Esek 30 - Chiyawo Bible

AMBUJE tacapa cilango Aiguputo

¹ AMBUJE* ŵaŵecete ni une soni.

² “M'mwe mwanace jwa mundu, mlalicile ni mgombelesye yinguŵeceta Une AMBUJE Mlungu. Mgombelesye ayi: Lisiku lyakogoya likwika!

³ Kusyene lisikuli liŵandicile, lisiku lyele AMBUJE litacipeleka cilango, lisiku lya mawunde ni lisiku lya yisawusyo kwa mitundu ja ŵandu.

⁴ Ku Iguputo tikuciŵa ngondo, nipo ku Ifiyopiya tikuciŵa yisawusyo. Ŵandu ŵajinji taciwulajidwa ku Iguputo, cipanje cakwe ticicijigalidwa, nipo yilimbilimbi yakwe tiyicigumuka.

⁵ “Asilikali ŵakutyocela ku Ifiyopiya, Libiya, Lidiya, Alebiya, Kubi ni ŵandu ŵangu taciwila ku ngondoko.”

⁶ Yakuŵeceta AMBUJE nayi: “Wosope ŵakukamucisya Iguputo taciwulajidwa. Nombe asilikali ŵakusiŵapocela taciwulajidwa. Ŵandu ŵakwe taciwulajidwa pa ngondo kutandila ku Migidoli mpaka Siyene. Ni yinguti Une AMBUJE Mlungu.

⁷ Cilambo ca Iguputo ticiciŵa masame ga masame mcilambo cosope capasi, nipo misinda jakwe tijiciŵa jejonasice.

⁸ Patinjimpamba moto Iguputo ni kwawulaga wosope ŵamkamucisyeje, pelepo tacimanyilila kuti Une ni AMBUJE.

⁹ “Pajiciyika ndaŵi jelejo, ŵamitenga taciyika mwakwanguya kutyocela kwa Une ni kwajogoya ŵandu ŵa ku Ifiyopiya, jemanjajo ali ngakumanyilila kandu. Nipo taciŵa ni nganisyo pa lisiku lyele Iguputo tacijonasika, ligongo lisikulyo tiliciyika kusyene.”

¹⁰ AMBUJE akuŵeceta kuti, “Tinjimtuma Mwenye Nebukadinesa jwa ku Babiloniya kuti tamasye cipanje ca Iguputo.

¹¹ Jwalakwe ni ŵandu ŵakwe, mtundu ŵa ŵandu ŵangalwe mnope ŵala taciyika kukonanga cilamboco. Tacimenyana ni Aiguputo ni mawupanga gawo, nipo cilambo cosope ticicigumbala ni mitembo.

¹² Tinjijumusya Lusulo lwa Nayilo nipo Iguputo tinjimsumisya kwa ŵandu ŵakusakala. Cilamboco tinjicijonanga pampepe ni yindu yosope yakusimanikwa mwelemo, pakucipeleka m'myala mwa ŵandu ŵakwika. Ni yinguti Une AMBUJE.”

¹³ AMBUJE Mlungu akuti, “Tinjijonanga milungu jine ja ku Memfisi. Ngasipapagwa mwenye jwine jwakulamula ku Iguputo, nipo tinjajogoya ŵandu wosope ŵakutama kweleko.

¹⁴ Tinjiwutendesya msinda wa Patilosi kuŵa masame nipo tinjiwujoca msinda wa Sowani. Tinjiwupa cilango msinda wa Tebesi.

¹⁵ Tinjitaga lutumbilo lwangu mu msinda wa Pelusiyumu, msinda wa mapupa gakulimba wa Iguputo. Tinjijonaga likuga lya ŵandu ŵa ku Tebesi.

¹⁶ Tinjimjoca Iguputo nipo Pelusiyumu tacilaga mnope. Mapupa ga Tebesi tigacigumuka ni konasika mnope.

¹⁷ Acacanda ŵa ku Oni ni ŵa ku Pibeseti taciwulajidwa pa ngondo nipo ŵandu ŵane wosope tacijigalidwa ukapolo.

¹⁸ Ku Tapanesi tikuciŵa cipi katema katinjikasaga macili ga Iguputo kweleko ni kumasya macili giŵapocelaga. Mawunde tigaciwunicila Iguputo, nipo ŵandu ŵakutama m'misinda jakwe tacijigalidwa ukapolo.

¹⁹ Myoyo pitinjimpa Iguputo cilango mwa litala lyeleli, pelepo tacimanyilila kuti Une ni AMBUJE.”

Ungakola macili wa Mwenye jwa ku Iguputo

²⁰ Pa lisiku lya msano ni gaŵili lya mwesi wandanda caka ca likumi ni cimo ca ukapolo, AMBUJE ŵaŵecete ni une kuti:

²¹ “M'mwe mwanace jwa mundu, ndemenye mkono wa Mwenye jwa ku Iguputo Mwenye jwa ku Iguputo. Paliji pangali mundu juŵawutaŵile kapena kuwuŵijilila kuti upole ni kuŵa ŵakulimbangana kwamti mpaka kamula upanga soni.

²² Sambano ayi ni yinguti Une AMBUJE Mlungu: Une ndili m'magongo jwa Mwenye jwa ku Iguputo. Tingamtemanye makono gakwe gosope gaŵili — mkono wambonewo ni wine wele uwatemece pandanda ula — nipo upanga tiwucigwa m'miyala mwakwe.

²³ Tinjapwilinganyicisya Aiguputo ku cilambo cosope capasi.

²⁴ Kaneko tinjiwutendekasya mkono wa mwenye jwa ku Babiloniya kuŵa wamacili nipo m'miyala mwakwe tinjiŵika upanga wangu. Nambo tinjitemanya makono ga Mwenye jwa ku Iguputo, nipo tacigumila ni kuwa pameso pa mwenye jwa ku Babiloniya.

²⁵ Elo, tinjimlepetekasya jwalakwejo ni kumlimbanganya mwenye jwa ku Babiloniya. Patinjiŵika upanga wangu mu mkono mwakwe nipo jwalakwe tacilosya ku Iguputo, pelepo jwalijose tacimanyilila kuti Une ni AMBUJE.

²⁶ Tinjapwilinganyicisya Aiguputo mcilambo cosope capasi. Pelepo tacimanyilila kuti Une ni AMBUJE.”