Esek 26 - Chiyawo Bible

Ya cilango ca Taya

¹ Pa lisiku lyandanda lya mwesi, mcaka ca likumi ni cimo ca ukapolo, AMBUJE* ŵambelele utenga awu wakuti,

² “M'mwe mwanace jwa mundu, ŵandu ŵa ku Taya ŵanyosyaga Yelusalemu kuti, ‘Juŵaliji cipata cakwinjilila mitundu ja ŵanduju, ajonasice. Yipata yakwe yituwugucile uwe sambano. Tusicile, pakuti jwalakwe sambano ali masame.’

³ “Sambano, ayi ni yinguŵeceta Une AMBUJE: Une ndili m'magongo jwenu m'mwe msinda wa Taya. Tinjiyika najo mitundu jejinji ja ŵandu kuti jimtaje ngondo jemanja, nipo taciyika mpela matumbela ga m'nyasa.

⁴ Ŵanduwo tacijonanga mapupa ga msindawo ni kugwisya sanja jakulondela. Kaneko tinjilipala litaka lyakwe ni kuleka maganga gali pamkuli.

⁵ Tigaciŵa malo gakwanicila makoka pasikati pa nyasa. Ni yinguŵeceta Une AMBUJE. Ŵandu ŵa mitundu jine* tacijonanga Taya,

⁶ nipo ni mawupanga gawo tacawulaga ŵandu ŵitacitama m'misinda jakumkuli. Pelepo tacimanyilila kuti Une ni AMBUJE.”

⁷ AMBUJE akuŵeceta kuti, “Timbice najo mwenye jwakupikanika mnope, Nebukadinesa mwenye jwa ku Babiloniya kuti tamtaje ngondo m'mwe Taya. Taciyika kutyocela kumpoto ni likuga lyekulungwa lya asilikali ŵa ngondo, mahaci ni mageleta soni ni asilikali ŵakwela mageleta.

⁸ Ŵandu ŵakutama ku misinda ja kumkuli tacawulaga pa ngondojo. Amagongowo tacisola masimbo, nipo tacitaŵa kuti gaŵe cakulicinjilicisya pakumenyana ni jemanja.

⁹ Tacigumula mapupa genu ni yida yagumulila, nipo tacigwisya sanja syenu syakulondela ni yisyano.

¹⁰ Luwundu lwa mahaci gejinji tilicimwunicila. Lisegwe lya mahaci gakuwuta mageleta licitenganya mapupa genu katema katiyicijinjilaga pa yipata ya msinda wejonasicewo.

¹¹ Yikotwa ya mahaci gawo tiyicipondaponda misewu jenu; tacawulaga ŵandu ŵenu ni mawupanga gawo. Yipilala yenu yakulimbagana taciyigwisya.

¹² Amagongo ŵenu tacijigala yipanje yenu ni kusumula malonda genu. Tacigumula mapupa genu soni nyumba syenu syakusalala tacisigwisya. Tacijigala maganga genu, yitela yenu, ni litaka lyenu kuja kuliponya m'nyasa.

¹³ Tinjisilekasya nyimbo syenu, nipo kulila kwa pangwe syenu ngasikupikanika.

¹⁴ Tinjimtenda kuŵa lwala lwangali cilicose nipo ŵandu ŵakuwulaga somba tacijanicilaga makoka gawo. Msindawo ngasiwutaŵidwa soni. Ni yinguŵeceta Une AMBUJE.”

¹⁵ Ayi ni yakuwusalila AMBUJE msinda wa Taya: “Katema kele katimcipundidwa ni amagongo ŵenu pa ngondo, ŵandu ŵakutama mungulugulu nyasa tacitetemela pakupikana kulila kwa ŵandu ŵakuti awulajidwe.

¹⁶ Pelepo ayimwene wosope ŵa ku nyasa tacityoka m'mipando jawo ja ucimwene. Taciwula mikanjo jawo ni yakuwala yawo yepetepete ni tacitama pasi alimkutetemela. Tacitenda woga mnope ligongo lya yiyimgwilileyi mwamti ngisaleka kutetemela.

¹⁷ Tacijimba nyimbo ja malilo ligongo lya jemanja acitiji: Msinda wakupikanika ujonasice! Yombo yakwe ayityosisye m'nyasa. Ŵandu ŵa mu msinda awuno ŵalamulilaga nyasa. Nipo ŵajogoyaga ŵandu wosope ŵaŵatamaga mungulugulu nyasa.

¹⁸ Sambano yilambo ya mungulugulu nyasa yikutetemela, ligongo lya kugwa kwakwe. Nipo ŵandu ŵakwe akamwilwe ni woga ligongo lya konasika kwakwe.”

¹⁹ AMBUJE akuŵeceta kuti, “Tinjimtenda kuŵa masame mpela msinda wele mundu jwalijose ngaŵa mkombola kutamapo. Tinjimwunicila jemanja ni mesi gakusokoka ga Nyasa ja Njete.

²⁰ Tinjimtumisya pasi ku cilambo ca ŵawe kuti mkaŵe nawo ŵandu ŵawula syakala. Timcitama kwisimboko mpela masame giŵagalesile kalakala, pampepe ni ŵandu ŵawe. Myoyo ngasimtama soni mu msinda ŵa ŵandu ŵa umi.

²¹ Tinjim'masya mwakutesya woga, nipo ngasimwoneka soni. Atamose ŵandu tamsosesose, ngasamwona.” AMBUJE Ŵamaciligosope aŵecete.