Esek 20 - Chiyawo Bible

Ungakulupicika wa Aisalaeli

¹ Lisiku lyalikumi lya mwesi wa msano, caka ca msano ni caŵili ca ukapolo wetu. Acakulungwa ŵane ŵa likuga lya Aisalaeli ŵayice kukuŵenda lunda kwa AMBUJE,* nipo ŵatemi pasi pameso pangu.

² Pelepo AMBUJE ŵaŵecete ni une kuti.

³ “M'mwe mwanace jwa mundu, mŵecete ni acakulungwa ŵa ku Isalaeli ni mwasalile jemanjajo kuti AMBUJE Mlungu akuti: Ana myice kukuŵenda lunda kwa Une? Mkusalicisya kuti ndili Mlungu jwa cijumi, ngasinamkunda jemanja kuti mumbusye Une cindu cilicose. Ni yinguti Une AMBUJE Mlungu.

⁴ “M'mwe mwanace jwa mundu, ana mli cile kwalamula jemanjaji? Mwakumbusye yindu yangalumbana yiŵatesile acinangolo ŵawo.

⁵ Mwasalile yinguti. Ndaŵi jinamsagwile Isalaeli, natesile cilanga* ni jemanjajo. Nalilosisye namsyene kwa jemanjajo ku Iguputo ni nasalile jemanjajo kuti: Une ni AMBUJE Mlungu jwenu.

⁶ Lisiku lyelelyo ni linatesile cilanga kwa jemanjajo kuti tinjakoposya mcilambo ca Iguputo, ni kwawula nawo ku cilambo cinasagulile jemanjajo, cilambo ca mkaka ni uci, cambone kupunda yilambo yosope.

⁷ Nasalile jemanjajo kuti ajase milungu jine jele jiŵasangalala najo soni akalisakasya ni milungu jine ja unami ja ku Iguputo, ligongo Une ndili AMBUJE Mlungu jwawo.

⁸ Nambo ŵanjimucile ni ŵakanile kumbikanila. Nganajasa milungu jine kapena kujileka milungu jine ja Aiguputo. Naliji cilepe kuti alupikane lutumbilo lwangu lwakogoya ali ku Iguputo peko.

⁹ Nambo nganinayitenda yeleyo, ligongo yikatendekasisye kuti lina lyangu likacimbicikwa, pakuti pasikati pa ŵandu ŵa mitundu jine* ŵatemiji nawo, natesile cilanga kwa Aisalaeli kuti tinjalongolela pakopoka mcilambo ca Iguputo.

¹⁰ “Myoyo nakopwesye mu Iguputo ni kwalongolela mcipululu.

¹¹ Napele jemanjajo malamusi gangu ni kwajiganya, gele gigapaga umi ŵandu ŵaŵagapikanilaga.

¹² Natesile kuti agasamaleje masiku gakupumula ga Ayuda kuti gaŵe cimanyisyo pasikati pa Une ni jemanjajo, kuti amanyilileje kuti Une AMBUJE natesile jemanjajo kuŵa ŵaswela.

¹³ Nambo Aisalaeli ŵanjimucile Une mcipululu. Ŵakasile malamusi gangu ni kwikana yinasalilaga, yiyampaga umi jwalijose juŵayipikanilaga. Kusyene ŵanduwo ŵasakesye masiku gangu gakupumula Ayuda. Myoyo naganisisye yakwapa cilango mwa ukali mcipululu m'momo ni kwajonanga kuti akasawoneka soni.

¹⁴ Nambo nganinayitenda yeleyo, kogopela kuti lina lyangu tilicinyosyeka pasikati pa ŵandu ŵa mitundu jine uŵambweni ndilimkwakoposya Aisalaeli ku Iguputo.

¹⁵ Nambo soni nalumbile kwa jemanjajo mcipululu kuti ngasinajigalila mcilambo cele cinapele jemanjajo, cilambo cangasoŵa yindu, cilambo cambone mnope kupunda yine yosope.

¹⁶ Paja ŵakanile yinasalilaga, nganapikanila malamusi gangu, soni ŵasakesye masiku gangu gakupumula ga Ayuda. Mtima wawo wanonyele kujikuya milungu jawo jine.

