Esek 3 - Chiyawo Bible

¹ Mlungu ŵatite, “M'mwe mwanace jwa mundu, mlye cipukutuci; ni mjawule mkaŵecete ni Aisalaeli.”

² Myoyo najaseme kukamwa, ni ŵambele cipukutuco kuti ndye.

³ Ni ŵatite, “M'mwe mwanace jwa mundu, mlye ciputuku ca yakulembedwa cinampeleci ni mjikute.” Nacilile ni calyolyopelaga mpelaga uci.

⁴ Kaneko Mlungu ŵatite, “M'mwe mwanace jwa mundu, mjawule kwa ŵandu ŵa ku Isalaeli ni mkasalile jemanjajo yiliyose yinamsalile kuti mkasale kwa jemanjajo.

⁵ Ngangumtuma m'mwejo kwa mtundu wakuŵeceta ciŵeceto ca cilendo ni cakusawusya, nambo kwa Aisalaeli.

⁶ Naga namtumisye kwa mitundu jakupikanika jakuŵeceta ciŵeceto cakusawusya cingamkucimanyilila, jemanjajo akampikanile m'mwejo.

⁷ Nambo atamose jumo jwa ŵandu ŵa Aisalaeli tacisaka kuti ampikanile; jemanjajo ngasambikanila atamose une. Wosopewo ali ŵakusawusya ni ŵangapikanila.

⁸ Sambano cinamtendesye kuŵa ŵangapikana ni ŵakusawusya mpela jemanjajo.

⁹ Tinjimtenda kuŵa ŵakulimbangana mpela lwala, lwakulimba mpela liganga lya dayamondi; nambo mkatenda nawo woga ŵandu ŵakwimucilawo.”

¹⁰ Mlungu ŵapitilisye ni ŵatite, “M'mwe mwanace jwa mundu, mpikanicisye ni kuyikumbucila yosope yingumsalilayi.

¹¹ Sambano mjawule kwa Aisalaeli acimjenu ŵele ŵali ku ukapolo ni mkasalile jemanjajo yele Une AMBUJE* Mlungu, yinguti kwa jemanjajo, kanga takampikanile kapena iyayi.”

¹² Pelepo Msimu wa Mlungu wanyakwile, ni napikene kunyuma kwangu liloŵe lya macili ni lyatite, “Ucimbicice ucimbicimbi wa AMBUJE kwele kwinaniko!”

¹³ Napikene lisegwe lya mapapiko ga yiwumbe yila gali mgundana mwinani, ni lisegwe lya yitungulu, lyapikanice mpela cisukunya camacili mnope.

¹⁴ Macili ga AMBUJE gayice kwa une mwamacili, nipo msimu wakwe wanjigele ni kungwesya, nipo mtima wambwetece ni natumbile.

¹⁵ Myoyo nayice ku Tele Abibu pakuŵandikana ni Lusulo lwa Kebala, kwele kuŵatamaga mu ukapolo, ni natemi masiku msano ni gaŵili kweleko, namalilwe lunda ni yinayiweni ni kuyipikana.

AMBUJE amsagwile Esekiele kuŵa londa

¹⁶ Gali gamasile masiku msano ni gaŵili, AMBUJE ŵaŵecete ni une kuti,

¹⁷ “M'mwe mwanace jwa mundu, ngumŵika m'mwejo kuti mŵe londa jwa mtundu wa Aisalaeli. Mkateteleje jemanjajo yele yitinamsalije une.

¹⁸ Naga mkuŵeceta kuti mundu jwangalumbana kuti taciwa nambo naga m'mwejo ngamkuja kumtetela kuti alece yangalumbanayo kuti akulupuce ni kuŵa ni umi, mundujo taciwa ali mu ulemwa,* une tinjimjimba magambo ligongo lya ciwa cakweco.

¹⁹ Nambo naga mundu jwangalumbanajo mumtetele nipo jwalakwe ngakusaka kuleka ya ulemwa, taciwa ali mu ulemwa, nambo m'mwejo timcikulupusya umi wenu.

²⁰ “Naga mundu jwakulupicika akutanda kutenda yindu ya ulemwa nipo Une ni kumŵika muyakogoya, jwelejo taciwa naga m'mwejo ngamkutetela jwalakwejo. Taciwa ligongo lya ulemwa wakwewo, nipo Une ngasingumbucila yambone yakwe yiŵatesile ni sambano magambo ga ciwa cakwe tigaciŵa ga m'mwejo.

²¹ Nambo naga mundu jwakulupicikajo mkumtetela kuti akalemwa ni jwalakwe akumpikanila m'mwejo ni ngalemwa, taciŵa ni umi, nipo m'mwejo timciŵa ni umi.”

Esekiele taciŵa ŵangapakombola kuŵeceta

²² Nagapikene macili ga AMBUJE galikwika mwa une ni kusalila kuti, “Mjimuce ni mjawule ku ciŵata. Tingaŵecete ni m'mwejo kweleko.”

²³ Myoyo napite ku ciŵatako, ndili kweleko naluweni lumbili lwa AMBUJE, mpela mwele munaluwonele ku Lusulo lwa Kebala. Pelepo naligwisisye pasi camakuku,

²⁴ nambo Msimu wa Mlungu wajinjile mwa une ni wanjimwisye ni kunjimika. Papopo AMBUJE ŵatite kwa une kuti, “Jawulagani kumangwenu ni mkaliwugalile m'nyumba mwenu.

²⁵ Takamtaŵe ni ngonji m'mwe mwanace jwa mundu, ni timcilepela kwawula kwali ŵandu.

²⁶ Tinjilulemasya lulumi lwenu kuti timlepele kuŵeceta ni kwatetela ŵandu ŵakwimucilawo.

²⁷ Nambo ndaŵi jitinjitanda kuŵeceta ni m'mwejo, tinjimwucisya macili gakuŵecetela, ni timwasalile jemanjajo yinguti Une AMBUJE Mlungu. Ŵane mwa jemanjajo taciyipikanila, nambo ŵane ngasampikanila m'mwejo, paja uli mtundu wakwimucila.”