Esek 36 - Chiyawo Bible

Mlungu akumpa upile Isalaeli

¹ AMBUJE ŵaŵecete ni une acitiji kuti, “M'mwe mwanace jwa mundu, mŵecete kuti ni matumbi ga ku Isalaeli kuti gapikanile utenga wele Une,

² AMBUJE Ŵamaciligosope ungwete wa jemanjajo: Amagongo ŵenu ŵaŵecete kuti, ‘Sambano cilambo cakala ca matumbi gakala cila cili cetu.’

³ “Ni sambano mlocesye, yele Une AMBUJE Ŵamaciligosope yinguti. Ndaŵi jiŵamtesile amagongo ŵenu kuŵa cipululu ni kumpondelesya kutyocela kumbali syosope, soni jemanja ni kuŵa kumkamwile ŵandu ŵa mitundu jine* jakuŵandikana nawo ni kujigala yindu ya ku matumbi ga ku Isalaeli, wosopewo ŵanyosisye Isalaeli.

⁴ Sambano jemanja matumbi ga ku Isalaeli, mpikane yele Une AMBUJE Mlungu yingugasalila matumbi, malo gakuseleleka mnope ni yiŵata, masame ni misinda jigambile kuŵa jangali ŵandu jele jajijigalileje yindu yakwe ni kujinyosyaga ŵandu ŵa mitundu jakumsyungulila.

⁵ “Une AMBUJE Mlungu nguti, mbele ndilimkuŵeceta ndili ni lutumbilo lwakogoya, kwajimba magambo ŵandu ŵa mitundu jine josope, mnopemnope ŵa ku Edomu.

⁶ “Myoyo mgombelesye ya cilambo ca Isalaeli, soni mgasalile matumbi ni matumbi gamwana, malo gakuseleleka ni yiŵata, maloŵe gele Une AMBUJE Mlungu, ganguŵeceta ni lutumbilo, ligongo lyakuti mwapimilile kumnyosya kukwatyocelaga kwa ŵandu ŵa mitundu jine.

⁷ Myoyo Une AMBUJE Mlungu lumbile kuti ŵandu ŵa mitundu jijimsyungulilejo nombe nawo tacinyosyedwa.

⁸ Nambo m'matumbi ga ku Isalaeli, yitela yicisipuka soni masamba ni kusogola yisogosi ya ŵandu ŵangu Aisalaeli. Pakuti msigele panandi kuwujila ku musi.

⁹ Une ndili mbali jenu, nipo tinjilolecesya kuti cilambo cenu ticilimidwe soni ni kupanda mbeju mwelemo.

¹⁰ Tinjitupiya ŵandu mwa jemanja soni mcilambo cosope ca Aisalaeli. M'misinda timuciŵa mwana soni ŵandu, nyumba sisyaŵele masame ticisitaŵidwa soni.

¹¹ Tinjitupiya ŵandu ŵenu pampepe ni yinyama yakwe. Tacitupa kusyene soni taciŵeleka ŵanace ŵajinji. Tinjimkunda kuti mtameje kweleko mpela mumwatamilaga kala, soni tinjimtendesya jemanja kuti yimjendeleje cenene kupunda kala. Pelepo timcimanyilila kuti Une ni AMBUJE.

¹² Tinjimwusya jemanja ŵandu ŵangu Aisalaeli, kuti mtame soni mcilambomo. Ticiciŵa cilambo cenu, soni ŵanace ŵenu ngasalaga mwelemo.

¹³ “Une AMBUJE Mlungu nguti: Yakuwona kuti ŵandu ŵane akuŵeceta kuti m'mwe ni cilambo cakulya ŵandu ŵakwe, soni cakusumula ŵanace ŵa mtundu wakwe.

¹⁴ Ngasimlya soni ŵandu, kapena kusumula ŵanace ŵa mtundu wenu. Ni yinguti Une AMBUJE Mlungu.

¹⁵ Ngasingunda kuti jemanja mpikane soni yakunyosya ya ŵandu ŵa mitundu jine, kapena kupimilila kumŵeceta kwawo. Jemanja ngasimsumula soni ŵanace ŵa mtundu wenu. Ni yinguti, Une AMBUJE Mlungu.”

Ya umi wasambano wa Isalaeli

¹⁶ AMBUJE ŵaŵecete ni une kuti.

¹⁷ “M'mwe mwanace jwa mundu, ndaŵi jele Aisalaeli jiŵatamaga mcilambo cawo, ŵacisakesye ni ndamo syawo syakusakala ni yitendo yawo. Nayiweni kuti ndamo syawo syaliji syakunyalaya pa ya dini, mpela jwamkongwe jwele jwali kundaŵi jakwe.

¹⁸ Napele cilango mwa ukali ligongo lya miasi ja ŵandu jiŵasulwisye jemanjajo mcilambomo, ni milungu jine jele jemanjajo ŵasakesye najo cilamboco.

