Esek 32 - Chiyawo Bible

Mwenye jwa ku Iguputo akumlandanya ni ngwena

¹ Pa lisiku lyandanda lya mwesi wa likumi ni jiŵili lya caka ca likumi ni yiŵili ya ukapolo wetu, AMBUJE* ŵaŵecete kwa une kuti.

² “M'mwe mwanace jwa mundu, mwajimbile Mwenye jwa ku Iguputo,* Mwenye jwa ku Iguputo nyimbo ja malilo. Mwasalile utenga awu kuti: M'mwe mkulitenda mpela lisimba pasikati pa ŵandu ŵa mitundu, nambo mli mpela ngwena jakumisa mesi mu lusulo. Mkusaŵilisya mesi ni sajo syenu ni kulusakasya lusulo.

³ AMBUJE Mlungu akuti: tinjimponyela likoka m'mwejo ndaŵi jitacisongana ŵandu ŵa mitundu josope nipo tinjimwutila ku mkuli.

⁴ Tinjimponya pa mkuli ni kumjasa pasi ni kwika nayo yijuni ni yinyama ya cilambo cosope kuti tiyimlye.

⁵ Tinjiwunicila matumbi ni yiŵata ni cilu cenu cewole.

⁶ Tinjipungula miasi jenu mpaka jili jijendelele m'matumbi gosope ni gumbala sulo.

⁷ Patinjimjonangapo, tinjiciga kwinani nipo tinjiŵilisya ndondwa. Lyuŵa tilicisisika m'mawunde nipo mwesi ngasiwuŵala soni.

⁸ Tinjisimisya yakuwala yosope ya mwinani, nipo cilambo cenu cosope tinjicitendesya cipi. Une AMBUJE Mlungu ni yinguti.

⁹ “Mitundu ja ŵandu jejinji tijicilaga m'mitima jawo, ndaŵi jinjimtumisyaga ku ukapolo pasikati pa mitundu jine, ku yilambo yele yingamkuyimanyilila.

¹⁰ Tinjisimonjesya mitundu jejinji ni yele yiticimgwila. Ayimwene ŵawo tacitetemela ligongo lya jemanja, patinjalosya upanga wangu. Pa lisiku lya kugwa kwenu, jwalijose tacitetemela paganicisya umi wakwe.”

¹¹ Pakuti AMBUJE Mlungu akuti, “Upanga wa mwenye jwa ku Babiloniya ucimsimana.

¹² Tinjiwulaga asilikali ŵenu wosope ni upanga wa asilikali ŵamacili mnope kupunda mitundu jine josope. Ŵandu ŵenu wosope ni yindu yosope yimkupocela tiyicijonanjidwa.

¹³ Tinjiwulaga yilangwa yenu yosope yakutama ciŵandika ni mesi. Kuciŵa kwangali ŵandu kapena yinyama yampaka kuwilisya mesi soni.

¹⁴ Panyuma pakwe tinjiswejesya mesi kweleko nipo sulo sicijilima mpela mawuta. Une AMBUJE Mlungu ni yinguti.

¹⁵ Patinjimtendesya Iguputo kuŵa masame nipo cilambo cosope ndilinacijonasile pakwawulaga wosope ŵakutama kweleko, ni tacimanyilila kuti Une ni AMBUJE.

¹⁶ Maloŵe gakumtetela gelega tigaciŵa nyimbo ja malilo. Acakongwe ŵa mitundu ja cilendo tacijimba nyimbo, kwimbila Iguputo ni ŵandu ŵakwe wosope. Une AMBUJE Mlungu ni yinguti.”

Cilambo ca ŵandu ŵawe

¹⁷ Pa lisiku lya likumi ni msano lya mwesi wandanda, caka ca likumi ni yiŵili ya ukapolo, AMBUJE ŵaŵecete ni une kuti.

¹⁸ “M'mwe mwanace jwa mundu, mlile mnope ligongo lya ŵandu ŵajinji ŵa ku Iguputo, ni mwajinjisye pamo ni ŵandu ŵa yilambo yine yamacili ku cilambo ca ŵandu ŵawe.

¹⁹ Mwasalile jemanjajo kuti: ‘Ana mkuganisya kuti jemanja mli ŵakusalala mnope kwapunda ŵaliwose? Timjawule pasi ku cilambo ca ŵandu ŵawe ni gona pampepe ni ŵandu ŵangakulupilila Mlungu.’

²⁰ “Ŵandu ŵa ku Iguputo tacigwa pasikati pa ŵandu ŵele ŵawulajidwe pa ngondo. Upanga uli cile kuti tiwawulaje pamo ni ŵandu ŵawo ŵajinji.

