Esek 33 - Chiyawo Bible

Mlungu akumŵika Esekiele kuti aŵe jwakulondela

¹ AMBUJE* ŵaŵecete ni une acitiji,

² “M'mwe mwanace jwa mundu, mwasalile ŵandu ŵa mtundu wenu yayikusatendekwa naga ndili ndumisye ngondo mcilambo. Ana ngaŵa ŵandu ŵa mcilambomo akusasagula mundu jumo sikati jawo kuti aŵe jwakulondela.

³ Jwalakwe naga akumwona m'magongo alimkwisa, akusalisya lipenga kuti amanyisye jwalijose.

⁴ Naga jwine akulipikana lipengalyo ni ngalitendela masengo, pelepo m'magongo jula ni kwika ni kumwulaga jwalakwejo, ni kuti jwalakwe aliwulajisye msyene.

⁵ Aliwulajisye jikape ligongo nganapikanila lipengalyo. Nambo akalitendele masengo lipengalyo, akakulupwice.

⁶ Nambo naga mlondajo akumwona m'magongo alimkwisa, ni jwalakwejo ngalisya lipenga kuti ŵamanyisye ŵandu, m'magongojo ni kwika ni kuwulaga mundu jwine, atamose akuti mundujo awilile ulemwa* wakwe, nambo Une tinjimjimba magambo mlondajo ligongo lya ciwa camjakwejo.

⁷ “Sambano m'mwe mwanace jwa mundu, ngumŵika kuŵa mlonda jwa Aisalaeli. Ndaŵi jilijose naga mkupikana maloŵe gangu, mwamanyisyeje jemanjajo.

⁸ Naga ngusala kuti mundu jwakulemwa taciwa nambo m'mwejo ni ngamsalila kuti alece ndamo syakwe syangalumbanasyo, kuti aŵepe ni umi, mundujo taciwa kwene ali jwakulemwa, ni m'mwejo tinjimjimba magambo ligongo lya ciwa cakweco.

⁹ Nambo naga mundu jwakulemwa mkumsalila kuti alece matala gakwe gangalumbana, jwalakwe ni kupitilisyaga ndamo syakwe syangalumbana, taciwa ali jwakulemwa, nambo m'mwe timcikulupusya umi wenu.”

Ulamusi wa mundu jwalijose

¹⁰ AMBUJE ŵaŵecete ni une acitiji kuti, “M'mwe mwanace jwa mundu, mwawilicisye Aisalaeli ayila yiŵaŵecetaga yila kuti: ‘Tusitopelwe ni ulemwa wetu ni yitendo yangalumbana yele yitwatesile yitukuganda nayo sambano. Ana uwe mpaka tuŵe ni umi uli?’

¹¹ Mwasalile kuti Une AMBUJE Mlungu jwacijumi nguti, jwangasangalala ni ciwa ca mundu jwakulemwa. Tinjinonyelwa kuti alece kulemwako kuti aŵe ni umi. Jemanja Aisalaeli, mlece ulemwa umkutendawo. Ana ligongo cici mkusaka kuwa?

¹² “Sambano m'mwe mwanace jwa mundu, mwasalile ŵandu ŵenu kuti, mundu jwakutenda yambone naga alemwisye, yambone yosope yiŵayitesile ngasiyimkulupusya. Naga jwa ulemwa akuleka kulemwa, ngasapocela cilango. Nambo naga mundu jwakutenda yambone akutanda yakulemwa, ngasaŵa soni cijumi.

¹³ Atamose namsalile mundu jwakutenda yambone kuti timciŵa cijumi, jwalakwe ni gamba kulupilila yambone yiŵayitesile yila ni kutanda kulemwa, yambone yosope yiŵayitesile yila tiyiciliŵalicika. Taciwila ulemwa wakwewo.

¹⁴ Myoyo soni naga ngumtetela mundu jwa ulemwa kuti taciwa, sambano jwalakwe ni kuleka kulemwako, ni kutendaga yakulungamika ni yambone,

¹⁵ mpela kuwusya cikole ciŵajigele ligongo lya ngongole, kuwusya yiŵajiŵile, kuleka kulemwa ni kusungaga malamusi gakupeleka umi, kusyene ngasawa, taciŵa ni umi.

¹⁶ Tinjimkululucila ulemwa wakwe uŵatesile, ni taciŵa ni umi ligongo atesile yakulungamika soni yambone.

