Esek 25 - Chiyawo Bible

Ya cilango ca Amoni

¹ AMBUJE* ŵaŵecete ni une kuti.

² “M'mwe mwanace jwa mundu mgalawucile kwa Amoni nipo mwalalicile mwakwajamuka.

³ Mwasalile jemanjajo apikane yinguŵeceta Une AMBUJE: mwasangalele pimwajiweni Nyumba jangu ali ajisakesye, litaka lya Aisalaeli lili limasile cajila, ni kwawona ŵandu ŵa ku Yuda ali apite ku ukapolo.

⁴ Ligongo lyakuti mwasangalele, sambano tinakunde ŵandu ŵa ku cipululu cakungopoko lyuŵa kuti ampunde jemanja pangondo. Tacilinganya malo ga cigono mcilambo cenu ni kutamilicikamo. Tacilyaga yisogosi ni kumwa mkaka yele yikaliji ya jemanja.

⁵ Tinjiwusandusya msinda wa Laba kuŵa malo gakulicisya ngamila,* nipo cilambo cosope ca Amoni kuŵa cakulila ngondolo, pelepo timcimanyilila kuti Une ni AMBUJE.

⁶ “Yakuŵeceta AMBUJE nayi: mwakwatile m'myala ni guluka mwakusangalala. Mwacinandiye cilambo ca Aisalaeli ni kucinyosya ni mtima wenu wosope.

⁷ Ligongo lyakuti mwayitesile, Une tinjimpeleka jemanja kwa ŵandu ŵa mitundu jine* ŵele ŵitacimjonanga jemanja. Tinjimjonanga jemanja kusyesyene mwamti ngamsimŵa mtundu wa ŵandu soni kapena kola cilambo cenucenupe. Pelepo timcimanyilila kuti Une ni AMBUJE.”

Yakulocesya yakwamba Mowabu

⁸ AMBUJE ŵatite, “Ligongo Mowabu ŵaŵecete kuti Yuda ali mpela ŵandu ŵa mitundu josope,

⁹ tinjijileka misinda jijacenjelaga malile ga Mowabu kuti jikamulwe, makamaka misinda jakusalala ja Beti Yeshimoti, Baala Meoni ni Kiliyataimu.

¹⁰ Tinjapeleka Amowabu pampepe ni Amoni m'myala mwa ŵandu ŵa mitundu jine ŵa kungopoko lyuŵa, pelepo ni kuti Amoni taciliŵalicika pasikati pa ŵandu ŵa mitundu jinewo.

¹¹ Tinjapa cilango Amowabu, nipo tacimanyilila kuti Une ni AMBUJE.”

Ya cilango ca Edomu

¹² AMBUJE ŵatite, “Ŵandu ŵa ku Edomu ŵawucisye ŵandu ku Yuda mwa ngalwe, myoyo kuwucisya kweleko kwajigalile ulemwa* ŵandu ŵa ku Edomu.

¹³ Sambano nguŵeceta kuti tinjimpa cilango Edomu nipo tinjiwulaga mundu jwalijose ni yinyama yakwe kweleko. Cilamboco ticiciŵa cangali mate, kutandila ku msinda wa Temani mpaka ku Dedani, nipo ŵandu taciwulajidwa ku ngondo.

¹⁴ Ŵandu ŵangu Aisalaeli tacawucisya ŵandu ŵa ku Edomu m'malo mwangu, nipo tacatenda ŵandu ŵa ku Edomu kuti alupikane lutumbilo lwangu. Edomu tacimanyilila kuwucisya kwangu.” AMBUJE ni yakuŵeceta.

Ya cilango ca Afilisitiya

¹⁵ AMBUJE ŵatite, “Afilisitiya awucisye mwa ngalwe amagongo ŵawo ŵakalakala ni kwajonanga jemanjajo mwa uŵengani wawo.

¹⁶ Nipo sambano nguŵeceta kuti tingapute ngondo ni Afilisiti ni kwajonanga mwamti ngasawoneka soni. Tinjijonanga jwalijose jwakusigala ni kucileka cilambo ca Filisitiya cangali cilicose.

¹⁷ Tinjapa cilango jemanjajo cakogoya ni kwawucisya jemanjajo mwakwanila nditu. Nipo pelepo taciluwona lutumbilo lwangu myoyo tacimanyilila kuti Une ni AMBUJE.”