Esek 28 - Chiyawo Bible

Maloŵe gakumjamuka mwenye jwa ku Taya

¹ AMBUJE* ŵaŵecete ni une kuti,

² “M'mwe mwanace jwa mundu, mwasalile mwenye wa ku Taya yinguti une AMBUJE Mlungu, pakuti mkusalikusya mtima ni mkusaŵeceta kuti, ‘Une ni mlungu, ngusatama mpela mwenye pa citengu ca milungu pasikati pa nyasa jakusokoka.’ Nambo cosopeco mli mundu basi, ngaŵa mlungu, atamose mkusalitenda ŵalunda mpela mlungu.

³ Mkusaganisya kuti mli ŵalunda kumpunda Daniele, soni pangali cindu ca asili cicasisice kwenumwe.

⁴ Lunda lwenu ni kupikanicisya kwenu yamsicilisye pakupata yipanje ya golidi* ni silifa.*

⁵ Cipanje cenu catupile ligongo lya lunda lwenu lwakwendecesya malonda, myoyo mkupoka ligongo lya cipanje cenu.

⁶ “Sambano Une, AMBUJE Mlungu nguti, pakuti mkusaganisya kuti m'mwe mli ŵalunda mpela mlungu,

⁷ tinjiyika nawo ŵandu ŵa cilendo kuti talimbane ni jemanja. Jemanjajo ni mtundu ŵa ŵandu ŵangalwe mnope. Jemanjajo tacijonanga yindu yosope yakusalala yimwapatile ligongo lya lunda lwenu ni kumasya kupoka kwenu.

⁸ Tacimponya ku malo ga ŵandu ŵawe,* soni timciwa ciwa cakogoya m'nyasa jakusokoka.

⁹ Ana timciŵecetape kuti m'mwejo mli mlungu pameso pa ŵandu ŵakwawulaga? Iyayi, timciŵa mundu wamba m'myala mwa ŵakumwulagawo.

¹⁰ Timciwa mpela m'mbwa m'myala mwa ŵandu ŵa cilendo. Ni yinguti Une AMBUJE Mlungu.”

Kugwa kwa mwenye jwa ku Taya

¹¹ AMBUJE ŵaŵecete ni une soni kuti

¹² “M'mwe mwanace jwa mundu, mjimbe nyimbo jakumlilila mwenye jwa ku Taya. Mumsalile jwalakwe maloŵe gangu kuti, mwaliji cisasyo ca cambone cisyesyene. Mwaliji ŵalunda ni ŵakusalala mnope.

¹³ Mwatamaga ku Edeni, mu mgunda wa Mlungu, soni mwalisalalisasyaga ni maganga ga mtengo wapenani ga mitundu josope: kaneliyani, topasi,* jasipa, kilisolaiti, belili,* onikisi, safilo, lubi, ni emeladi. Yakusajicila magangago yaliji ya golidi. Ŵayipanganyicisye yosopeyi pa lisiku lya kupagwa kwenu.

¹⁴ Namŵicile lilayika lyakogoya kuti limloleleje. Mwatamaga petumbi lyangu lyeswela soni mwajendaga pasikati pa maganga ga moto.

¹⁵ Ndamo syenu syaliji syambone kutandila lisiku limwapali mpaka ndaŵi jele jimwatandite kutenda yakusakala.

¹⁶ Pakutupilwa ni malonda, yeleyi yamtendekasisye ndewu soni ni kulemwaga. Ni ligongo lyakwe namtyosisye petumbi lyangu lyeswela, soni lilayika lilyamlolelaga lila lyamtopwele kutyocela pa maganga ga moto.

¹⁷ Mwapokaga ligongo lya kusalala kwenu, mwasakesye lunda lwenu ligongo lyakusaka kuŵa ŵakupikanika

¹⁸ Mwatesile yangalumbana yejinji pakusuma ni kusumisya yindu, ni pakutenda myoyo mwasakesye malo genu gakulambila. Ni ligongo lyakwe nakolesisye moto sikati jenu ni kutinisya yosope. Wosope ŵakumlola sambano taloleje kuti m'mwejo liwu pa cilambo capasi.

¹⁹ Ŵandu ŵa mitundu josope ŵiŵam'manyililaga akutenda woga ni yiyamwonecele. Ciwa cenu caliji cakogoya, soni ngasimwoneka mpaka kalakala.”

Maloŵe gakwamuka msinda wa Sidoni

²⁰ AMBUJE ŵaŵecete ni une kuti,

²¹ M'mwe mwanace jwa mundu, mjawule ku msinda wa Sidoni, ni mkajile kuti,

²² AMBUJE Mlungu akuti, Une ndili m'magongo jwenu, m'mwe Sidoni, soni ŵandu tacinjimbicisya pitaciyiwona yitinjimtenda m'mwejo. Tacimanyilila kuti Une ni Mlungu, patinjimpa cilango soni pakulosya kuti Une ni jwamswela pasikati pawo.

²³ Tinjimtumicisya yilwele soni m'misewu jenu mucijilimaga miasi. Ngondo tijicimsungulila mbali syosope, soni ŵandu ŵenu tacimala kuwulajidwa. Pelepo timcimanyilila kuti Une ni AMBUJE.

Isalaeli tacikola upile

²⁴ AMBUJE ŵaŵecete ni une acitiji kuti, “Ngasipapagwa pakuŵandikana ni Aisalaeli mtundu ŵa ŵandu ucanyosyaga, ngasiwuŵa soni mpela miŵa kuti wasawusyeje Aisalaeli. Pelepo tacimanyilila kuti Une ndili AMBUJE Mlungu.”

²⁵ AMBUJE Mlungu akuti, “Tinjawucisya Aisalaeli kutyocela ku mitundu ja ŵandu jinapwilingenye jemanjajo, soni pelepo mitundu josope tijicimanyilila kuti Une ndili jwamswela. Aisalaeliwo tacitama soni mcilambo cawo cele cinampele jwakutumicila jwangu Yakobo.*

²⁶ Tacitama kweleko mwa mtendele, soni tacitaŵa nyumba ni kulima migunda ja mipeleya. Tacitama kweleko mwa mtendele, ndaŵi jitinjipelekaga cilango kwa ŵandu ŵakuŵandikana nawo ŵiŵanyosyaga jemanjajo. Pakutenda myoyo tacimanyilila kuti Une ni AMBUJE Mlungu jwawo.”