²¹ Ŵandu ŵakupikanika ni ŵele ŵiŵaputile ngondo ku mbali ja Aiguputo ŵapocele Aiguputo ku cilambo ca ŵandu ŵawe. Ni ŵagumisile kuti: ‘Ŵandu ŵangakulupilila Mlungu ŵaŵawulajidwe ku ngondo ŵala ayice akuno, ngati aŵa ŵagonile apaŵa!’

²² “Kweleko kwana Asiliya nipo ŵa ngondo ŵakwe wosope ali m'malembe gamsyungulile. Wosopewo ŵawulajidwe pa ngondo,

²³ nipo malembe gawo gali m'malo gakusokoka mnope mcilambo ca ŵandu ŵawe. Malembe gawo gasyungulile lilembe lyakwe. Jemanjajo kala ŵajogoyaga ku cilambo ca ŵandu ŵacijumi.

²⁴ “Kweleko kwana soni Elamu nipo ŵa ngondo ŵakwe wosope ali m'malembe gagamsyungulile. Wosopewo ŵawulajidwe pa ngondo, nipo ŵapite mcilambo ca ŵandu ŵawe ali ŵangakulupilila Mlungu. Jemanjajo ŵaliji ŵandu ŵakogoya mcilambo ca ŵandu ŵacijumi, nambo sambano akutenda soni pamo ni ŵali m'malembe.

²⁵ Elamu agonile pasikati pa ŵandu ŵaŵawulajidwe ku ngondo, nipo malembe ga asilikali ŵakwe gamsyungulile jwalakwe. Wosopewo ali ŵangakulupilila Mlungu, soni ŵakuwulajidwa ku ngondo. Jemanjaji kala ŵajogoyaga ku cilambo ca ŵandu ŵacijumi, nambo sambano akutenda soni pamo ni ŵali m'malembe, ŵasicidwe pasikati pa ŵandu ŵawulajidwe ku ngondo.

²⁶ “Kweleko soni kwana Mesheki ni Tubali, ŵa ngondo wosope ali m'malembe gamsyungulile jwalakwe. Wosopewo ali ŵangakulupilila Mlungu, soni ŵawulajidwe ku ngondo. Jemanjaji kala ŵajogoyaga ku cilambo ca ŵandu ŵacijumi.

²⁷ Nganasicidwa mwa ucimbicimbi mpela ŵa ngondo ŵamacili ŵakala, ŵaŵapite ku cilambo ca ŵandu ŵawe ni yida yawo yosope ya ngondo, mawupanga gawo giŵaŵisile ku mitwe kwawo, nipo yakucilicinjilicisya yawo ŵawunicile yilu yawo. Kala ŵandu ŵamaciliŵa ŵajogoyaga ku cilambo ca ŵandu ŵacijumi.”

²⁸ “Myoyo timcikasidwa mawupa ni timcigona pamo ni ŵandu ŵawe ŵangakulupilila Mlungu, soni pamo ni ŵiŵawulajidwe ku ngondo.”

²⁹ “Kweleko kwana Edomu pampepe ni ayimwene ŵakwe ni ŵakulamula ŵakwe. Ŵaliji asilikali ŵamacili mnope, nambo sambano agonile ku cilambo ca ŵandu ŵawe pamo ni ŵangakulupilila Mlungu ŵaŵawulajidwe ku ngondo.”

³⁰ “Kweleko soni kwana ŵanace ŵa ayimwene wosope ŵa ku mpoto, ni ŵandu ŵa ku Sidoni. Ŵapite ku cilambo ca ŵandu ŵawe mwa soni, pamo ni ŵakuwulajidwa ku ngondo nipo ŵasicidwe ali ŵangakulupilila Mlungu. Kweleko akutenda soni yalumo ni wosope ŵaŵapite ku cilambo ca ŵandu ŵawe.”

³¹ “Pitacawona ŵandu wosopewo ŵakuwulajidwa ku ngondo, Mwenye jwa ku Iguputo ni likuga lyakwe lya ngondo tacisengwa kuti nganaŵa jemanja pejo ŵaŵasimene ni yisawusyo,” akuti myoyo AMBUJE.

³² “Elo, ŵapelece woga ku cilambo ca ŵandu ŵacijumi, nambo sambano jwalakwe ni makuga gakwe ga asilikali taciwulajidwa ni kusicidwa pamo ni ŵangakulupilila Mlungu ŵiŵawile ku ngondo.” AMBUJE Mlungu ni yatite.