Esek 22 - Chiyawo Bible

Magambo ga Yelusalemu

¹ AMBUJE* ŵaŵecete ni une kuti.

² “M'mwe mwanace jwa mundu, ana mliŵicile cile kuja kuwulamula msinda wegumbale ni ŵandu ŵakuwulaga acimjawo? Sambano mjamuce ligongo lya ndamo syakwe syangalumbana.

³ Mwusalile msindawo kuti Une AMBUJE Mlungu nguti, mliŵilanjile likungu mwasyene m'mwe msinda umwakoposyaga miasi ja ŵandu ŵenu ŵajinji ni kulisakasyaga pakujilambilaga milungu jimwajipanganyisye mwasyene.

⁴ Mlemwisye ligongo lya kusulusya miasi ni kulisakasya ligongo lya milungu jimwalipanganyicisye, myoyo mnandiye masiku genu, soni yaka ya umi wenu yimasile. Ni ligongo lyakwe ngundile kuti mitundu ja ŵandu jimnyosyeje soni kuti yilambo yosope yimseceje.

⁵ Yilambo yakuŵandicila ni yakutalicila yosope tiyicimnyosyaga ligongo lya ngapikanila malamusi.

⁶ Acakulungwakulungwa ŵa Aisalaeli wosope ŵakulupililaga macili gawo ni myoyo ŵawulagaga ŵandu acimjawo.

⁷ Jemanja ŵandu ŵa mu msindamu ngamkusimwacimbicisya acinangolo ŵenu. Mkusimwalagasya ŵandu ŵa cilendo soni ni kwalyungasya ŵanace ni acakongwe ŵamasije.*

⁸ Myinyosisye yindu yangu yeswela, soni ngamkusasunga masiku gakupumula ga Ayuda.

⁹ Mwa m'mwejo mwana ŵandu ŵa unami ŵakusasaka kuti acimjawo awulajidwe. Mwana ŵane ŵakusalya mbopesi syakupelecedwa kwa milungu jine. Mwana ŵandu ŵane ŵakutenda yakunyalaya.

¹⁰ Mwa m'mwejo mwana ŵane ŵakusagona ni acakongwe ŵa acatati ŵawo. Ŵane akusiŵakanganicisya acakongwe gona nawo ndaŵi jakulwala ku mwesi.

¹¹ Ŵane akusatenda cikululu ni acakongwe ŵa acimjawo, ŵane akusatenda yakusakala ni acakwegwawo kapena acalumbu ŵawo, ŵanace ŵa baba ŵawo.

¹² Mwenumwe mwana ŵandu ŵakusapocela mbiya kuti ŵawulaje acimjawo. Ŵane akusapocela mbiya sine syakonjecesya pa siŵakongwesye, ŵane akusiŵajogoya acimjawo kuti apate pindu. Wosopewo andiŵalile Une.” Ni yinguti Une AMBUJE Mlungu.

¹³ “Ni ligongo lyakwe tinjiŵika magasa gangu gewumbate pa mbiya simwapataga mwangajenela, soni pa miasi jimwasulusyaga sikati jenu.

¹⁴ Ana timcilimbape mtima kapena makono genu tigaciŵa ni macili ndaŵi jitinjimpa cilango? Ni yinguti Une AMBUJE, soni tinjiyitenda kwene.

¹⁵ Tinjapwilinganya ŵandu ŵenu sikati ja ngosyo sya ŵandu ni kwapwilinganyicisya ku yilambo yosope, mwelemu ni mutinjimacisya ndamo syene syakusakala.

¹⁶ Tinjimtenda kuŵa ŵakunyosyeka pameso pa ngosyo sya ŵandu, myoyo timcimanyilila kuti Une ndili AMBUJE.”

Ng'aso ja Mlungu jakuswejelecesya

¹⁷ AMBUJE ŵaŵecete ni une kuti,

¹⁸ “M'mwe mwanace jwa mundu, Aisalaeli wosope aŵele ŵangali mate m'meso mwangu. Ali mpela cisyano cangali masengo — kopa* citini ni mtofu — yisigele ali aswejesye silifa* mu ng'aso jwakuswejelecesya.

¹⁹ Myoyo sambano Une AMBUJE Mlungu nguŵeceta kuti, pakuti jemanja wosope mŵele ŵangali masengo, tinjimsonganya pampepe ku Yelusalemu,

²⁰ mpela mwakusatendela ŵandu pakusonganya pampepe silifa, kopa, cisyano, mtofu ni citini mu ng'aso ni kwisilaga moto kuti yinyelenyenduce, mwele ni mucinjitendela soni Une patinjisonganya pampepe ndili ndumbile ni ukali. Tinjimŵika mkati mwa msinda ni kumnyelenyendulila mwelemo.

²¹ Tinjimsonganya pampepe ni kumjoca moto walutumbilo lwangu mpaka mlimnyelenyendwice.

²² Timcinyelenyenduka kwene mpela muŵanyelenyenducile silifa mu ng'aso, ni myoyo timcimanyilila kuti Une AMBUJE namtumbilile.”

Ulemwa wa ŵakulongolela ŵa ku Isalaeli

²³ AMBUJE aŵecete soni ni une.

²⁴ “M'mwe mwanace jwa mundu, ŵatite, mwasalile Aisalaeli kuti cilambo cenu cili cangaswejela, soni cangamgwila ula ligongo lya lutumbilo lwangu.

²⁵ Ŵakulongolela ŵakwe ali mpela masimba gagakutuluma pakamula nyama. Akusawulaga ŵandu, ni kwasumula yipanje ni yindu ya mtengo wapenani, ni ligongo lyakuwulaga kwawo akusaleka acakongwe ŵajinji ŵamasije.

²⁶ Ŵakutaga mbopesi ŵakwe soni ŵakasaga malamusi gangu ni ŵasakasyaga yindu yangu yeswela. Nganalekanganyaga yindu yeswela ni yindu wamba. Nganiŵajiganyaga ŵandu kulekangana kwa yindu yakwenela ni yangajenela pa dini, soni nganasamalaga masiku gangu gakupumula, mwakuti ngananjimbicisyaga ŵandu ŵa ku Isalaeli.

²⁷ Acakulungwakulungwa ŵa boma ali mpela masogo gakupaculanya nyama jakamwile. Akusawulaga ŵandu kuti asicile.

²⁸ Ŵakulocesya ŵakwe asisile ulemwa* welewu mpela mwakupacila ŵandu njelesa pepupa. Akusayiwona yindu ya unami m'mesomkulola ni kusalaga yindu ya unami. Akusati akuŵeceta maloŵe ga AMBUJE Mlungu, nambo Une AMBUJE mkanimbeceta ni jemanjajo.

²⁹ Ŵandu ŵa mcilambomo akusiŵalagasya acimjawo ni kwiŵa. Akusiŵapondelesya ŵakulaga ni ŵakusoŵa, ni kwalagasyaga acalendo pangatendela yindu mwakulungamika.

³⁰ Namsosilesosile mundu sikati jawo jwakuti ataŵe lipupa, jwakuti pameso pangu ajime pele pipagumwice ni kucicijila cilambo, kuti ngacijonanga. Nambo ngininamsimana atamose jumo.

³¹ Ni ligongo lyakwe natumbilile mnope jemanjajo, tinjajonanga kusyesyene ni lutumbilo lwangu lwakolele mpela moto ligongo lya yindu yayitesile.” AMBUJE Ŵamaciligosope aŵecete.