Esek 31 - Chiyawo Bible

Iguputo akumlandanya ni citela ca mkungusa

¹ AMBUJE* ŵaŵecete ni une pa lisiku lyandanda lya mwesi watatu, caka ca likumi ni cimo ca ukapolo acitiji,

² “M'mwe mwanace jwa mundu, mwasalile mwenye ŵa Iguputo ni ŵandu ŵawo kuti: Ana jemanja mkwete macili gamti uli? Ana jemanja mpaka namlandanyicisye ni cici?

³ Jemanja mkulandana ni citela ca mkungusa ca ku Lebanoni, ca nyambi syakusalala syakupeleka m'bwilili, citela cacilewu cakuja kwika mpaka m'mawunde.

⁴ Mesi ni gele tigacikulisyaga, nipo nduluko syapasi pa sulo syalisyaga citelaco. Sulo syajendelelaga ku malo kwele citelaco kucapandidwe ni kutumisyaga tusulo twakwe kwa yitela yosope ya muwukwetimo.

⁵ Ligongo lyakuti cajitililidwe cenene, calewipe mnope kupunda yitela yosope. Nyambi syakwe syaliji syagangamala ni syasilewulewu.

⁶ Yijuni yosope yataŵaga yisusi yakwe mu nyambi syakwe; Yinyama yamwitinji yaŵelecelanaga pasi pa nyambi syakwesyo; Mitundu josope ja ŵandu jatamaga pasi pa m'bwilili wakwe

⁷ Caliji citela cakusalala mnope cacilewu, ni nyambi syakwe soni syasilewu. Miciga jakwe japite mnope pasi pisyaliji nduluko sya mesi.

⁸ Mu mgunda wa Mlungu mwaliji mwangali mkungusa wakulandana ni welewo. Paliji pangali citela ca mkungusa cicakwete nyambi mpela syelesyo, mwaliji mwangali soni citela cakubiliŵita caka cosope cicakwete nyambi syamti myoyo. Mu mgunda wa Mlungu mwaliji mwangali citela cine cakusalala mpela celeco.

⁹ Nacipanganyisye kuŵa citela cakusalala, pakusiculuya nyambi syakwe. Kwamti kuti yitela yine ya mu Edeni mgunda wa Mlungu, yatendaga wiwu.

¹⁰ “Sambano, Une, AMBUJE Ŵamaciligosope; tinimsalile yitiyitendekwe ku citela aco cicakusile mpaka kuyika ku mawunde. Picakulaga ni kulewupaga calikwesyaga;

¹¹ myoyo Une nacipelece citelaco m'myala mwa mwenye jwakulamulila ŵandu ŵa mitundu jine,* kuti mwenyejo acipe cilango mwakamulana ni ulemwa* wakwe.

¹² Acalendo ŵangalwe mnope pasikati pa mitundu ja ŵandu tacicikata ni gamba kucileka. Nyambi syakwe syagwilile m'matumbi ni m'yiŵata yosope. Nyambi syakwesyo syatemecele mu sulo ni m'yiŵata ya mcilamboco. Myoyo ŵandu ŵa mitundu josope ŵiŵatamaga pasi pa m'bwilili wakwe ŵawulesile ni kutyoka.

¹³ Yijuni yosope tiyiciyika kukutama pa citela cegweco, nipo yinyama yosope yamwitinji tiyicitamaga pa nyambi syakwe.

¹⁴ Kutandilila sambano mpaka msogolo, pangali citela, atamose cijitilidwe cenene, ticicikula ni kulewupa mpela celeco soni kapena songa syakwe tisisija kwika ku mawunde ni kuciyika wulewu wewula. Pakuti yosope kumala kwakwe ni kuwa, kwawula kusi kwa cilambo capasi, ni kuja kutama ni ŵandu ŵawe, ŵele ŵiŵajinjile kala m'malembe.”

¹⁵ Yakuŵeceta AMBUJE nayi: “Pa lisiku lyele citelaco licicijawulaga ku cilambo ca ŵawe, tinjilamula nduluko sya mesi sya pasi pa nyasa kuti siwunicile citelaco kulosya kucililila. Tinjijumusya sulo syakwe nipo mesi gakwe ngasigajenda. Ligongo lyakuti citelaco cajumwile, ni tinjiyika naco cipi ku matumbi ga Lebanoni nipo yitela yosope ya mu ukwetimo tiyicijumula.

¹⁶ Mitundu ja ŵandu tijicitenganganyika pakupikana kukukuma kwa kugwa kwakwe, katema kanacijigalile ku malembe pampepe ni ŵiŵawile. Pelepo ku cilambo ca ŵawe, yitela yosope ya Edeni, ni yosope ya ku Lebanoni yejitililidwe cenene, yasangalele ligongo lya kugwako.

¹⁷ Ŵandu ŵele ŵiŵatamaga mu m'bwilili wakwe nombe nawo takasimane ku malembeko ni kwasimana ŵele ŵiŵawile ku ngondo.

¹⁸ “Citelaco ni Mwenye jwa ku Iguputo ni ŵandu ŵakwe. Paliji pangali atamose citela cimo mu Edeni cicaliji celewu ni cakunonyelesya. Nambo sambano, mpela yitela ya mu Edeni, tiyicijawula pasi ku cilambo ca ŵawe ni kuŵa yalumo ni ŵandu ŵangawumbala ni wosope ŵiŵawile ku ngondo. Ni yinguti Une AMBUJE.”