷ Sambano msijigale simbo siŵilisyo ni msilumbikanye kuti siŵe mpela simbo jimo.

¹⁸ Naga ŵandu ŵenu akumwusya ngopolelo syakwe sya yeleyi,

¹⁹ mwasalile kuti Une AMBUJE Mlungu ngukuti, sigele panandi kujigala simbo jikwimilila Isalaeli ni kujilumbikanya ni simbo jikwimilila Yuda. M'malo mwa simbo siŵili jiciŵa jimo nipo tinjijikamulila m'myala mwangu.

²⁰ “Ndaŵi jele simbo simlembilesyo siciŵa m'myala mwenu pameso pa ŵandu.

²¹ Pelepo timwasalile kuti Une AMBUJE Mlungu nguti, tinjaŵilanga Aisalaeli kutyocela ku yilambo yine yiŵapite, tinjasonganya malo gampepe kutyocela mbali syosope ni kwawucisya ku cilambo cawo.

²² Tinjatenda kuŵa mtundu umo mcilambomo, ku matumbi ga Isalaeli. Taciŵa ni mwenye jumo jutacalamulilaga jemanjajo, nipo ngasagaŵanikana kuŵa ŵandu ŵa mitundu jiŵili kapena ma ucimwene gaŵili.

²³ Ngasalisakasya ni milungu jine soni yindu yine yakunyalaya, kapena ni ya ulemwa* wawo yine yiliyose. Tinjakulupusya ku ulemwa wawo wosope, nipo tinjaswejesya. Mwamti jemanjajo taciŵa ŵandu ŵangu nipo Unejo tinjiŵa Mlungu jwawo.

²⁴ Jwakutumicila jwangu Daudi* taciŵa mwenye jwawo. Nipo wosope tacikamulana ni kuŵa pasi pa mkucinga jumo soni tacigapikanila malamusi gangu mwakusamala cenene.

²⁵ Tacitama mcilambo cele cinampele jwakutumicila jwangu Yakobo,* cele acinangolo ŵawo ŵatamaga. Jemanjajo pamo ni ŵanace ŵawo ni yisukulu yawo, tacitamaga kweleko mpaka kalakala. Ni jwakutumicila jwangu Daudi taciŵa jwakwalongolela mpaka kalakala.

²⁶ Tinjitenda cilanga* nawo casambano camtendele. Cilanga celeci ticiciŵa cawo mpaka kalakala. Tinjatamilisya ni kwaculuya soni tinjiŵika Nyumba jangu jakupopelela pasikati pawo mpaka kalakala.

²⁷ Nyumba jangu jiciŵa pasikati pawo. Une tinjiŵa Mlungu jwawo, nipo jemanjajo taciŵa ŵandu ŵangu.

²⁸ Pelepo ŵandu ŵa mitundu jine* tacimanyilila kuti Une AMBUJE, natesile Aisalaeli kuŵa ŵaswela ligongo lyakuti Nyumba jangu jili pasikati pawo mpaka kalakala.”