Esek 19 - Chiyawo Bible

Nyimbo jakudandawula

¹ AMBUJE ŵandumile kuti njimbe nyimboji jakudandawula kwa ayimwene ŵa ku Isalaeli:

² Mama ŵenu ŵaliji mpela lisimba lyalikongwe! Ŵatusamele tuŵanace pasikati pa masimba gakogoya gamkambako.

³ Ŵalelite jumo jwa ŵanace ŵakwe ni ŵamjiganyisye jwalakwe kusakula nyama; soni ŵamjiganyisye kulya ŵandu.

⁴ Mitundu jwa ŵandu wosope japikene ya lisimbalyo ni ŵalitejile mwisimbo lyawo. Ni yindu mpela yisopo ŵaliwutile kwawula nalyo ku Iguputo.

⁵ Mamagwe ŵala ali alolite ni kuyiwona kuti pangali cikulupi, ŵakusisye mwanace jwine mwa ŵanace ŵakwewo, ni lyakusile kuŵa lisimba lyakogoya.

⁶ Pilyakusile, lyanunjisyaga yalumo ni masimba gajakwe. Nombe nalyo lyalijiganyisye kusakula nyama ni kulya ŵandu.

⁷ Lyagwisisye mapupa gawo, nipo lyajonasile misinda jawo. Ŵandu ŵa mcilambomo ŵatesile woga ligongo lyalisegwe lyakubangula kwakwe.

⁸ Mitundu josope ja ŵandu jasongene pampepe kuti alimbane nalyo; nipo ŵandu ŵatyocele mbali syosope. Ŵatejile lwawu lwawo ni ŵalikamwile mu lwawu lwawolo.

⁹ Ni ŵaliŵisile mcitetele ni ŵalijigalile kwawula nalyo kwa mwenye jwa ku Babiloniya. Ni ŵaliŵisile mu ukayidi, mwamti kubangula kwakwe nganikupikanika soni m'matumbi ku Isalaeli.

¹⁰ Mama ŵenu waliji mpela mpeleya wakupandidwa mumbali mwa lusulo. Wasogwele cenene nipo wakwete nyambi syejinji ligongo paliji pana mesi gejinji.

¹¹ Wakwete nyambi syakulimbangana, syakwenela kupanganyicisya simbo sya ucimwene. Mpeleyawo walewipe mnope pasikati pa yakumela yine; jwalijose ŵawuwonaga ligongo lya nyambi syakwe ni kulewupa kwakwe.

¹² Nambo ŵawucuŵile mwa ukali ni kuwugwicisya pasi. Mbungo jakungopoko lyuŵa jajumwisye yisogosi yakwe. Nyambi syakwe soni syatemece; wajumwile ni ŵawujocile pa moto.

¹³ Sambano awupandile mcipululu, mcilambo cejumu ni cangali mesi.

¹⁴ Lipata lya mpeleyawo lyakamwile moto; nipo motowo wajocile nyambi syakwe pampepe ni yisogosi yakwe. Myoyo wangali nyambi syakulimba syakuti ni kupanganyicisya simbo sya ucimwene. Jeleji ni nyimbo jakudandawula; soni jiŵele nyimbo ja pa malilo.