¹⁷ “Nambo ŵandu ŵenu akuti yingutenda une nganiyiŵa yakulungamika; Iyayi, nambo ndamo syawo ni sili syangalumbana.

¹⁸ Nambo naga mundu jwakutenda yambone alesile kutenda yamboneyo ni kutanda kutenda yakusakala, taciwa nayo.

¹⁹ Ni naga mundu jwa ulemwa alesile kulemwa, ni kutendaga yakulungamika ni yambone, tacikulupusya umi wakwe.

²⁰ Nambo jemanja Aisalaeli, mkusati yingutenda Une yili yangalungamika. Iyayi, tinjimlamula jwalijose jwa jemanja pakuya yitendo yakwe.”

Mbili ja kugwa kwa Yelusalemu

²¹ Pa lisiku lyamsano lya mwesi wa likumi caka ca likumi ni yiŵili ya ukapolo wetu, mundu juŵakulupwice ku Yelusalemu, jwayice ni jwasalile kuti msinda ugwile.

²² Ligulo mundu jula mkanayice, nakamwilwe ni macili ga AMBUJE. Nambo kundaŵi kwakwe piŵayice mundu jula, AMBUJE ŵambucisye macili gakuŵecetela mwamti nganimba soni jwangaŵeceta.

Ulemwa wa ŵandu

²³ AMBUJE ŵaŵecete ni une acitiji kuti,

²⁴ “M'mwe mwanace jwa mundu, ŵandu ŵele ŵakutama ku misinda ja masame ku cilambo ca Isalaeli akuŵeceta kuti: ‘Abulahamu* ŵaliji mundu jumpepe jika juŵapocele cilambo cosope; nambo uwe tuli ŵajinji, myoyo sambano cilamboco cili cetu.’

²⁵ “Sambano mwasalile jemanjajo yinguti Une AMBUJE Mlungu: Mkulya nyama jili ciŵela miasi. Mkujilambila milungu jine jakupanganya. Mkusimwawula ŵandu. Ana sambano cilamboco mpaka ciŵe cenu?

²⁶ Jemanja mkusakulupilila mawupanga genu. Mkusatenda yakunyalaya, soni jwalijose akutenda cikululu ni jwamkongwe jwa mjakwe. Ana cilamboco mpaka ciŵe cenu?

²⁷ “Mwasalile kuti, Une AMBUJE Mlungu jwacijumi ngwatetela jemanjajo kuti, ŵandu ŵakutama m'misinda ja masame taciwulajidwa ni upanga. Ŵele uŵasigalile m'misi, tinjapeleka ku yilombo kuti tiyalye. Ŵele uŵajuŵile m'matumbi ni mu mbanga, taciwa ni yilwele.

²⁸ Tinjicitenda cilamboco kuŵa cipululu cangali masengo, soni macili giŵalikwecesyaga nago tigacimala. Matumbi ga ku Isalaeli tigaciŵa gakogoya mwamti mundu ngaŵa mkupita.

²⁹ Patinjapa cilango ŵandu ligongo lya ulemwa wawo uŵatesile ni kucitenda cilamboco kuŵa cangali masengo, pelepo tacimanyilila kuti Une ndili AMBUJE.”

Yakuyicisya ya utenga wa jwakulocesya

³⁰ AMBUJE ŵaŵecete ni une acitiji kuti, “M'mwe mwanace jwa mundu, ŵandu ŵenu akuŵeceta yenumwe katema kakusimana m'mapupa ga msinda kapena m'milango ja nyumba syawo. Akusasalilana kuti, ‘Kwende sambano tujawule tukapikane yele yaŵecete AMBUJE.’

³¹ Ŵandu akusasongana kwa m'mwejo ni kutama pasi kuti apikane yitimŵecete m'mwejo. Nambo pitayipikanepo, ŵangayitendela masengo. Yakuŵeceta yawo yikusalosya cinonyelo, nambo mitima jawo jikusagamba kusosa kupata basi.

³² Kwa jemanjajo nganimŵa kandu kose, mli mundu wamba basi jwagamba kwimba nyimbo syacinonyelano ni jwakwimba cenene cida cakwimbila. Akusagapikana maloŵe genu gosope nambo ngagatendela masengo.

³³ Nambo yele yimŵecete patiyicitendecekwa — soni tiyiciŵa yakuwona — pelepo tacimanyilila kuti sikati jawo paliji pana kusyene jwakulocesya.”*