Esek 23 - Chiyawo Bible

Ya ulemwa wa acakongwe ŵaŵili

¹ AMBUJE* ŵaŵecete ni une.

² “M'mwe mwanace jwa mundu, ŵatite, paliji pana acakongwe ŵaŵili ŵacitumbo cimo.

³ Ŵatendaga ya lilamayo ku Iguputo, yalilama ŵatendaga ali ŵali, kweleko ŵagambaga kwakamula maŵele gawo gangagwa gala.

⁴ Jwamkulungwa ŵaliji Ohola, mpwakwe ŵaliji Oholiba. Nalombile wosope ŵanaŵaŵili mwamti ŵamŵelecele ŵanace ŵacalume ni ŵacakongwe. Mena gawo gakwete ngopolelo, Ohola lyagopolelaga Samaliya ni Oholiba lyagopolelaga Yelusalemu.

⁵ Ohola ŵatendaga yalilama atamose kuti ŵaliji ŵa une. Ŵapitilisyaga kutenda ya lilama ni maganja gakwe ga ku Asiliya.

⁶ Acalumewo, ŵane ŵaliji asilikali ŵakulwala ya papo, ŵaliji ŵa bwanamkubwa, ŵane ŵaliji ŵakulongolela ngondo, wosope ŵaliji ŵakusalala soni ŵakwela mahaci.

⁷ Ohola ŵatendaga lilama ni wosopewo, acalume ŵakupikanika ŵa ku Asiliya. Soni ŵalisakesye ni milungu jine ja acalume wosope uŵatendaga nawo yalilamayo.

⁸ Nganaleka ndamo syakwe syakusala syalilama siŵatendaga ku Iguputo, kwele acalume ŵakwe ŵagonaga najo ali mwali. Ŵamkamulaga maŵele gakwe ni gonaga najo.

⁹ Myoyo nampelece kwa maganja gakwe ga ku Asiliya, gele jwalakwe ŵaganonyelaga mnope.

¹⁰ Jemanjajo ŵamwusile yakuwala, ni ŵamsumwile ŵanace ŵakwe ŵacalume ni ŵacakongwe, ni kwawulaga ni upanga. Acakongwe ŵaŵecetaga kulikose ya jwalakwe mwele muŵapocelele cilango cakwe.

¹¹ “Atamose kuti mpwawo Oholiba ŵayiweni yeleyi, jwalakwe jwatesile ya lilama kumpunda muŵatendelaga Ohola mkulugwe.

¹² Nombe najo ŵanonyelaga Asiliya, mnopemnope acibwanamkubwa, acakulungwa ŵa ngondo, asilikali ŵa inifolomu, ŵakwela mahaci, wosopewo ŵaliji acacanda ŵakusalala.

¹³ Soni nayiweni kuti jwalakwe ŵalisakesye, myoyo ŵaŵiliwo ŵakuyisye litala limo.

^14-15 “Nambo Oholiba jula jwatesile ya lilama mwakupundanganya mnope. Ŵayiweni yitusitusi ya acalume m'mapupa, yitusitusi ya Ababiloni yalembedwe ni utoto wecejewu. Ŵanduwo ŵataŵile malamba myiwunu, ni kuwala nduŵila ku mtwe. Wosopewo ŵawonekaga mpela acakulungwa ŵa ngondo, soni ŵawonekaga mpela Ababiloni alukusyo ŵa ku Kalideya.

¹⁶ Piŵagambile kwawona jemanjajo, jwamkongwe jula jwakumbile, ni jwatumisye ŵamitenga kukwaŵilanga ku Babiloniya.

¹⁷ Myoyo acalume ŵa ku Babiloniya ŵayice kwa jwalakwe ni gona najo. Ŵamsakesye ligongo lya yakusaka ya yilu yawo, ali amsakesye myoyo, jwamkongwejo nganiŵanonyela soni acalumewo.

