Esek 21 - Chiyawo Bible

Upanga wa AMBUJE Mlungu

¹ AMBUJE* ŵaŵecete ni une kuti.

² “M'mwe mwanace jwa mundu, mlole Yelusalemu ni mlalicile yakusisyana ni malo gakwe gakulambila. Mlocesye yakucijimba magambo cilambo ca Isalaeli

³ ni mcisalile cilambo ca Aisalaeli kuti, AMBUJE akuti: Une ndili m'magongo jwenu. Myoyo tinjikoposya upanga m'malo mligonelo mwakwe kuti nawulaje ŵandu ŵenu, ŵambone ni ŵangalumbana ŵakwe.

⁴ Pakuti tinjikoposya upanga wangu mligonelo mwakwe kuti nawulaje ŵandu ŵenu ŵambone ni ŵangalumbana ŵakwe, kutandila kum'mwela mpaka kumpoto.

⁵ Myoyo ŵandu wosope tacimanyilila kuti Une AMBUJE ngopwesye upanga wangu, soni ngasinawuŵika m'malo mwakwe.

⁶ “M'mwe mwanace jwa mundu, mgumile mnope soni mwalosye kupweteka mtima pameso pawo.

⁷ Naga akumwusya ligongo limkugumilila, mwajanje kuti, ligongo lya utenga wawukwika. Patiwuciyika, mitima jawo tijicitenda woga, soni makono gawo tigacilepetala, taciŵa ŵangali macili, soni malungo gawo tigacitetemelaga. Yikwika, yicitendecekwa.” Ni yakuti AMBUJE Mlungu.

⁸ AMBUJE ŵaŵecete ni une kuti,

⁹ “M'mwe mwanace jwa mundu, mlocesye soni msale kuti, AMBUJE akuti: Upanga, awunosile, soni awupukwite.

¹⁰ Awunosile kuti ukawulaje, awupukwite kuti umesye mpela njasi. Tikuciŵa kwangali kusangalala, pakuti ŵandu ŵangu nganapikanila kwasalila kulikose ni cilango cilicose.

¹¹ Upanga awupukwite, kuti uŵe cile kuwukamulisya masengo. Upangawu awunosile ni kuwupukuta, kuti awupelece m'myala mwa mundu jwakuwulaga.

¹² Mlile mwakudandawula, m'mwe mwanace jwa mundu; upanga welewu ukwawula kwa ŵandu ŵangu ni acakulungwa wosope ŵa ku Isalaeli. Taciwulajidwa pampepe ni ŵandu wosope. Myoyo mlipute pacidali cenu mwa canasa.

¹³ Ngwalinga ŵandu ŵangu, ni naga akukana kupesya, yindu yosopeyi tiyicatendecela jemanjajo.

¹⁴ “Sambano m'mwe mwanace jwa mundu, mlocesya kwa ŵangu ni msangalalile kupunda kwangu pakukwata m'myala mwenu. Upanga wangu tiwucigwa kaŵilikaŵili. Upanga wakuwulaga, upanga wakogoya ni kuwulaga.

¹⁵ Ukwatendesya ŵandu ŵangu kwasa mtima ni kugwa. Ngujijogoya misinda jawo ni upanga wele ukumesya mpela njasi soni uli cile kuti uwulaje.

¹⁶ Mkapeje ku mkono wamlyo ni ku mkono wamciji, m'mwe upanga wakutema! Mkapeje kulikose kumgalawucile.

¹⁷ Tinjikwata soni m'myala mwangu, pelepo lutumbilo lwangu tilucimala. Ni yinguti Une AMBUJE.”

Upanga wa mwenye jwa ku Babiloniya

¹⁸ AMBUJE ŵaŵecete ni une.

¹⁹ “M'mwe mwanace jwa mundu, mlembe yimanyisyo pa misewu jiŵili jele mwenye jwa ku Babiloniya jitacikomboleka kupita pakwika ni upanga. Misewu jiŵili josope tijicityocela mcilambo cicoco. Mŵice cikwangwali pa malekano ga misewu jakwawula ku msinda.

²⁰ Mlembe cimanyisyo pa msewu wele upanga utiwucipita pakwawula ku Laba wa ku Amoni soni ku Yuda ni ku Yelusalemu msinda wetaŵile mapupa.

²¹ Mwenye jwa Babiloniya ajimi pa malekano ga misewu. Mwenye akutenda cisango ni mipamba kuti alipate litala lyakwenela kupitila. Akuŵenda lunda kwa milungu jakwe, nipo akusosa matoga ga nyama kuti apelece mbopesi.

²² Sambano ku mkono wakwe wamlyo kwana mpamba welembe ‘Yelusalemu.’ Kweleko mwenye akwenela kukulalicila ya kuwulaga ŵandu soni kwesya maloŵe pagumilila ngondo. Jwalakwe akupanganya yida yakutemangulila yipata, kuwunga matuto ga ngondo ni kutaŵa sanja.

²³ Nambo kwa ŵandu ŵa ku Yelusalemu yawonekaga mpela yisango ya unami, ligongo lya kulumbila* kuŵatesile. Nambo tacakumbusya ulemwa* wawo kuti tacijigalwa ukapolo.

²⁴ Myoyo Une AMBUJE Mlungu nguti, mungumbwisye ulemwa wenu. Jwalijose akumanyilila kuti mli ŵakulemwa. Mkusalosya ulemwa wenu muyakutenda yenu yosope. Mkwenela kupocela cilango, soni tinjimpeleka kwa amagongo ŵenu.

²⁵ “Sambano m'mwe soni, ŵakulamulila Isalaeli, m'mwe ŵakunyosyeka ni ŵakusakala, lisiku lyenu liyice, ni kuti ndaŵi ja cilango cenu cakumalisya.

²⁶ Ni yinguti Une AMBUJE Mlungu. Mwule nduŵila jenu ni cisoti ca ucimwene. Yindu ngayiŵa muyaŵelele kala. Mwakwesye ŵakulaga! Mwatulusye ŵele ŵakulamulila!

²⁷ Masame, masame! Tinjiwutenda msindawu kuŵa masame. Nambo yeleyi ngasiyitendecekwa mpaka jwele junamsagwile kuti awupe cilango msindawu ali ayice. Pelepo tinjiwupeleka msindawu kwa jwalakwejo.

Upanga ni Aamoni

²⁸ “M'mwe mwanace jwa mundu, mlocesye. Mjenesye kuti, yakuŵeceta AMBUJE Mlungu kwa Aamoni ŵele ŵakwanyosya Aisalaeli nayi. Mwasalile kuti, ‘Upanga, awukopwesye kuti ujonanje; Awupukwite kuti uwulaje, ni kumesya mpela njasi.

²⁹ Mesomkulola gamkugawona gali ga unami, soni cisango cenu cili ca unami. Timcitama pampepe ni ŵandu ŵakusakala wele lisiku lyawo liyice, ndaŵi jakupocela cilango cawo cakumalisya.

³⁰ “ ‘Mwucisye upanga mligonelo mwakwe! Tinjimlamula magambo kumalo kwele kumwapagwile, ku cilambo ca acinangolo ŵenu.

³¹ Timciluwona lutumbilo lwangu patinjiyika nalo kwa jemanja mpela malamba ga moto. Soni tinjimpeleka kwa ŵandu ŵangalwe, ŵakumanyilila konanga.

³² Timcijonasika ni moto. Miasi jenu tacijisulusya mcilambo cenu peco, soni pangali atomose jumo jutacimkumbucilaga jemanja.’ ” AMBUJE aŵecete myoyo.