Esek 27 - Chiyawo Bible

Nyimbo ja malilo kulilila Taya

¹ AMBUJE* ŵaŵecete ni une kuti,

² “M'mwe mwanace jwa mundu, mjimbe nyimbo ja malilo kwa ŵandu ŵa ku Taya,

³ mumsalile Taya kuti msinda wakutama paciko ca nyasa wele ukusatenda malonda ni ŵandu ŵa mitundu jejinji ja ku yilambo yejinji ya mumbali nyasa. Mwasalile yinguŵeceta Une AMBUJE Mlungu: M'mwe Taya, mŵele mli mkuŵeceta kuti yakusalala kwenu.

⁴ Malile genu gali mkatikati mwa nyasa. Amisili ŵamtaŵile mpela combo cakusalala mnope.

⁵ Ŵampanganyisye ni matabwa ga yitela ya paini ya Kwitumbi lya Senili. Ŵajigele mkungusa wa ku Lebanoni kuti apanganyicisye lucalamila lwelewu lwakuŵika mbendela.

⁶ Ŵapanganyisye ngafi syenu ni citela ca mtundu wa ku Bashani; Ŵapanganyisye citandala cenu ni matabwa ga yitela ya paini ya ku yiko ya ku Saipulasi. Ni pasikati pa matabwago paliji pana yakusepa ya misengo ja ndembo.

⁷ Nguwo jenu jakwendecesya liboti jaliji nguwo ja bafuta, Nguwo jakwe jaliji jambone jakutyocela ku Iguputo, nipo jaliji cimanyisyo cenu. Mibwilili jenu jaliji ja nguwo sya kubiliŵita ni syecejewu syakutyocela ku cilumba ca Elisha.

⁸ Ŵandu ŵa ku Sidoni ni ŵa ku Alifadi ni uŵampalasaga. Acinamatetule ŵenu ni uŵamjendesyaga.

⁹ Acakulungwakulungwa amisili ŵa ku Gebala ŵaliji mcombomo, ŵele uŵasiŵaga mabowo genu. Ŵakwendesya yombo ŵajinji ŵayikaga kutyocela myilambo yawo kukutenda namwe malonda.

¹⁰ “Ŵandu ŵa ku Pelesiya, ŵa ku Lidiya ni ŵa ku Libiya ŵajinjile mlikuga lya asilikali ŵenu. Ŵakolekaga yakulicinjilicisya ni yisoti yawo mkati mwa malo gakutama asilikali ŵenu, nipo pelepo ŵampaga ucimbicimbi.

¹¹ Asilikali ŵa ku Alifadi ni ŵa ku Heleki ŵalondelaga mapupa genu, nipo ŵandu ŵa ku Gamadi ni ŵiŵalondelaga sanja syenu. Nipo ŵakolekaga yakulicinjilicisya yawo m'mapupa genu. Jemanjaji ni uŵamtendekasisye m'mwejo kuŵa ŵakusalala mnope.

¹² “Cilambo ca Talishishi catendaga ni jemanja malonda ligongo lya katundu jwenu jwa mitundumitundu, ni mwasumaga silifa,* ayiloni, citini ni mtofu pakucengana ni katundu jwawo.

¹³ Mwatendaga malonda ku Yafani, Tubali ni Mesheki, mwasumisyaga acikapolo ni yindu ya bulonsi pakucenganya ni katundu jwenu.

¹⁴ Ŵandu ŵa ku Betetogalima ŵapelekaga mahaci ga masengo, mahaci ga ngondo ni acibulu pakucengana ni katundu jwenu.

¹⁵ Ŵandu ŵa ku Dedani ŵatendaga namwe malonda, ŵandu soni ŵa mumbali mwa nyasa ŵampaga misengo ja ndembo ni mkalati pakucengana ni katundu jwenu.

¹⁶ Ŵandu ŵa ku Edomu ŵasumaga yindu yejinji ya malonda pakucengana katundu jwenu jwejinji. Jemanjajo ŵapelekaga maganga ga emeladi, nguwo syecejewu, nguwo syepetepete, nguwo sya bafuta, kolale ni maganga ga agate,* pakucengana ni katundu jwenu.