¹⁸ Jwamkongwejo ŵatendaga ya lilama pakulanguka, soni ŵalosyaga ku yalo kwakwe ngatenda soni. Myoyo namŵenjile mpela munatendele ni mkulugwe.

¹⁹ Nambo ŵapitilisye kutenda ya lilama ngalecesya, ni kumbucilaga ya lilama yiŵatendaga ndaŵi jiŵaliji lihule ku Iguputo pa ŵanace wakwe.

²⁰ Ŵasakaga maganja gigakwete yiŵalo yiyaliji yekulungwa mpela ya bulu, mtukuta wawo uwaliji mpela wa mahaci.”

²¹ (Myoyo m'mwe Oholiba mwasakaga soni kutenda yalilama mpela mumwatendelaga ku Iguputo mli mwali, kwele kuŵamkamulaga maŵele genu.)

Mlungu akumpa cilango Oholiba

²² “Sambano Une AMBUJE Mlungu nguti, M'mwe Oholiba, tinjigajimusya maganja genu gagakumnyalaya kuti galimbane ni m'mwejo. Tinjigaŵilanga kuti gayice kutyocela ku mbali syosope.

²³ Tinjaŵilanga ŵandu ŵa ku Babiloniya, wosope wa ku Kalideya, ŵa ku Pekodi, ŵa ku Showa, ŵa ku Kowa, pamo ni Asiliya wosope. Wosope ali acalume ŵakusalala, acibwanamkubwa, acakulungwa ŵakulongolela ngondo, asilikali, wosopewo ni ŵakwela mahaci.

²⁴ Taciyika kutyocela kumpoto kukuputa ngondo ni mahaci ga ngondo ni yigeleta yejinji. Kwika soni likuga lyekulungwa lya ngondo lyakutyocela ku yilambo yosope. Tacimsyungulila ali awete yakulicinjilicisya ni yisoti ya ngondo. Tinjimpeleka m'mwejo kwa jemanjajo, ni tacimlamula mwakuya malamusi gawo.

²⁵ Tinjakunda kuti amtendele ngalwe ligongo lyakuti namtumbilile. Tacikata lupula lwenu ni mapikanilo genu ni kwawulaga ŵanace ŵenu. Elo, tacimsumula ŵanace ŵenu ŵacalume ni ŵacakongwe ni kwajoca moto ali cijumi.

²⁶ Tacipapulanya yakuwala yenu, ni kumsumula yakulisalalicisya yenu ya mtengo wapenani.

²⁷ Myoyo tinjilekasya yakunyalaya ni yacikululu yenu yele yimŵele mli mkuyitenda mli mkutama ku Iguputo. Myoyo ngasimkumbila soni yindu ya Iguputo kapena kuyikumbucila soni.”

²⁸ Yakuŵeceta AMBUJE Mlungu nayi: “Tinjimpeleka myala mwa amagongo ŵenu, unganimwasoselaga yambone ligongo lyanganonyela.

²⁹ Ligongo lyakuti akusamŵenga, tacimsumula yosope yimwayipatile ni lilama lyenu, ni tacimleka mli makonope ni umakonope umwatendelaga lilama tiwuciŵa wangawala. Yakunyalaya yenu ni cikululu cenu

³⁰ ni yimyikasisye yeleyi kwenumwe, ligongo lyakuti mwatesile yakunyalaya ni mitundu jine, soni ni kulisakasya ni milungu jine.

³¹ Mwakuyisye yiŵatendaga akulu ŵenu, myoyo tinjiŵika mgawo wa yisawusyo yakwe m'myala mwenu.”

³² Yakuŵeceta AMBUJE Mlungu nayi, “Timcimwela mgawo wa mkulugwenu, mgawo wakusokoka soni wekulungwa. Ŵandu tacimsekaga ni kumnyosyaga m'mwejo, ligongo mgawowo ugumbele mnope,

³³ timcikolelwa, soni mu mtima mwenu muli mugumbele ni canasa. Welewu ni mgawo wakogoya soni wakonanga, mgawo wa cilango ca mlongo mjenu Samaliya.

