Esek 17 - Chiyawo Bible

Citagu ca nyanga ni mpeleya

¹ AMBUJE* ŵaŵecete ni une kuti.

² “M'mwe mwanace jwa mundu, mwasalile Aisalaeli citagu,*

³ kuti amanyilile yinguŵeceta Une AMBUJE kwa jemanjajo: japali nyanga jajikulungwa ja mang'omba gakusalala ni ja mapapiko gamakulungwa. Jagulucile ku Lebanoni ni jabudwile songa ja nyambi ja citela ca mkungusa,

⁴ japite najo nyambi ku cilambo ca malonda ni kuja kuŵika mu msinda wa ŵandu ŵamalonda.

⁵ Kaneko nyangajo jajigele mbeju ja mcilamboco ni kujipanda pa malo gacajila, pele papaliji pangali mesi gamajinji pakuŵandicila. Jajipandile mpela mwele mwakusapandila citela ca msondoka.

⁶ Sambano mbejujo jamesile ni kuŵa citela ca mpeleya cakutenjelela capasi pakwe. Nyambi syakwe syalolite kwinani kujaliji nyangajo, ni miciga jakwe japite pasi mnope. Myoyo citela ca mpeleyaco caŵele ca nyambi ni camasamba gejinji.

⁷ “Nambo japali nyanga jine soni jajikulungwa ja mapapiko gamakulungwa ni jamang'omba gejinji. Miciga ja mpeleyawo jalolite kujaliji nyangajo ni nyambi syakwe syalolite soni kwa nyangapejo, paganisya kuti mwine tacijitilila mesi gakupunda gagali mu mgundamo pa malo gicapandidwe.

⁸ Nambo mpeleyawo wapandicile kala pa litaka lyacajila lilyakwete mesi gejinji, myoyo wasipukaga nyambi ni kusogolaga yisogosi ya mpeleyawo, ni kuŵa wakusalala.

⁹ “Sambano, Une AMBUJE nguwusya kuti: ana citela ca mpeleya celeci ticicikule cenene? Ana nyanga jila ngasijitupula miciga jakwe ni kata nyambi syakwe, mwamti masamba gakwe tigacinyala? Ngasicisosa macili gamnope kapena ŵandu ŵamacili kuti acicuŵe.

¹⁰ Sambano atamose ali apandicile pane, ana ticicikula cenene? Ana ngasicinyala mnope pakupuga mbungo ja kungopoko lyuŵa? Ana ngasicinyalila pele pacipandicilepo?”

Akugopolela citagu

¹¹ AMBUJE ŵatite,

¹² “Mwawusye ŵandu ŵakwimucilaŵa naga akumanyilila gopolela kwakwe kwa citaguci. Mwasalile kuti mwenye ŵa ku Babiloniya ŵapite ku Yelusalemu ni ŵajigele mwenye ni nduna syakwe kwawula nawo ku Babiloniya.

¹³ Ŵajigele jumo jwa mwiŵasa lya mwenye nikutenda najo cilanga,* ni ŵamlumbilisye kuti aŵe ŵakupikanila. Ŵatyosisye ŵandu wosope ŵakusosekwa mnope ŵa mcilambomo,

¹⁴ kuti ucimwene wa cilamboco uŵe wangali macili, ukapikanikaga soni, nambo kuti upikaniceje pakusunga cilanga ciŵatesileco basi.

¹⁵ Nambo mwenye jwa ku Yuda ŵajimucile mwenye wa ku Babiloni ni ŵatumisye nduna syakwe ku Iguputo kukuŵenda mahaci ni likuga lyalikulungwa lya asilikali ŵa ngondo. Ana mwenye jwamti myoyo mpaka apunde? Ana mpaka mwenyejo akulupuce naga akutenda yeleyo? Ana mpaka komboleka kasa cilanga ni kulupuka?

¹⁶ “Yinguŵeceta Une Mlungu nayi: Ngulumbila pandili Une Mlungu jwa umi, kuti mwenyejo taciwila ku Babiloniya ligongo ŵakasile cilanga ciŵatesile ni mwenye jwa ku Babiloniyako, jwele juŵamŵisile jwalakwejo pa citengu ca ucimwene.

¹⁷ Mwenye jwa ku Iguputo pampepe ni likuga lyakwe lya ngondo tacilepela kumkamucisya mwenyejo ndaŵi jele likuga lya ngondo lya ku Babiloniya pitacisyungulila misinda ja ku Yuda ni matuto gangondo ni sanja sya ngondo, kuti ajonanje ŵandu ŵajinji.

¹⁸ Mwenye jwa ku Yuda ŵalepele cilanga pakasa cilanga ciŵatesile. Nginakuya yiŵalangeneyo, myoyo ngisakulupuka.”

¹⁹ AMBUJE akuŵeceta kuti, “Ngulumbila pandili Une Mlungu jwa umi, tinjimpa cilango jwalakwe pakasa cilanga ciŵatesile pakulumbila mu lina lyangu kuti tacicisunga cilangaco.

²⁰ Tinjimtejela lwawu ni tacitanjilamo. Tinjijawula najo ku Babiloniya ni tinjija kumpa cilango kweleko ligongo lyakuti nganakulupicika kwa Une.

²¹ Asilikali ŵakwe ŵa ngondo ŵamacili taciwila ku ngondo, ni ŵakulupuka tacitilila upande uliwose. Pelepo timcimanyilila kuti Une AMBUJE mbecete.”

Cilanga ca Mlungu ca cembeceyo

²² Ayi ni yakuŵeceta AMBUJE: “Tinjijigala kanyambi kakusonga kakwinani kacitela ca mkungusa ni tinjitema kanyambi kangakomala; ni tinjija kukapanda petumbi lyalilewu,

²³ penani petumbi lyalilewu lya ku Isalaeli. Tikacimela nyambi ni kusogola yisogosi ni tikaciŵa mkungusa wakusalala. Yijuni ya mitundu josope tiyicitamaga mu m'bwilili wa citelaco.

²⁴ Yitela yosope ya mcilambomo tiyicimanyilila kuti Une ni AMBUJE. Ngusayijipiya yitela yayilewu ni kuyilewuya yitela yayijipi. Ngusayijumusya yitela yakubiliŵita nipo ni kuyibiliŵitisya yitela yejumu. Une, AMBUJE mbecete, nipo tinjiyitenda yeleyi.”