¹⁷ “Nambope natendele canasa nipo nganinajonga kapena kwamala kwakuti akawoneka soni mcipululu.

¹⁸ M'malo mwakwe nasalile ŵanace ŵawo mcipululu kuti akakuya yiŵatendaga acinangolo ŵawo, kapena kupikanila malamusi gawo kapena soni kulisakasya ni milungu jawo jine.

¹⁹ Une ndili AMBUJE Mlungu jwenu. Mgakuyeje malamusi gangu, ni kuyipikanila yingumsalila.

²⁰ Mgacimbicisyeje masiku gangu gakupumula ga Ayuda kuti gaŵe gapajika, kuti gaŵe mpela cimanyisyo pasikati pa Une ni jemanja, myoyo timcimanyilila kuti Une ndili AMBUJE Mlungu jwenu.

²¹ “Nambo ŵanace ŵawo ŵanjimucile Une. Nganakuya yinasalilaga soni nganapikanila malamusi gangu, gigapelakaga umi kwa ŵandu uŵagapikanilaga. Soni ŵagasakesye masiku gakupumula ga Ayuda. Sambano naganisisye kwalosya ukali wangu jemanjajo ni kwapa cilango jemanjajo ni lutumbilo lwangu mcipululu pemo.

²² Nambo nganindenda myoyo, kuti lina lyangu licimbicikwe, likanyosyeka pasikati pa ŵandu ŵa mitundu jine ŵiŵambweni ndilimkwakoposya Aisalaeli ku Iguputo.

²³ Myoyo nalumbile soni mcipululu kuti tinjapwilinganyicisya pasikati pa mitundu ja ŵandu ni kwapwilinganyicisya ku yilambo yosope,

²⁴ ligongo nganapikanila malamusi gangu, ni kana yinasalilaga, ŵasakesye masiku gangu gakupumula Ayuda, soni ŵajilambilaga milungu jine jijojo jiŵajilambilaga acinangolo ŵawo.

²⁵ “Kaneko napele malamusi gele nganigaŵa gambone kwa jemanjajo ni kwasalila yindu yanganiyapaga umi wambone.

²⁶ Nalesile mele kuti alisakasye acimsyene ni mituka jawo, pakwapeleka ŵanace ŵandanda kupagwa mpela mbopesi syakutinisya, kuti najogoye jemanjajo. Natesile myoyo kuti amanyilile kuti Une ndili AMBUJE.

²⁷ “Sambano m'mwe mwanace jwa mundu, mŵecetane nawo Aisalaeli ni mwasalile kuti Une AMBUJE Mlungu nguti; Acinangolo ŵenu ŵanyosisye pakuleka kungulupilila.

²⁸ Ndaŵi jinajigalile mcilambo cinalumbilile kuti tinjapa. Kulikose kuŵaliwonaga litumbi lyelewu ni citela cakutenjela, kweleko ŵapelekaga mbopesi syawo sisyandumbilikasyaga. Kweleko ŵapelekaga mbopesi sya liwungo lyambone soni ni mbopesi sya yakumwa.

²⁹ Nawusisye kuti, Ana kwitumbi lyelewu kumwajawulagako kwamtuli? Myoyo lina lyakwe liŵele ‘Malo Gamalewu’ mpaka lelo.

³⁰ Sambano mwasalile Aisalaeli kuti Une AMBUJE Mlungu nguti; Ana timlisakasyeje mpela mwele muŵatendelaga acinangolo ŵenu ni kusokonecelaga pakujikuyaga milungu jawo jakunyalaya?

³¹ Ndaŵi jimkupeleka mituka jenu ni ŵanace ŵenu mpela mbopesi syakutinisya, mkusalisakasya mwacimsyene ni milungu jinejo mpaka lelo jino. Ana Aisalaeli jemanja, mpaka namkunde uli kuti namjamuce Une? Pakuti Une ndili Mlungu jwa umi, ngasingunda yeleyi.

³² Jemanja mkusaka kuŵa mpela ŵandu ŵa mitundu jine, soni mpela ŵandu ŵa yilambo yine ŵele ŵakusayilambila yitela ni maganga. Nambo yeleyo ngasiyitendecekwa kose.