¹⁹ Napwilingenye jemanjajo pasikati pa ŵandu ŵa mitundu jine, ni kwawula ku yilambo yine. Napele cilango ligongo lya ndamo syawo ni masengo gawo.

²⁰ Kulikose kuŵajawulaga jemanjajo, ŵalisakasyaga lina lyangu lyeswela, myoyo ŵandu ŵaŵecetaga kuti, ‘Aŵa ni ŵandu ŵa AMBUJE, nambo coseco ŵatyosisye ku cilambo cakwe.’

²¹ Nambo nadandawulaga ligongo lya lina lyangu lyeswela, lyele Aisalaeli ŵalisakesye ndaŵi jiŵatamaga sikati ja ŵandu ŵa mitundu jine kwele kuŵapite.

²² “Myoyo mwasalile Aisalaeli kuti Une AMBUJE Mlungu maloŵe gangu naga: Yitindende, nginayitenda ligongo lya jemanja Aisalaeli iyayi, nambo ligongo lya lina lyangu lyeswela limwalisakesye sikati ja ŵandu ŵa mitundu jine kwele kumwapite.

²³ Lina lyangu lyakupikanika limlicembulwisyeje sikati ja ŵandu ŵa mitundu jine, tinjililosya kuti lili lyeswela. Sambano ŵandu ŵa mitundu jinewo pitacimanyilila kuti ndosisye uswela wa lina lyangu kupitila mwa jemanja, tacimanyilila kuti Une ni AMBUJE. Ni yinguti Une AMBUJE Mlungu.

²⁴ Tinjimtyosya sikati ja ŵandu ŵa mitundu jinejo, ni kumsonganya kutyocela ku yilambo yosope, ni kumwucisya ku cilambo cenu.

²⁵ Tinjimtaga jemanja mesi gambone nipo timciswejela, yosope yakumsakasya yicityoka. Soni tinjimswejesya pakujityosya milungu jenu jine josope.

²⁶ Tinjimpa mtima wasambano ni nganisyo syasambano. Tinjiwutyosya mtima wakulimba mpela liganga ni kumpa mtima wakoloŵa mpela mnowu.

²⁷ Tinjiŵika msimu wangu mwa jemanja ni kumtendesya kuti mgakuyeje ni kugasunga malamusi gangu.

²⁸ Timcitama mcilambo cinapele acinangolo ŵenu. Jemanja timciŵa ŵandu ŵangu, nipo Une tinjiŵa Mlungu jwenu.

²⁹ Tinjimkulupusya ku yosope yiyimsakesyeje jemanja. Tinjilamulila tiligu kuti juŵe jwejinji, soni ngasiyika najo sala kwa jemanja.

³⁰ Tinjiculuya yagowola ya myitela ya yisogosi ni ya m'migunda jenu, myoyo ngasimnyosyeka soni ligongo lya sala pasikati ja ŵandu ŵa mitundu jine.

³¹ Pelepo timcikumbucila ndamo syenu syakusakala ni masengo genu gakusakala gimwatesile, timcitenda soni ligongo lya ulemwa* ni yakunyalaya yimwayitesile.

³² Ngingutenda yeleyi ligongo lya jemanja. Ni yinguti Une AMBUJE Mlungu. Myoyo jemanja Aisalaeli, mtende soni ni gwisya ngope syenu ligongo lya ndamo syenu syakusakala.”

³³ Yinguŵeceta Une AMBUJE Mlungu nayi, “Ndaŵi jitinjityosyaga ulemwa wenu, tinjiŵikamo ŵandu m'misindamo, ni kutaŵa soni nyumba sya masame.

³⁴ Ni cilambo cicagambile kuŵa masame cila, ŵandu tacilimaga soni. Kala ŵakupita mwitala ŵaciwonaga cilamboco mpela cipululu, nambo sambano taciciwonaga kuti cikulimidwa.

³⁵ Myoyo ŵandu tacitiji, cilambo cicaliji masame cila ciŵele mpela mgunda wa Edeni. Sambano mukutama ŵandu m'misinda mumwaliji masame mwangasalala mula soni misindajo sambano jikwete mapupa gakulicenjela gakulimba.

³⁶ Ŵandu ŵa mitundu jine uŵasigele ciŵandika ni jemanja, tacimanyilila kuti Une AMBUJE ni junataŵile misinda jijajonasice ni kupanda yindu yasambano mcilambo cicaliji masame. Une AMBUJE ni yinguti, soni tinjiyitenda kusyene.”

³⁷ Une AMBUJE Mlungu nguti, “Tinjakunda Aisalaeli kuti aŵende yakusaka kuti natendele, tinjaculuya ŵandu mpela ngondolo.

³⁸ Tacitupa mpela ngondolo sya ku Yelusalemu siŵasipelekaga kala mbopesi ndaŵi ja cindimba. Myoyo misinda jawo jijaliji masame jila tijicigumbala ni makuga ga ŵandu, ni pelepo tacimanyilila kuti Une ndili AMBUJE Mlungu.”