Esek 18 - Chiyawo Bible

Mundu jwalijose taciwila yakwe

¹ AMBUJE* ŵaŵecete ni une kuti,

² “Ana ligongo cici ŵandu ŵa ku Isalaeli mkusanonyela kuwilisyawilisya citagu* cakuti, ‘Nguju syakulya acakulungwa, syapotile ŵanace.’

³ “Elo, une Mlungu jwa umi,” ni yakuti AMBUJE Mlungu, “Ngasimkamulisya soni masengo citagu celeci mu Isalaeli.”

⁴ Umi uliwose wa mundu uli wangu, umi wa nangolo kwika soni wa mwanace. Mundu jwakulemwa ni jutaciwa.

⁵ “Tuwanicisye kuti pana mundu jwambone, jwakulungamika ni kulupicika.

⁶ Jwalakwe jwangalambila milungu jine ja Aisalaeli kapena kulya nyama jakupelecedwa ku matumbi gakulambila. Jwangasakasya jwamkongwe jwa jwine mundu kapena kutama malo gamo ni jwamkongwe jwakulwala ulwele wa kumwesi.

⁷ Jwangalambusya kapena kumjiŵila mundu jwalijose soni ndaŵi syosope akusawusya cilicose ciŵajigele kwa jwangongole kuti tapelece ngongole jakwe, akusiŵapa yakulya ŵasala ni kwapa yakuwala ŵakulaga.

⁸ Ngakusakongosya mbiya kuti apate mbiya syakonjecesya. Akusakana kutenda yakusakala nipo akusaŵeceta magambo pangamjimila mundu jwalijose kunyuma.

⁹ Mundu jweleju akusagapikanila ni kugasunga malamusi gangu. Jwalakweju ali jwakulungama, soni taciŵa ni umi,” ni yakuti AMBUJE Mlungu.

¹⁰ “Tuwanicisye mundu jweleju ni kuŵeleka mwanace jwele masengo gakwe ni wiyi soni kuwulaga ŵandu, jwele jwakusatenda yindu yejinji,

¹¹ yele babagwe yinganatendeje. Jwalakwe akusalya nyama jakupelecedwa ku malo gakulambila soni akusasakasya jwamkongwe jwa jwine jwamlume,

¹² akusiŵalagasya ŵakulaga, kwajiŵila yindu, soni jwangawusya cindu ca cilangano kwa jwangongole. Akusagalawucila kwa milungu jine ni kutendaga yakunyalaya.

¹³ Akusakongosya kuti apate mbiya sine syakupwaticila penani. Ana mundu jweleju mpaka aŵe ni umi? Iyayi, ngasaŵa ni umi. Ligongo ŵatesile yakusakala yosopeyi, myoyo taciwa, celeci ni cilango cakumŵajila jwalakwejo.

¹⁴ “Tuwanicisye mundu jwakusakala jula ni kuŵeleka mwanace jwele juŵawuweni ulemwa* wa babagwe, ni ngatenda yiŵatendaga babagwe yila.

¹⁵ Jwangalambila milungu jine ja Aisalaeli kapena kulya nyama jakupelecedwa ku malo gakulambila gakwela mnope. Soni jwangasakasya jwamkongwe jwa jwine jwamlume kapena

¹⁶ kumlagasya mundu jwalijose kapena kumjiŵila mundu jwalijose. Akusamwucisya mundu jwangongole cindu ca cilangano cakusapeleka kwa jwalakwe. Akusiŵalisya ŵa sala ni kwaweca ŵa usawuci.

¹⁷ Akusakana kutenda yakusakala ni ŵangakongosya mbiya kuti apate mbiya sine syakonjecesya. Akusagasunga ni kugapikanila malamusi gangu. Mundu jwamti myiyi ngasawila ulemwa wa babagwe, nambo taciŵa nditu ni umi.