Mlungu akusapeleka cilango ni kululucila

³³ “Kusyene Une ndili AMBUJE Mlungu jwa umi, tinjimlamulila ni mkono wangu wamacili, ndiliniwutambasukwile ni lutumbilo lwekulungwa.

³⁴ Tinjimlosya macili gangu ni lutumbilo lwangu pakumsonganya pampepe ni kumwusya kutyocela ku yilambo yimwapwilinganile.

³⁵ Tinjimjinjisya mcipululu ca ŵandu, kweleko tinjimjimba magambo tuli mkulolegana pameso ni pameso.

³⁶ Tinjimpa cilango mpela munapelecele cilango kwa acinangolo ŵenu mcipululu ca ku Iguputo. Ni yinguti Une AMBUJE Mlungu.

³⁷ “Tinjimlamulila jemanja ni kumtenda kuti mcipikanileje cilanga cangu.

³⁸ Tinjatyosya ŵandu ŵakwimucila ni wa ulemwa* sikati jenu. Tinjatyosya mcilambo cakutamaco, nambo ngasajinjila mcilambo ca Aisalaeli. Pelepo timcimanyilila kuti Une ndili AMBUJE.”

³⁹ “Nambo jemanja Aisalaeli, yinguti Une AMBUJE Mlungu nayi: Jawulagani jemanja wosope ni mkajitumicileje milungu jenu jinejo! Nambo nguti panyuma pakwe timumbikanileje une, soni ngasimsakasya lina lyangu lyeswela pakuja kupeleka mituka kwa milungu jenu jine.

⁴⁰ Aisalaeli wosope tacindumicilaga une mcilambo cawoco kwitumbi lyangu lyelewu, litumbi lyeswela lya ku Isalaeli. Kweleko tinjapocela mwakusangalala soni tinjipocela mituka jawo ni mbopesi syawo syeswela.

⁴¹ Tinjimpocela jemanja mpela mbopesi jakununjila, katema katinjimjigala kutyocela kwa ŵandu, ni kumsonganya pampepe kutyocela ku yilambo yele yimwapwilinganile, ni tinjililosya kuti Une ndili Jwamswela pasikati pa jemanja, ŵandu ŵa mitundu jine ali mkulola.

⁴² Pelepo timcimanyilila kuti Une ndili AMBUJE, katema katinjimwucisya mcilambo ca Isalaeli, cilambo cele cinalumbilile kuti tinjapa acinangolo ŵenu.

⁴³ Kweleko timcikumbucila ndamo syenu syakusakala ni yakunyalaya yenu yosope yimwalisakacisye nayo. Soni timcisakalilwa nayo mwacimsyene ligongo lya yindu yakusakala yimwayitesile.

⁴⁴ Jemanja Aisalaeli timcimanyilila kuti Une ndili AMBUJE, katema katinjimtendelaga yambone ligongo lya lina lyangu, ngakumbucila ndamo syenu syakusakala ni masengo gangalumbana.” Ni yakuti AMBUJE Mlungu.

Moto kum'mwela

⁴⁵ AMBUJE ŵaŵecete ni une.

⁴⁶ “M'mwe mwanace jwa mundu, mlole kum'mwela. Mlalicile mwakwajamuka ŵandu ŵakumwela soni mcijimbe magambo cilambo ca ukweti wa Negebu.

⁴⁷ Mwusalile ukweti wa mbali ja kum'mwela yakuti AMBUJE Mlungu; Tinjikolesya moto, soni motowo tiwucijoca yitela yenu yosope yejumu ni yayiŵisi yakwe. Malamba gakwe tigaciŵa gangasimisika, nipo jwalijose kutyocela kum'mwela mpaka kumpoto tacipya nawo.

⁴⁸ Ŵandu wosope tacilola kuti Une AMBUJE ni junakolesisye motowo soni ngaŵa mkuwusimisya.”

⁴⁹ Sambano natite, “AMBUJE Mlungu, ŵanduŵa akumbeceta kuti, ‘Ana ngaŵa ŵakusagamba kuŵeceta yakwelegula ŵala!’ ”