¹⁷ Yuda ni Isalaeli ŵasumaga malonda genu, jemanjajo ŵapelekaga tiligu, uci, mawuta ga olifi,* ni yakununjilisya mboga, pakucengana ni katundu jwenu.

^18-19 Ŵandu ŵa ku Damasiko ŵasumaga kwa m'mwejo ligongo lya kutupa kwa yindu yenu ya malonda ni katundu jwenu jwakulekanganalekangana, ni ŵayice najo finyo jwa ku Heliboni ni manyunya ga ngondolo gamaswela. Ŵapelekaga finyo jwa ku Usala, ayiloni ni yakununjilisya mboga pakucengana ni malonda genu.

²⁰ Ŵandu ŵa ku Dedani ŵamsumisyaga nguwo syakutamila pa mahaci.

²¹ Ŵandu ku Alebiya ni ayimwene wosope ŵa ku Kedala ŵatendaga ni jemanja malonda pakucenganya ni ŵanace ŵangondolo, ngondolo ni mbusi sya mikambako.

²² Ŵamalonda ŵa ku Seba ni ŵa ku Lama ŵasumaga soni kwa m'mwejo. Ŵapelekaga yakununjilisya mboga, maganga ga mtengo wapenani ni golidi* pakucenganya ni katundu jwenu.

²³ Misinda ja Halani, Kane, Edeni, Ashuli ni Kilimadi jatendaga ni jemanja malonda.

²⁴ Ŵandu ŵakweleko ŵacenganyaga ni jemanja ni yakuwala yambone mnope, nguwo syecejewu, nguwo syepetepete, makalapeti ga mtundu wakulekanganalekangana, yosope ŵayitaŵile ni ngonji syakulimba.

²⁵ Yombo ya ku Talishishi yajigalaga malonda genu. Mwaliji mpela combo pa nyasa cegumbale ni katundu jwakusitopa.

²⁶ Ŵakupalasa ŵenu ŵamjigalile kwakusokoka mnope, mbungo ja kungopoko lyuŵa jamtutile pasikati pa nyasa ni kum'misya.

²⁷ Yipanje yenu, katundu jwenu ni malonda genu ŵakwendesya combo ni ŵimwaliji nawo wosope amisili ŵakoma matabwa ga yombo yenu ni soni ŵakwendesya malonda genu, asilikali ŵenu wosope ŵiŵaliji mkati mwa combo ni likuga lyosope lya ngondo ni wosope uŵamisile m'nyasa lisiku lyele combo licajonasice.

²⁸ Ligongo lyakugumila kwa ŵakwendesya combo kumkuli kwatenganyice.

²⁹ “Wosope uŵapalasaga yomboyo ŵakopwecemo, Wosope uŵakamulaga masengo myombo ŵajimi ku mkuli.

³⁰ Wosopewo akumlilila m'mwejo mnope, Ŵalitagaga luwundu kumitwe ni kuligalagatisya pa liwu.

³¹ Akumyola mbala m'mitwe mwawo ligongo lya m'mwe ni kuwala yisaka. Ŵalilaga mwakwapweteka mtima.

³² Akumjimbila nyimbo jakumdandawulila m'mwejo kuti: ‘Nduni juŵajonanjidwe mpela Taya, pasikati pa nyasa?

³³ Katema kele malonda genu pigajombokaga nyasa, mwapaga ŵandu ŵajinji yindu yiŵayisoŵaga. Ayimwene ŵa cilambo capasi ŵasicile naco cipanje cenu.

³⁴ Nambo sambano m'malile m'nyasa; pasi pasyesyene pa nyasa. Katundu jwenu ni ŵamasengo ŵenu wosope, m'malile pamo m'nyasa.’

³⁵ “Jwalijose jwakutama mungulugulu nyasa yamjogoyisye yele yayimtendecele. Ayimwene ŵawo akutenda woga, ngope syawo sikuwoneka syawoga.

³⁶ Ŵandu ŵamalonda ŵa yilambo yine akumgamba sambano, m'masile mwakutesya woga, nipo ngasimwoneka soni mpaka kalakala.”