³⁴ Timcimwa ni kumalisya mgawowo, soni yipasipasi yakasika yakwe tiyicikata maŵele genu. Ni yinguti Une AMBUJE Mlungu.”

³⁵ Sambano yakuŵeceta AMBUJE Mlungu nayi: “Ligongo mwandiŵalile Une ni kundeka kunyuma kwenu, myoyo timlaje ligongo lya yakunyalaya ni yacikululu yenu.”

Mlungu akwapa cilango acakongwe ŵaŵiliwo

³⁶ AMBUJE ŵaŵecete ni une kuti, “M'mwe mwanace jwa mundu, ana mpaka mwalamule Ohola ni Oholiba? Sambano mwajimbe magambo ligongo lya yakunyala yiŵayitesile.

³⁷ Ŵatesile cikululu, soni ŵawuleje ŵandu. Ŵatesile cikululu pakujilambilaga milungu jawo, soni ŵanace ŵangu uŵambelecele, ŵapelece kwa milungujo mpela yakulya yawo.

³⁸ Ŵatesile soni ayi: ŵasakesye malo gangu gakumbopelela, soni ŵanyosisye masiku gakupumula ga Ayuda ginagaŵisile.

³⁹ Piŵawuleje ŵanace ŵawo ni kwapeleka mpela mbopesi kwa milungu jawojo, ndaŵi jijojo ŵajinjile M'nyumba jangu jeswela ni kujisakasya. Nditu ayi ni yiŵatesile m'nyumba jangu.

⁴⁰ “Ŵatumaga soni ŵamitenga kukwaŵilanga acalume ŵa kwakutalika, soni acalumewo ŵayice. Acakongwe ŵaŵili ŵala ŵajosile ni kulisalalisya m'meso mwawo ni yakupeta ni kuwala yindu ya mtengo wapenani.

⁴¹ Ŵatemi pa cindanda cakusalala, soni pasogolo pawo paliji pana tebulo, ni pa tebulopo ŵaŵisile ubani* ni mawuta yinapele Une.

⁴² Kugumila kwa likuga lya ŵandu ŵangasamala yakutenda ŵapikanice, konjecesya pa ŵandu wamba, yidakwa yayice kutyocela ku cipululu. Ŵawecice makosa acakongwewo m'makono mwawo ni yisoti yakusalala ya ucimwene m'mitwe mwawo.

⁴³ Sambano une natite, jwamkongwe jweleju jwam'male ni cikululu. Nambo alole, ŵandu akumkuya pa yalilama yakwe peyo.

⁴⁴ Myoyo ŵapite kwa jwalakwe mpela muŵajawulilaga ŵandu kwa jwamkongwe jwalilama. Mwelemu ni muŵajawulilaga kwa Ohola ni Oholiba kuja kutenda nawo yalilama.

⁴⁵ Nambo lisiku line ŵandu ŵakulungamika tacajimba ŵanduwo magambo ga cikululu ni gakuwulaga acimjawo. Yakuwona kusyene kuti jemanjajo ŵacikululu, soni m'myala mwawo miasi jili psyu.”

⁴⁶ Yinguŵeceta Une AMBUJE Mlungu nayi: “Mliŵilanje likuga lya ŵandu kuti lyalagasye ni kwasumula yipanje yawo.

⁴⁷ Acakongwe ŵaŵiliwo ŵasome maganga ni kwakata ni mawupanga gawo. Ŵawulaje soni ŵanace ŵawo ŵacalume ni ŵacakongwe soni ajocile nyumba syawo.

⁴⁸ Myoyo tinjimasya ndamo syacigwagwa mcilambo cawoco, soni acakongwe wosope tacilijiganya kuti akatenda yacigwagwa mpela muŵatendele jemanjajo.

⁴⁹ Jemanja acakongwe ŵaŵili, tinjimpa cilango ligongo lya ndamo syenu sya cigwagwa ni kulambilaga milungu jine. Pelepo timcimanyilila kuti Une ni AMBUJE Mlungu.”