Esek 29 - Chiyawo Bible

Ya cilango ca Aiguputo

¹ Lisiku lya likumi ni gaŵili lya mwesi wa likumi caka ca likumi ca ukapolo, AMBUJE* ŵaŵecete ni une.

² Ŵatite, “M'mwe mwanace jwa mundu, mwajimbe magambo mwenye wa ku Iguputo. Mwasalile mwenyewo ni cilambo cosope cene mwele mutacipocelela cilango.

³ Mwasalile kuti ayi ni yakuti AMBUJE: Une ndili m'magongo jwenu, Mwenye jwa ku Iguputo, m'mwe ngwena jakogoya mnope jagona mu lusulo. Mkuŵeceta kuti Lusulo lwa Nayilo luli lwenu soni m'mwejo mwalupanganyisye.

⁴ Tinamloposye ni cisopo mkamwa mwenu ni somba sya mu lusulo lwenu simatilile m'maŵamba genu. Kaneko ni tinamcuwule mu Nayilo, pampepe ni somba syosope syele sim'matilile.

⁵ Tinjimjasila m'mwejo pampepe ni somba syosope mcipululu. Cilu cenu ticicigwila pasi ni kusoŵa ŵakucisilila. Tinjicipeleka cilu cenu kwa yijuni ni yilombo kuti ciŵe cakulya yawo.

⁶ Pelepo ŵandu wosope ŵa ku Iguputo tacimanyilila kuti Une ni AMBUJE.” AMBUJE akuti, “Aisalaeli ŵamkulupililaga jemanja Aiguputo kuti timwakamucisyeje, nambo nganimŵa ŵambone mpela simbo.”

⁷ Ndaŵi jiŵajegamile kwa jemanja, mwatemece, ni kwatota makoyo gawo, ni mwatesile kuti atenganyice myiwunu mwawo.

⁸ Sambano Une AMBUJE nguti, timbice nawo ŵa ngondo kuti tawulaje ŵandu ŵenu pampepe ni yilangwa yenu.

⁹ Cilambo ca Iguputo ticiciŵa cangali cilicose. Pelepo timcimanyilila kuti Une ni AMBUJE. “Ligongo mwatite kuti Nayilo ni jwangu soni nampanganyisye une,

¹⁰ myoyo Une nguŵengana ni m'mwejo pampepe ni Nayilo jwenujo. Tinjimsandusya Iguputo kuŵa masame kutyocela ku msinda wa Migidoli mpaka ku Sayini kumpoto mpaka ku msinda wa Aswani kum'mwela, mpaka kumalile ga Ifiyopiya.

¹¹ Pangali mundu kapena cinyama ciciponda lusajo lwakwe. Tikuciŵa kwangali cindu kwa yaka makumi mcece.

¹² Tinjicisandusya cilambo ca Aiguputo kuŵa masame kupunda masame ga yilambo yine yosope. Kwa yaka makumi mcece misinda ja ku Iguputo tijiciŵa masame, masame gakwe gakupunda misinda jine josope. Tinjatenda Aiguputo kuŵa ŵandu ŵakutila kumangwawo. Tacitilila ku cilambo cilicose ni kutama ni ŵandu ŵa mitundu jine.”*

¹³ AMBUJE akuŵeceta kuti, “Patiyicimala yaka mcece tinjasonganya Aiguputo kutyocela kwele kunapwilinganyicisye jemanjajo,

¹⁴ ni tacitama kum'mwela kwa Iguputo, kumangwawo kusyesyene. Kweleko taciŵa ni ucimwene wangali macili mnope,

¹⁵ tiwuciŵa ucimwene wangali macili mnope mwa ma ucimwene gosope, ni ngasalamula soni mitundu jine ja ŵandu. Tinjatenda kuŵa jemanjajo ŵangasosekwa mwamti ngasakombola kupunda mtundu wine uliwose wa ŵandu kuyakusaka yawo.

¹⁶ Aisalaeli ngasiŵakulupilila soni Aiguputo kuti tacakamucisya. Nambo cilango ca Aiguputo ticicakumbusyaga Aisalaeli ulemwa* wawo wakwakulupilila Aiguputo. Pelepo Aisalaeli tacimanyilila kuti Une ni AMBUJE.”

Mwenye Nebukadinesa tacipunda Iguputo pa ngondo

¹⁷ Lisiku lyandanda lya mwesi wandanda wa caka ca 27 ya ukapolo, AMBUJE ŵaŵecete ni une.

¹⁸ “M'mwe mwanace jwa mundu, Mwenye Nebukadinesa jwa ku Babiloniya ŵakamulisye masengo asilikali ŵakwe ŵa ngondo kusumula msinda wa Taya. Ŵatesile asilikali ŵakwe ŵa ngondo kunyakula katundu jwakusitopa mnope mpaka mitwe jawo jatesile lulasi nambo soni makoyo gawo gakowece, nambo mwenye kapena asilikali ŵakwe ŵa ngondo nganapata cilicose ligongo lyakulagako.

¹⁹ Sambano ayi ni yinguŵeceta Une AMBUJE: ngupeleka cilambo ca Aiguputo kwa Mwenye Nebukadinesa. Tacijonanga ni kujigala cipanje cenu cosope ni ticiciŵa malipilo galikuga lyakwe lya ngondo.

²⁰ Ngumpa jwalakwe cilambo ca Iguputo kuti ciŵe malipilo gakwe ligongo jwalakwe ni asilikali ŵakwe ŵakamulaga masengo gangu. Ni yinguti Une AMBUJE.

²¹ “Patiyicitendekwa yeleyi, tinjapa macili ŵandu ŵa ku Isalaeli nipo tinjimkunda m'mwejo Esekiele kuŵeceta, mwakuti mundu jwalijose tacikomboleka kumpikana m'mwejo, pelepo tacimanyilila kuti Une ni AMBUJE.”