Esek 35 - Chiyawo Bible

Mlungu tacipeleka cilango ku Edomu

¹ AMBUJE* ŵaŵecete ni une kuti,

² “M'mwe mwanace jwa mundu, mcijimbe magambo cilambo ca Edomu.

³ Mwasalile ŵandu kweleko yinguŵeceta une AMBUJE: Une ndili m'magongo jwenu, jemanja matumbi ga ku Edomu! Tinjimpasulanya jemanja kuŵa ŵangasosekwa.

⁴ Tinjijile ka misinda jenu kuŵa masame nipo cilambo cenu tinjicijonanga; Pelepo timcimanyilila kuti Une ni AMBUJE.

⁵ “Jemanja mwaliji amagongo ŵa Aisalaeli ndaŵi syosope nipo mwakundaga kuti ŵandu ŵakwe awulajidweje pa ndaŵi ja yisawusyo, pa ndaŵi jele cilango cawo paticiciyika pasyesyene ligongo lya ulemwa* wawo.

⁶ Myoyo pakuŵa ndili AMBUJE Mlungu jwa umi, ciwa ticicimkuya jemanja, nipo jemanja ngaŵa mkombola kulupuka. Mwalemwisye ligongo lyakuwulaga ŵandu, nipo jemanja ciwa ticicimkuya.

⁷ Tinjicitendesya cilambo cakumatumbi ga Edomu kuŵa cangali masengo nipo tinjiwulaga jwalijose jwakwenda mwelemo.

⁸ Tinjigawunicila matumbi ni mitembo, nipo mitembo ja ŵandu uŵawulajidwe ku ngondo tijiciwunicila matumbi ni yiŵata.

⁹ Tinjijonanga cilambo cenu mpaka kalakala, nipo pangali atamose jumo jutacitamaga m'misinda jenu. Pelepo timcimanyilila kuti Une ndili AMBUJE.

¹⁰ “Jemanja mwaŵecete kuti mitundu jiŵili, Yuda ni Isalaeli yaliji ya jemanja pampepe ni yilambo yawo, nipo kuti timcijigala malo gawogo atamose Une AMBUJE ndili Mlungu jwawo.

¹¹ Myoyo pakuŵa ndili AMBUJE Mlungu jwa umi, tinjimwucisya lutumbilo lwenu, wiwu wenu ni uŵengani wuwaliji pa ŵandu ŵangu. Tacimanyilila kuti ngwapa cilambo jemanja ligongo lya yele yimwatesile kwa jemanjajo.

¹² Nipo timcimanyilila kuti Une AMBUJE mbikene maloŵe genu gosope gakunyosya matumbi ga ku Isalaeli. Mwaŵecetaga kuti, ‘Matumbi ga ku Isalaeli agalesile nipo atupele uwe kuti tugajonanje.’

¹³ Napikene kulilapilila kwenu kumwatendaga pakuŵeceta mli mkulimbana ni Une.”

¹⁴ AMBUJE akuŵeceta kuti, “Tinjimtenda kuŵa masame mwamti cilambo cosope capasi cicisangalala ni kugwa kwenu,

¹⁵ mpela mwele mumwasangalalile kugwa kwa Isalaeli, cakupata cangu. Matumbi ga Seyili ni cilambo ca Edomu, ticiciŵa masame. Pelepo jwalijose tacimanyilila kuti Une ni AMBUJE.”