Esek 2 - Chiyawo Bible

¹ Jwalakwejo jwatite kuti, “M'mwe mwanace jwa mundu, mjimuce. Ngusaka mbecete ni m'mwejo.”

² Piŵaŵecetaga maloŵega, Msimu wa Mlungu wajinjile mwa une ni kunjimusya, napikene maloŵe galimkuti,

³ “M'mwe mwanace jwa mundu, ngumtuma kuti mjawule kwa ŵandu ŵa ku Isalaeli. Anjimucile ni kunjasa une nipo ŵaciŵela kuŵa ŵandu ŵakwimucila, mpela muŵatendele acinangolo ŵawo.

⁴ Ŵandu ŵakwe ŵangapikana soni ngakunjimbicisya une, ni sambano ngumtuma kuti mkasalile jemanjajo yinguti Une AMBUJE Mlungu.

⁵ Kanga ŵandu ŵakwimucilawo tamkapikanile kapena ngajakumpikanila, nambope tacimanyilila kuti jwakulocesya* ayice pasikati pawo.

⁶ “Nambo m'mwe mwanace jwa mundu, mkasimwajogopa jemanjajo kapena yiliyose yitakaŵecete. Takamnyosye ni kumnandiya m'mwejo; timkaŵe mpela mli pasikati pa yiŵalaŵala. Nambope kasimwajogopa ŵandu ŵakwimucilawo kapena kogopa yiliyose yakuŵeceta.

⁷ Mkasalile jemanjajo cilicose cinamtumile kuti mkaŵecete, kanga takapikanile kapena iyayi. Mkumbucile mwakusaŵela ŵandu ŵakwimucila.

⁸ “M'mwe mwanace jwa mundu, mpikanile yingumsalilayi. Kasimŵa ŵakwimucila mpela jemanjajo. Mjasame kukamwa ni mlye yele yitinampeje m'mwejo.”

⁹ Naliweni ligasa lili lilondite une, nipo lyakamulile cipukutu ca yakulembedwa.

¹⁰ Ligasalyo lyatambasukwile cipukutu ca yakulembedwayo, ni naciweni cipukutu cosopeco kuti caliji celembe mbali syosope. Maloŵe gigalembedwe mwelemo galiji ga yidandawulo, ga malilo ni gakulila ligongo lya yipwetesi.