¹⁸ Nambo babagwe, pakuti ŵalemwisye pakwalagasya ŵandu ŵane ni kumjiŵila mlongo mjawo ni soni kumtendela yakusakala mundu jwalijose, myoyo taciwila ulemwa uŵawutesile asyene pewo.

¹⁹ “Mwine mpaka awusye kuti, ‘Ligongo cici mwanace jwangapocela cilango pa ulemwa wa babagwe?’ Mwanacejo jwatendaga yakulungamika ni yambone. Jwasungaga ni kugapikanila malamusi gangu, myoyo mwanacejo taciŵa ni umi.

²⁰ Mundu jwakulemwa ni jutaciwa, ngaŵa jwine. Mwanace ngasalaga ligongo lya ulemwa wa babagwe, soni baba ngasalaga ligongo lya ulemwa wa mwanace jwakwe. Mundu jwambone tacipocela mbote ja umbone wakwe, soni mundu jwakusakala tacipocela mbote ja kusakala kwakwe.

²¹ “Naga mundu jwakulemwa akuleka ulemwa wakwe uŵatendaga, ni kupikanilaga malamusi gangu gosope, ni kutendaga yakulungamika ni yambone, nditu jwalakwejo taciŵa ni umi, ngasawa.

²² Ulemwa wakwe wosope tiwucikululucidwa, nipo taciŵa ni umi ligongo lyakutenda yindu yambone.

²³ Ana mkuganisya kuti ngusasangalala ndili kumwona mundu jwakulemwa ali mkuwa?” AMBUJE ŵawusisye. Iyayi, ngasangalele kumwona jwakulemwa ali alesile ulemwa wakwe ni kuŵa ni umi.

²⁴ “Nambo naga mundu jwambone ali alesile kutenda yambone, ni kutendaga yakusakala yakulekanganalekangana yele ŵandu ŵakusakala yakusatenda, ana mundu jweleju taciŵa ni umi? Iyayi, yosope yambone yiŵatesile pangali atamose cimo cicikumbucilidwa. Taciwa ligongo lya ungakulupicika wakwe ni ulemwa wakwe.

²⁵ “Nambo jemanja mkuti, ‘Yakutenda AMBUJEYI yili yangali mate.’ Mpikane sambano jemanja Aisalaeli. Ana mkuganisya kuti yingutenda yili yangali mate? Ana ngaŵa yitendo yenu ni yele yayili yangali mate?

²⁶ Naga mundu jwambone akuleka kutenda yindu yambone, ni kutendaga yangalumbana, taciwa ligongo lya ulemwa wakwewo.

²⁷ Nambo soni mundu jwakulemwa naga akuleka kutenda yindu ya ulemwa, ni kutendaga yambone, tacikulupusya umi wakwe.

²⁸ Pakuti ŵayimanyilile yakulemwa yakwe, ni ŵayilesile myoyo taciŵa ni umi, ngasawa.

²⁹ Nambo jemanja Aisalaeli mkuti, ‘Yakutenda AMBUJE yili yangali mate.’ Mkuganisya kuti yingutenda yili yangali mate, ngaŵa myoyo? Nambo yitendo yenu ni yayili yangalumbana.

³⁰ “Sambano une AMBUJE Mlungu nguti, tinjimpa cilango jwalijose jwa jemanja Aisalaeli malingana ni masengo gakwe. Mpitikuce mtima ni kuleka kutenda yangalumbana, soni mkakunda kuti ulemwa wenu umjonanje.

³¹ Myilece yakulemwa yenu yosope yakalakala yele yimundemwecesye une. Mŵe ni mtima wasambano soni ni lunda lwa sambano. Nambi mkuwilaci jemanja ŵandu ŵa ku Isalaeli?

³² Ngangusosa mundu jwalijose kuti awe,” Ni yakuti AMBUJE. “Myoyo mpitikuce mtima ni kuleka kutenda yangalumbana kuti mŵe ni umi.”