Esek 24 - Chiyawo Bible

Ya mpika wa cisyano wa mkuwo

¹ Lisiku lya likumi lya mwesi wa likumi, caka ca msano ni mcece ca ukapolo, AMBUJE* ŵaŵecete ni une kuti,

² “M'mwe mwanace jwa mundu, ŵatite, mlembe lina lya lisiku lya lelo, ligongo lelo ni lisiku lyele mwenye jwa ku Babiloniya akuwusyungulila msinda wa Yelusalemu.

³ Mwasalile citagu* aci ŵandu ŵakwimucilaŵa kuti: Mŵice mpika wa cisyano pa moto nipo mtajemo mesi.

⁴ Mu mpikamo mŵicemo nduli sya nyama syambone sya lukongolo lwa munyuma ni kusogolo soni mgumbasye ni mawupa gambone.

⁵ Mjigale nyama jambone ja ngondolo; mŵice sasu pasi pa mpikawo. Kaneko mesigo gasemule; mtelecele yalumo mawupa ni nyama.”

⁶ Ayi ni yakuŵeceta AMBUJE Mlungu kuti: “Likungu kwa msinda wa ŵandu ŵaciswamba! Uli mpela mpika wawukwete mkuwo wele wawukulepeleka kutyoka. Mkoposye nduli jimojimo mwangasagula.

⁷ Mwapali kuwulagana mu msindamo, nipo miasi jakwe jili pasikati pawo ligongo jagwilile pa lwala lwakusalala ngaŵa petaka, kuti luwundu lukasilila.

⁸ Najilesile miasijo pa lwalalo, kuti akasajisilila, ligongo lyakusosa kulosya lutumbilo lwangu lwakuwucisya.”

⁹ Ayi ni yakuŵeceta AMBUJE Mlungu kuti: “Likungu kwa msinda wa ŵandu ŵaciswamba! Une namsyene tinjicoma cilangali ca sasu.

¹⁰ Myice nasyo sasu sine, ni mkwisile motowo, mtelece nyama, mpungule msusi ni mtinisye mawupa.

¹¹ Sambano mŵice pa makala mpika wa cisyano wangali kanduwo kuti ucejele kuti psyu. Pelepo ni kuti mpikawo tiwuŵe wambone ligongo mkuwo wakwe tiwupye ni moto,

¹² ana mpaka kuwuswejesya uli? Mkuwo wakwe wakusawusya mpaka ngakomboleka kutyoka ni moto.

¹³ Mkuwo welewu ni yitendo yenu ya ulemwa,* atamose namlinjile kumcapa nambo nganimswejela. Myoyo ngamswejela mpaka ndili njikutile lutumbilo lwangu penumwe.

¹⁴ Une AMBUJE mbecete yeleyi. Ndaŵi jikwanile kuti nayitende. Ngasimbujila munyuma kapena kumlecelela kapena kumtendela canasa. Timcipocela cilango ligongo lya yele yimwatesile.” AMBUJE aŵecete.

Ciwa ca ŵamkwawo Esekiele

¹⁵ AMBUJE ŵaŵecete ni une kuti.

¹⁶ “M'mwe mwanace jwa mundu, cinamsumule mwakusisimusya mundu jumkusamnonyela mnope pa umi wenu. Nambo kasimdandawula kapena kulila kapena gwisya misosi.

¹⁷ Mlile malilo mwangakoposya maloŵe ni mkalosya kuti mkulila malilo. Mkatyosya nduŵila jenu kapena kuwula sapato syenu; kasimliwunicila ngope jenu kapena kulya yakulya ya ŵakulila.”

¹⁸ Myoyo kundaŵi naŵecete ni ŵandu. Ligulo lyakwe ŵamkwangu ni kuwaga, ni kundaŵi kwakwe natesile mpela muŵalamulile kuti ndende.

¹⁹ Nipo ŵandu ŵambusisye kuti, “Ligongo cici mkutenda yeleyi?”

²⁰ Ni najanjile jemanjajo kuti, “AMBUJE ŵaŵecete ni une kuti

²¹ mwasalile Aisalaeli utenga wangu kuti: Tinjijisakasya Nyumba jangu jele jimŵele mli mkujisangalalila mnope. Mkusajisangalalila mnope pakujiwona, ni mwajinonyelaga ni mtima wenu wosope. Ŵanace ŵenu ŵacalume ni ŵacakongwe ŵamwalesile munyuma taciwulajidwa ni upanga.

²² Jemanja timcitenda mpela mundendele unemu. Ngasimliwunicila kumeso kwenu kapena kulya yakulya ya ŵandu ŵa ku lila.

²³ Nduŵila jawo taciwala mu mtwe mwawo, sapato soni timciwala. Ngasimlila malilo kapena koposya misosi, nambo tacilaga mnope ligongo lya ulemwa* wawo nipo tacigambaga kuwuwulilana.

²⁴ Sambano une tinjiŵa cisyasyo kwa jemanja, nipo tacitenda mpela mundendele unemu. AMBUJE akuti yeleyi patiyicitendekwapo, jemanja timcimanyilila kuti ali AMBUJE Mlungu.”

²⁵ Kaneko AMBUJE ŵaŵecete ni une acitiji kuti, “M'mwe mwanace jwa mundu, lisiku line ŵanduŵa tinjatyocesya Nyumba jangu jele jakusasangalalila ni kupocela pakujilola ni kuŵicilapo mtima wawo. Nipo soni tinjijigala ŵanace ŵawo ŵacalume ni ŵacakongwe.

²⁶ Pa lisiku lyelelyo litinjitenda yeleyi, mundu jwine tacikulupuka kuconasikoco nipo taciyika kwenumwe kukumsalila yiyatendeceyo.

²⁷ Lisiku lilyolyo timcipakombola kuŵeceta, myoyo timcipakombola kuŵeceta ni mundu juŵakulupwicejo, soni ngasimŵa ŵangaŵeceta. Myoyo timciŵa cimanyisyo kwa jemanjajo ni tacimanyilila kuti Une ndili AMBUJE Mlungu.”