Esek 34 - Chiyawo Bible

Ŵakucinga ŵa Aisalaeli

¹ AMBUJE* ŵaŵecete ni une kuti.

² “M'mwe mwanace jwa mundu,” mwasalile ŵandu maloŵe gakwajimba magambo ŵakucinga ŵa Aisalaeli. Mgombelesye ni mwasalile jemanjajo yakuti AMBUJE Mlungu: Likungu kwa jemanja ŵakucinga ŵa ku Isalaeli, ŵimgambileje kulisamalila mwacimsyenepe basi. Ana ngaŵa ŵakucinga akusasamalilaga ngondolo?

³ Mkusamwa mkaka, mkusawala ya manyunya, mkusawulaga nyama syakwimbala. Nambo ngamkusasisamalilaga ngondolo kose.

⁴ Ngondolo syakulepetala nganimsilimbanganya, syakulwala nganimsiposya, syakuwulala nganimsitaŵa maŵanga gakwe, syakusokonecela nganimsiwusya, soni syakwasika nganimsisosasosa. Nambo mwasilangaga mwakusilagasya ni mwa ngalwe.

⁵ Myoyo syagambaga kuŵa balalabalala, ligongo paliji pangali mkucinga, myoyo syaliji yakulya ya yilombo ya mwitinji.

⁶ Ngondolo syangu syagamba kwendajenda ku matumbi gamalewulewu. Syapwilingene mcilambo cosope capasi, soni paliji pangali jwakusikuya kapena kusisosasosa.

⁷ “Sambano jemanja ŵakucinga, mpikanile yele Une AMBUJE yingumsalilayi.

⁸ Kusyene nguti Une ndili AMBUJE Mlungu jwa umi, ngondolo syangu syakamwilwe ni yilombo ya mwitinji, ni syaŵele yakulya ya yilomboyo ligongo lyakusoŵa mkucinga. Ŵakucinga ŵangu nganasikuya ngondolo syangu. Ŵagambaga kusamala yawope acimsyene basi, ngaŵaga ngondolo syangu.

⁹ Sambano jemanja ŵakucinga, mpikanile maloŵe ga Une AMBUJE Mlungu.

¹⁰ Nguti, Une timbe m'magongo jwenu jemanja ŵakucinga. Tinjimsumula ngondolo syangu jemanja soni ngasimsilisya. Tinjimtyosya pa masengo genu gakucinga, kuti ngasimsamala soni yenupe. Tinjisikulupusya ngondolo syangu kukamwa kwenu ni ngasisimlya soni.

Mkucinga jwambone

¹¹ “Yinguŵeceta Une AMBUJE Mlungu nayi, sambano tinasisosesose ngondolo syangu namsyene ni kusisamalilaga.

¹² Mpela mkucinga jwakusajawula ni kusisosasosa ngondolo syakwe ndaŵi jisibalalikengane kwakutalika, Une soni tinjitenda myoyo kuja kusisosasosa ngondolo syangu. Tinjisikulupusya kulikose kusyabalalikanganile pa ndaŵi ja cipi ni jakogoya.

¹³ Tinjisityosya pasikati pa ŵandu ŵa mitundu josope, ni kusisonganya pampepe kutyocela ku yilambo yine, ni kusiwucisya ku cilambo cakumangwawo. Tinjisilicisya ku matumbi ga ku Isalaeli, pakuŵandikana ni sulo, ku malo gosope gambone kwakutama ŵandu.

¹⁴ Tinjija kusilicisya ku mopo wambone, soni tisicilyaga mopo wakwimbalisya ku matumbi gamalewu ga ku Isalaeli. Kweleko tisikapumuleje pa malo gakulila ga mopo wambone. Sikalyeje mopo wambone wa ku matumbi ga ku Isalaeli.

¹⁵ Une namsyene tinjiŵa mkucinga jwangondolo syangu, soni Une tinjisipumusyaga. Ni yinguti Une AMBUJE Mlungu.

¹⁶ “Tinjisisosasosa sisyajasice, syakusokonecela tinjisiwusya, sisyawulele tinjisitaŵa maŵanga gakwe. Syakulepetala tinjisilimbanganya, nambo syakwimbala ni syamacili tinjisijonanga. Tinjisilisyaga mwa cilungamo.”

¹⁷ “Sambano jemanja, ngondolo syangu, Une AMBUJE Mlungu ngumsalila kuti, tinjilamula pasikati pa ngondolo ni mbusi, pasikati pa ngondolo syasilume ni mbusi syasilume.

¹⁸ Ana ngimkusajikutila kulya mopo wambonewu? Nambi mkusayiliŵatila cici yele yingamkusalya? Ana ngimkusajikutila pimkumwa mesi gambone? Nambi mesi gangamkusamwa mkusagaŵilisyaga cici ni sajo syenu?

¹⁹ Ana mkusaka kuti ngondolo syangu sisilyeje mopo umwawuliŵeteliŵete ni sajo syenu ni kumwaga mesi gimwaŵilisye ni sajo syenu?

²⁰ “Sambano Une AMBUJE Mlungu ngumsalila kuti, Une namsyene tinjisilamula ngondolo syakwimbala ni syaganda.

²¹ Mwasitutile kumbali syakulepetala pakusigunda ni misengo jenu, ni kusibalalicisya kwakutalika.

²² Nambo tinjisikulupusya ngondolo syangusyo, ngasingunda soni kuti sikamulwe. Tinjilamula pasikati pa ngondolo ni ngondolo jijakwe.

²³ Tinjisiŵicila mkucinga jumo, jwakutumicila jwangu Daudi.* Jwalakwejo ni jutacisisamalilaga soni taciŵa mkucinga jwakwe.

²⁴ Pelepo Une AMBUJE tinjiŵa Mlungu jwawo, ni jwakutumicila jwangu Daudi taciŵa mwenye jwawo. Ni yinguti Une.

²⁵ Tinjitenda cilanga* ca mtendele ni jemanjajo soni tinjiyityosya yilombo yakogoya mcilambomo, kuti sitameje ni citetelo mcipululu ni gonaga muwukweti.

²⁶ “Tinjatamika ŵandu ŵangu ciŵandika ni litumbi lyangu, ni tinjagwicisya ula pa ndaŵi jakwe, tijiciŵa ula ja upile.

²⁷ Yitela ya m'migunda tiyicisogola yisogosi, soni migunda jiciŵa ni mbeju syakwe, pelepo ŵandu tacitama mwamtendele mcilambo cawo. Tacimanyilila kuti Une ni AMBUJE, ndaŵi jitinjitemanya makongwa gawo ni kwakulupusya kwa ŵele uŵakamwile ukapolo.

²⁸ Ŵandu ŵa mitundu jine* ngasiŵajonanga soni, nipo yilombo yakwitinji ngisiyalya. Tacitama mwa mtendele pangali jwine jwakwajogoya.

²⁹ Tinjiculuya yakulima yawo, mwakuti ngasawa soni ni sala mcilambomo, mwakuti ŵandu ŵa mitundu jine ngasiŵanyosya soni.

³⁰ Myoyo tacimanyilila kuti Une AMBUJE Mlungu ndili nawo, soni jemanjajo, Aisalaeli ali ŵandu ŵangu. Ni yinguti Une AMBUJE Mlungu.

³¹ “Jemanja ni ngondolo syangu, syele singusasilisya, soni Une ni Mlungu jwenu. Ni yinguti Une AMBUJE Mlungu.”